Delfina ona tuyikidi muna longi diviokele wamona vo e ntokani za zingu zamfilanga mu nua malavu mayingi ma nkolwa. Nkand’a Nzambi ke usimanga nua malavu ko, kansi uvovanga vo: “Kukadi vana vena awana benuanga vinyu ayingi ko.” (Ngana 23:20) O nua malavu ma nkolwa kondwa tezo yimbevo yayingi ditwasanga yo vonda tongo twayingi. Vana ntandu, ulolo wa wantu befwanga konso mvu. Mawonso mama malenda vengwa kele vo wantu balemvokelanga luludiku lwa Nkand’a Nzambi.

I diau kavanga o Delfina. Wavova vo: “Yabakula vo e malavu ma nkolwa ke mafokolanga ntokani zame ko. Yalanda e longi dina muna Filipi 4:6, 7 divovanga vo: ‘Ke nutelama ntima muna konso diambu ko, kansi . . . yambula ndomba zeno zazayiswa kwa Nzambi.’ Konso lumbu muna fuku, avo mbwene vo e ntokani ziyantikidi, yasambanga kwa Yave. Yanzaisanga e ntokani zame zawonso, kumosi ye makasi, ntim’abudika, ntantu yo kundodokela kansadisa kimana yasoba e ngindu. Muna mene, yavanganga mawonso kimana e ntokani zazi zalembi vutuka diaka. O samba kwa Yave diansadisanga mu sia e sungididi muna lekwa yakala yau, vana fulu kia yindula ina kiakala yau ko. Yabaka e nzengo za yambula emvimba nua malavu ma nkolwa. Wau vo ngolo diavava mu vua luvuvamu lwa ntima, ivanganga mawonso mu lembi lo vidisa.”

E mavangu ma zumba dimosi muna mambu mekututwasilanga ulolo wa mpasi. Kansi, e nkanikinu mia Nkand’a Nzambi milenda kutusadisa mu venga e mpasi zazi. Tufwete yantikila muna fu ifilanga muntu mu tá e zumba, nze kia sikamesa e nzola kwa muntu una vo ke nkaz’aku ko ye fu kia tala mavangu ma zumba. Toko dimosi dina ye nkumbu a Samuele wavova vo: “Kuna kwa mono, o sikamesa e nzola muna muntu ke diakala diambu diampasi ko. Kana nkutu vo mwan’a ndumba kinyangalele ko, yavovanga diambu kimana kanzola. I diau diakitulanga e fu kiaki nze nsaka.” Samuele nkumbu miayingi bamfundanga vo fu kia sikamesa e nzola kena kiau, kana nkutu vo kavangidi wo ku lukanu ko. Kana una vo i wau, Samuele kayambulanga fu kiaki ko. Wayantika wo vangila kuna lukanu. Kansi, e fu kiaki tokanesa kiantokanesanga. Wavova vo: “Fu kiambi kikilu, kadi muntu kifilanga mu yima fu kia loko.”

Samuele watanga longi dimosi mu kuma kia aleke diavaikiswa muna jw.org. Watoma badika e sono kia Ngana 20:11 kivovanga vo: “Kana kindende, okuzayisila muna mavangu mandi, Kana fu yandi yavelela, kana yasonga.” Aweyi e sono kiaki kiansadisila? Samuele wabakula vo e fu kia sikamesa e nzola muna wantu ke kiavelela ko ngatu kiansongi. Wavova vo: “Yabakula mpe vo mwan’a toko una ye fu kiaki oyimanga fu yayingi yambi ikunkitula yakala diambi vava kesompa. Yayantika yindula una nkento isompana yandi kemona avo nsikamese e nzola muna nkento ankaka. Ediadi diankwikidisa vo e fu kiaki kiambi kikilu. Kana una vo diasazu, ediadi ke disongele ko vo fu kiambote.” Samuele wasoba kiwuntu kiandi. O venga e fu kiaki dikunsadisanga mu venga mavangu ma zumba.

Antonio mu vonza kikilu kakala kiadi kumfila mu tá e zumba. Fu kia tala mavangu ma zumba kakala kiau. Kana una vo watoma zolanga nkaz’andi, nkumbu miayingi kayivananga muna vangu diadi. Wavova vo edi diansadisa i yindula e sono kia 1 Petelo 5:8 kivovanga vo: “Nulungalala, nuyingila! O mbeni eno Nkadi ampemba ozietanga nze nkosi ankwiti, kenda vavi ndiona kevempola.” Antonio wavova vo: “E mafoto ye filme zisonganga mavangu ma zumba zasayana muna fulu yawonso ova nza. E mafoto mama ke mekatukanga nzaki ko muna ngindu. E sono kiaki kiansadisa kikilu mu yindula e tuku dia ntonta zazi. Diavavanga yasungamena vo Satana i tuku dia mafoto ye filme zazi za usafu. Owau, nzeye wo vo Yave kaka olenda kunsadisa mu kala ‘walungalala yo yingila’ kimana vangu diadi dialembi fwasa ngindu, ntima yo longo lwame.” Antonio watambula lusadisu kavuanga o mfunu mu sunda e fu kiaki kiambi. Ediadi dikunsadisanga mu venga mpasi zayingi.

Kieleka, Nkand’a Nzambi uvuidi malongi mayingi malenda kutusadisa mu venga e mpasi. Adieyi tulenda vanga avo e mpasi zeto ke zifokokanga ko? Yambula twazaya una Diambu dia Nzambi dilenda kutusadisila mu singika mambu mama mampasi.