Rose wavova vo: “Kimbevo kiangolo inuananga kiau kikuntwasila mpasi zayingi. E zingu kiame kiafwasakana kikilu.” E diambu diatoma kuntokanesanga i dia sia vo kalendanga diaka sia sungididi ko muna longi dia Nkand’a Nzambi ye muna salu ya mwanda. Kansi, e mvovo mia Yesu miasonama muna Matai 19:26 miansadisa kikilu. E sono kiaki kivovanga vo: “Kuna kwa Nzambi, mawonso melendakana.” Rose walongoka vo vena ye mpila zayingi za longokela. Wau vo ezak’e ntangwa diampasi dikalanga muna tanga mu kuma kia kimbevo, wayantika wá e áudio za Nkand’a Nzambi ye za nkanda mieto. * Wavova vo: “Kondwa kwa nkubika zazi, kize ko dina yadi vanga mu siamisa kikundi kiame yo Nzambi.”

Vava Rose kekalanga wakendalala wau vo ke lendanga diaka vanga mawonso ko kavanganga, ofiaulwiswanga kwa mvovo mina muna sono kia 2 Korinto 8:12 kivovanga vo: “Kadi avo luzolo lwa vana luna vo, ditondakana kwa Nzambi, musungula avo muntu ovanini mun’owu wa kina kena kiau, ke mun’owu wa kondwa ko.” E mvovo miami misungamesanga Rose vo Nzambi oyangalelanga e ngolo kevanganga, kadi ovanganga mana kalenda kana una vo onuananga ye mpasi.

Delfina ona tuyikidi kala, osungamenanga vo:  “Vava mwan’ame wa mvu 18 kafwa, kiakwikilanga ko vo ndenda kwamanana zinga wau vo ntantu zayingi yamonanga. E zingu kiame kiasoba emvimba.” Kansi, e mvovo miasonama muna Nkunga 94:19 miamfiaulwisa kikilu. Ntozi a nkunga wavova kwa Nzambi vo: “E ntelamw’a moyo vava unkosomwene, Ngeye umfiaulwisi yo kumpuvika.” Wavova vo: “Yasamba kwa Yave kimana kansadisa yazaya dina ndenda vanga mu kulula e ntantu.”

Wakivana muna salu kia sadisa wantu. Kuna kwalanda, wayantika kuyitezanesa ye mpemba. Kana nkutu itolokele, ilenda kwamanana sadilwa muna soneka. Diau dimosi, kana una vo wanuananga ye lukendalalu, wabakula vo olenda vanga diambu muna sadisa akaka. Wavova vo: “Vava yasadilanga nkanikinu mia Nkand’a Nzambi mu fiaulwisa alongoki ame a Nkand’a Nzambi, yabakula vo eyayi i mpila ina Yave kasadilanga muna kumpuvika o ntima yo kumfiaulwisa.” Wasoneka e nkumbu za wantu beyikwanga muna Nkand’a Nzambi ana banuananga ye ntantu. Wakudikila vo: “O wantu awaya awonso fu kia samba bakala kiau.” Walongoka mpe vo “muna zizidila e mpasi, o muntu kafwete tanganga Nkand’a Nzambi.”

Delfina diambu diankaka kalongoka vava katanganga Nkand’a Nzambi. Walongoka o mfunu wa yindula e zingu kia kusentu, vana fulu kia sia sungididi muna mambu mavioka. E vuvu kiyikwanga muna Mavangu 24:15 kiamfiaulwisa kikilu. E sono kiaki kivovanga vo: “Vekala yo lufuluku lwa ansongi ye awana balembi songa.” Nkia ziku kena kiau vo Yave osinga fula o mwan’andi? Tala dina Delfina kavova: “Ngina ye vuvu kia monana diaka yo mwan’ame muna ntangwa ina kasikidisa o Yave. Iyindulanga e lumbu isinga vuanda yandi vana yanzala kia nzo eto yo kunsonga o zola nze kuna yansonga vava kawutuka.”