EKWE VUVU KIAMBOTE! O Mvangi eto wasia nsilu wakutuvana moyo a mvu ya mvu vava ntoto. Kansi, ayingi bemonanga vo diampasi mu kwikila muna diambu diadi. Bevovanga vo, ‘wantu awonso fwa befwa.’ ‘Ozinga yo fwa, i mpila twavangilwa.’ Akaka beyindulanga vo wantu balenda zinga yakwele mvu kansi ke vava ntoto ko. Bevovanga vo muna vua moyo a mvu ya mvu, muntu kafwete fwa yo kwenda kuna zulu. Adieyi obenze?

Vitila wavana e mvutu muna kiuvu kiaki, badikila e mvutu za Nkand’a Nzambi muna yuvu yayi tatu ilende: E mpila kavangilwa o muntu aweyi isongelanga e kolo kina kafwete zinga? Adieyi i kani dia Nzambi mu kuma kia wantu ye ntoto tuka kuna lubantiku? Aweyi lufwa lwakotela muna kanda dia wantu?

Muna vangwa yawonso Nzambi kavanga ova ntoto, o wantu i yau basundidi. Mu nkia mpila? Nkand’a Nzambi uvovanga vo wantu kaka bavangilwa muna “mpwa” ye “fwaniswa” kia Nzambi. (Etuku 1:26, 27) Ediadi, aweyi disongele? Disongele vo wantu bavangwa muna mpwa ye fu ya Nzambi nze zola ye unsongi.

Vana ntandu, wantu bavangwa ye ngangu za zaya swaswanesa e mbote ye mbi yo kala ye ngwizani yambote yo Nzambi. Kiaki i kuma tuyangalelanga o nene wa nsema, sivika e lekwa yavangwa, bandula, yangalela miziki ye yingana. Vana ntandu a mama mawonso, wantu kaka bavewa e ngangu za sambila o Mvangi. Mawonso mama, meswaswanesanga wantu ye vangwa yankaka ova ntoto.

Yindula edi: Nga Nzambi wadi vanga wantu ye fu yamfunu yo kubavana e ndekwa za yima yo tomesa e fu yayi, kele vo kazola vo twazinga kaka mvu miakete? Ve. Kieleka, Nzambi wavanga wantu ye fu yayi yamfunu ye ndekwa kimana twakala ye kiese kia zinga yakwele mvu vava ntoto.

Ankaka bevovanga vo Nzambi kakana ko vo wantu bazinga ova ntoto yakwele mvu. Bevovanga vo ntoto wavangwa kimana wakala se nzo yaviokela ye fulu kia tontela wantu mu zaya kana nani ofwanukini kwenda kuna zulu yo zinga yo Nzambi yakwele mvu. Kele vo diambu diadi diakala dialudi, nga Nzambi kadi kala nkwa kuma ko muna umpumbulu wawonso ye mambu mambi masakidi  va nza? E ngindu zazi ke zina ngwizani ko ye mpila muntu kena o Nzambi. Mu kuma kiandi Nkand’a Nzambi uvovanga: “Kadi ngyenda zandi zawonso zansongi. O Nzambi nkwa ziku yo kondw’o vilwa, wansongi kwandi yo singama.”—Nsiku 32:4.

Nkand’a Nzambi utoma kiesesanga e kani dia Nzambi tuka kuna lubantiku mu kuma kia ntoto muna mvovo emi: “Ezulu i’zulu dia Yave; vo i nza, i kavana kwa wan’a wantu.” (Nkunga 115:16) Dialudi, Nzambi wasema ntoto kimana wakala se nzo ya wantu yakwele mvu, wazadisa wo ye lekwa yawonso tuvuanga mfunu kimana twakala ye zingu kiakiese ye kiakwele mvu.—Etuku 2:8, 9.

“Ezulu i’zulu dia Yave; vo i nza, i kavana kwa wan’a wantu.”—Nkunga 115:16.

O Nkand’a Nzambi utoma kiesesanga mpe e kani dia Nzambi mu kuma kia wantu. Nzambi wakanikina yakala diantete ye nkaz’andi vo: ‘Bazadisa e nza, bayala yo; bayala . . . ma yawonso yamoyo iyatatanga ova ntoto.’ (Etuku 1:28) Ekwe lau diambote bakala diau dialunga-lunga yo sayanesa e paradiso mu nza yawonso! Dialudi, e vuvu bakala kiau Adami yo Eva yo wana badi wuta i zinga yakwele mvu ova ntoto, ke nsendo wa kwenda ku zulu ko.

Ozevo, ekuma tufwilanga? O Nkand’a Nzambi usonganga vo mosi muna vangwa ya mianda ya Nzambi, ona wazayakana se nkolami wa Satana wa Nkadi ampemba, wavava fungisa nkubika za Nzambi muna Edene. Mu nkia mpila?

Satana wavukumuna mase meto mantete, Adami yo Eva kimana banyikama muna kolamena Nzambi. Vava Satana kavova vo Nzambi lekwa kiambote kabaswekanga, i sia vo, nswa wakuyisolela edi diambote y’edi diambi, oyau bayikama Satana yo kolamena Nzambi. Nkia mfwilu diatwasa? Kuna kwalanda bafwa wauna Nzambi kavova. Bavidisa e vuvu kia zinga yakwele mvu muna paradiso ova ntoto.—Etuku 2:17; 3:1-6; 5:5.

Ukolami wa Adami yo Eva watwasa mfwilu kwa wantu awonso yamu unu kiaki. Nkand’a Nzambi uvovanga vo: “Wauna e sumu diakotela ova nza muna muntu mosi [Adami], o lufwa mpe muna sumu, i nsayana lwasayana o lufwa kwa wantu awonso.” (Roma 5:12) Oyeto tufwanga mu kuma kia sumu yo lufwa twasambukila kwa mase meto mantete, ke mu sia ko vo i ‘lukanu’ lwa Nzambi.

O ukolami muna Edene ke wafungisa kani dia Nzambi ko mu kuma kia wantu ye ntoto. O zola kwa Nzambi yo unsongi wandi wamfila mu teta nzila mu kutuvevola muna ubundu wa sumu ye lufwa twasambukila. Ntumwa Paulu wasasila vo: “O mfutu a sumu i lufwa, kansi o lukau lwa Nzambi i moyo a mvu ya mvu muna Kristu Yesu wa Mfumu eto.” (Roma 6:23) Kuna zola kwawonso, Nzambi ‘wavana Mwan’andi amosi [Yesu Kristu], kimana konso on’okwikilanga muna yandi ke fwaswa ko, moyo a mvu ya mvu kevua.’ (Yoane 3:16) Muna kuyivana kuna mvevo se kimenga kia lukûlu, Yesu wakula yawonso ina Adami kavidisa. a

Ke kolo ko, nsilu wa Nzambi wakitula ntoto wawonso se paradiso ulungana. Olenda kala ye vuvu kiaki muna lemvokela luludiku olu lwa Yesu: “Nukotela muna mwelo ambatakani, kadi o mwelo wampwena ye nzila yasanzuka i yau ifilanga kuna lufwasu, ndonga bena ana bekotelanga mo; kuna diak’e sambu, o mwelo ye nzila ambatakani, i yau ifilanga ku moyo, ye akete kaka bena ana besololanga yo.” (Matai 7:13, 14) E vuvu kiaku kia kusentu, kina vana moko maku. Adieyi ovanga?