WANTU

Dina Bibila kivovanga: Nzambi “kasema [o ntoto] nkatu ko, kansi wasema wo kimana wazingilwa kwa wantu.”—YESAYA 45:18.

NTOTO

Dina Bibila kivovanga: “Mbandu ikwenda, mbandu ikwiza, kansi, o ntoto ukwamanana yakwele mvu.”—KIMPOVI 1:4.

EDIADI AWEYI DISONGELE: Mun’owu wa Bibila, o ntoto ke ufwaswa ko, ukwamanana zingilwa kwa wantu yakwele mvu. Ozevo, nki i lufwasu lwa nza?

YINDULA DIAMBU EDI: Bibila kitezanesanga lufwasu lwa nza yayi ye dina diavangama muna lumbu ya Noa. Muna kolo kiakina, o ntoto ‘wazala yo nsoki.’ (Tuku 6:13) Kansi Noa, muntu ansongi kakala. Muna kuma kiaki, Nzambi kafwasa Noa ko y’esi nzo andi, kansi wantu ambi kafwasa muna kizalu. Mu kuma kia dina diavangama muna kolo kiakina, Bibila kivovanga vo: ‘E nza ya tandu kiakina yafwaswa vava yazala yo maza.’ (2 Petelo 3:6) E sono kiaki kivovanga vo e nza yafwaswa. Kansi, nki kikilu kiafwaswa? Ke ntoto ko wafwaswa, kansi wantu ambi ova ntoto yau bafwaswa. Ozevo, vava Bibila kivovelanga lufwasu lwa nza yayi, ke kivovelanga lufwasu lwa ntoto ko. Kansi, kivovelanga lufwasu lwa wantu ambi ana bezingilanga ova nza kumosi ye nkubika zau.

MAMBU MAMPASI YE UMPUMBULU

Dina Bibila kivovanga: “Fioti kaka fisidi, yimpumbulu ke bekala diaka ko; otala vana bakala, ke bekala vo diaka ko. Kansi alembami bevua nza, bezingila muna luvuvamu ye kiese kiayingi.”—NKUNGA 37:10, 11.

EDIADI AWEYI DISONGELE: E Kizalu muna lumbu ya Noa, ke kiafokola emvimba umpumbulu ko. Vava Kizalu kiavioka, e zingu kiakituka diaka se kiampasi mu kuma kia wantu ambi. Kansi, ke kolo ko, Nzambi ofokola umpumbulu wawonso. Nze una ntozi a nkunga kavova: “Yimpumbulu ke bekala diaka ko.” Nzambi ofokola umpumbulu muna sadila Kintinu kiandi, i sia vo, luyalu lwa zulu, luna luyala ana belemvokelanga Nzambi.

YINDULA DIAMBU EDI: Nga ayadi a nza yayi, betambulwila luyalu lwa Kintinu kia Nzambi? Bibila kivovanga vo, ke betambulwila ko. Diankenda vo, Kintinu kia Nzambi betelamena. (Nkunga 2:2) Nkia diambu dikubabwila? E Kintinu kia Nzambi kivinga vana fulu kia ayadi awonso a nza ye “kiau kaka kiyala yakwele mvu.” (Daniele 2:44) Kansi, ekuma ayadi a nza yayi bafwete fwasilwa?

Dina Bibila kivovanga: “O muntu kalendi singika e ntambi zandi ko.”—YEREMIYA 10:23.

EDIADI AWEYI DISONGELE: O wantu ke bavangwa ko muna kukiyala. Muna kuma kiaki, ke belendanga yala akwau wantu ko ngatu singika e mambu mau.

YINDULA DIAMBU EDI: Nkanda mosi uvovanga vo, e mpila e nza inina ye ayadi ayingi, ke dilendakana ko mu fokola “e mambu mampasi metokanesanga e nza yawonso nze usukami, nzala, mayela, sumbula, vita ye umpumbulu.” Nkanda wau uvovanga mpe vo: “Akaka . . . bekwikilanga vo, avo vakedi luyalu lumosi kaka omu nza yawonso, dilendakana mu singika e mambu mama mampasi tuyikidi.” Kansi, kana nkutu vo ayadi awonso a nza batondele ngindu zazi, e nza ikwamanana kaka yalwa kwa wantu alembi lunga, ana ke balendi fokola mambu mampasi ko. Ozevo, Kintinu kia Nzambi kaka kina ye wisa kia fokola emvimba mambu mawonso mampasi ova nza.

Muna kuma kiaki, mun’owu wa Bibila, wantu ambote ke bena ye kuma ko kiakala yo wonga wa lufwasu lwa nza yayi, i sia vo, lufwasu lwa tandu kiaki kiambi. Ediadi i diambu tulakukilanga o moyo, kadi e nz’ampa ina Nzambi kesianga o nsilu ivinga vana fulu kia nza yayi yambi.

Nkia ntangwa divangama e diambu diadi? E Bibila kivana e mvutu za kiuvu kiaki muna longi dilanda.