Ku mbanz’a Mulhouse yawutukila, kuna node ya França. Mbanza ya usukami, yatoma zayakana mu kuma kia mavangu ma nsoki. Nkumbu miayingi yamonanga wantu banwananga vava yakala nleke. Muna nzo eto, akento ke bazitiswanga ko, ke bakala ye nswa wasonga ngindu zau ko vava nzengo zabakwanga. Yavoveswa vo e salu kia akento i lamba yo lunga-lunga yakala yo wana.

E nsansuk’ame yampasi yakala. Vava yakala ye mvu 10, se diame wafwa mu kuma kia kolwa malavu. Vioka mvu tanu, mosi muna mpangi zame wakivonda. Muna mvu wauna, yamona muntu mosi wavonda o nkwandi vava banwananga, ediadi diankendeleka kibeni. E yitu yame bandonga una ndenda sadila mbele ye nkele muna nuana. Kuna kwalanda, yayantika vangisa tatuagem mu nitu yo nua malavu.

Vava yalungisa mvu 16, konso lumbu yayantika nua ntutu 10 yovo 15 mia malavu, yanuanga mpe droga. Muna lenda sumba e lekwa yayi, yatekanga sengwa yankulu yo yiba. Vava yakala ye mvu 17 yasiwa muna boloko. Nkumbu 18 yasiwa mu pelezo mu kuma kia yiba ye mavangu ma nsoki.

Vava yaviokesa e mvu 20, e zingu kiame kiatoma beba. Konso lumbu diamba diayingi yanuanga ye fomo zankaka zangolo. Nkumbu miayingi, yayenda fulukilanga kuna lupitalu. Yayantika teka droga, muna kuma kiaki yakangalanga ye nkele ye mbele. Lumbu kimosi, yanonga yakala dimosi, kansi luvunza lwavakama vana sengwa kia mponda andi. Vava yalungisa mvu 24, ngudi ame wafwa, ediadi diasakisa nganzi zame. Wantu vava bambonanga batinanga muna nzila mu kuma kia wonga. Mu kuma kia nuana, nkumbu miayingi yasiwanga muna boloko yovo kwenda ku lupitalu muna wukisa mputa zame.

Vava yalungisa mvu 28, yakazala. Kiazitisanga nkaz’ame ko ngatu kunsonga zola. Yamfinganga yo kunwanda. Ka twawizananga ko. Yayindulanga vo e nlunga ye nsanga mia ngiya yamvananga miafwana kwandi. I bosi, vabwa diambu diakinsalukisa. Nkaz’ame wayantika longoka Nkand’a Nzambi ye Mbangi za Yave. Vava kalongoka mu nkumbu antete, wayambula nua fomo, wayambula mpe tambula e nzimbu ye lekwa yankaka yayiyanga. Wavutula lekwa yawonso ya ngiya yamvana. Muna kuma kiaki, yafwema kikilu. Yayantika  kumbangika yo kumvemona mwisi a fomo vana mpolo. Yamfusulwisanga e nsoni muna mbanz’eto yawonso.

Fuku umosi vava yakolwa malavu, yayoka nzo twazingilanga. Nkaz’ame wankoka ku mbazi yo vaikisa mwan’eto ankento wakala ye mvu 5. Vava o zayi wame wavutuka, yayantika kukitumba. Yamona vo Nzambi kalendi loloka masumu mame ko. Isungamenanga lumbu kimosi vava o mpelo mosi kavova vo e yimpumbulu ku bilungi bekwendanga. O dotolo diame mpe wampovesa vo: “Ku soba diaka ko! Ke vena muntu ko olenda kusadisa.”

Vava e nzo eto yavia twayenda zingila kuna nzo a nzitu ame. Vava Mbangi za Yave bayenda kingula o nkaz’ame yabayuvula: “Nga o Nzambi olenda loloka masumu mame?” Bansonga sono kia 1 Korinto 6:9-11. E sono kiaki kivovelanga mavangu Nzambi kemenganga i bosi, kikudikilanga vo: “Akaka muna yeno i wau nwakala.” E mvovo miami misonganga vo muntu olenda kwandi soba. I bosi, Mbangi za Yave bampovesa vo Nzambi okunzolanga muna kunsonga sono kia 1 Yoane 4:8. E mvovo miami miankasakesa, muna kuma kiaki yalomba kwa Mbangi za Yave bandonganga Nkand’a Nzambi nkumbu miole muna lumingu. Yayantika mpe kwenda muna tukutakanu twa Kikristu kuna Seka dia Kintinu. Nkumbu miayingi, yasambanga kwa Yave.

Vioka ngonde mosi, yayambula nua droga ye malavu. Ke kolo ko, yayantika mona nze e nitu ka yame diaka ko. Yayantika lota ndozi zambi, ntu wayantika bwanga, yabakamwanga e nkatanga ye ndunzi zankaka mu kuma kialembi nua droga ye malavu. Kansi, yabakula vo Yave wansadisanga ye kunsiamisa. Yakimwena nze Paulu wa ntumwa. Mu kuma kia lusadisu kavanwa kwa Nzambi, Paulu wasoneka vo: “Muna mambu mawonso ngina ye nkuma muna ndiona okunkumikanga.” (Filipi 4:13) Kuna kwalanda, yayambula mpe nua fomo.—2 Korinto 7:1.

E longi dia Nkand’a Nzambi diansadisa muna singika zingu kiame ye kia nzo ame. Yasoba e mpila yakadilanga yo nkaz’ame. Yayantika kunzitisa, “kunlomba e ndoloki yo kuntonda.” Yakituka mpe se diambote. Vioka mvu umosi vava yayantika longoka Nkand’a Nzambi, yayekola zingu kiame kwa Yave yo vubwa muna landa e mbandu a nkaz’ame.

Ngina ye ziku vo e longi dia Nkand’a Nzambi diavuluza moyo ame. Kana nkutu mpangi zame bena vo ke Mbangi za Yave ko bevovanga vo kele vo kilongoki Nkand’a Nzambi ko, nga yafwa mu kuma kia nua droga ye malavu.

E zingu kia nzo ame kiasoba mvimba mu kuma kia malongi ma Nkand’a Nzambi mesonganga e mbebe ya yakala yo se. (Efeso 5:25; 6:4) Twayantika vangila mambu kumosi. Vana fulu kiayindula vo e fulu kia nkento i kuku, ye kiese kiawonso ikunyikamanga muna salu kia ntangwa ke ntangwa kia sila umbangi. Yandi mpe una ye kiese kia kungikama mu salu kiame kia kikuluntu muna nkutakani.

E nkenda za Yave wa Nzambi yo zola kwandi kwasimba kikilu ntim’ame. Ngina ye kiese kiayingi mu zayisa e fu yandi kwa awana bebadikilwanga vo ke besoba diaka ko. Nzeye wo vo Nkand’a Nzambi una yo nkuma wasadisa konso muntu ozolele kala ye zingu kiavelela. Nkand’a Nzambi ke ukunsadisanga kaka ko mu zitisa yo zola akaka, kansi ukunsadisanga mpe muna kuyizitisa.