YINDULA vo video otalanga ya muntu otomene zayakana, nanga nyimbidi otoma zolanga. E video yayi iyantikilanga muna mambu kavanga muna kileke, vava kalongokanga sika e miziki. I bosi, o nyimbidi ndioyu oyantikidi kwenda yimbidila mu maseka mampwena, kangala mu nsi zayingi yo zayakana mu nza yawonso. Kuna mfoko a video, o nyimbidi okitukidi se nunu, i bosi ofwidi.

E video yayi ke mpasi lusansu ko, ya muntu ona wazinga kala, kansi kuna kwalanda wafwa. Kiakala vo muntu nyimbidi kakala, nkwa ngangu, mbudi a somba yovo muntu ankaka otomene zayakana, diau dimosi dibwilanga wantu awonso. Dilenda kala vo muntu mayingi kavanga, kansi se yindula mana kadi vanga kele vo kanuni ko yo fwa?

Diankenda kikilu mu zaya vo lufwa lulenda kutulwakila konso ntangwa. (Kimpovi 9:5) Kana nkutu nkia ngolo tuvanga, ke tulendi tina kinunu ko ngatu lufwa. Vana ntandu, e zingu kieto kilenda suka mu kuma kia sumbula yovo kimbevo kiangolo. Nze una wasonama muna Nkand’a Nzambi, yeto wantu tuna nze “mbungezi ina imonekene mu kolo kiandwelo, i bosi ivempokele kwandi.”—Yakobo 4:14.

Kuna kwa wantu ankaka, wau vo bazeye wo vo balenda fwa kuna kinsalukisa, belandanga e mpil’a zingu kia sia vo “yambula twadia yo nua, kadi o mbazi fwa tufwa.” (1 Korinto 15:32) Kansi, o wantu belandanga e ngindu zazi kadi ke bena ye vuvu kiasikila ko kia kusentu ye bazeye wo vo balenda fwa konso ntangwa. Vekala ye ntangwa, musungula muna ntangw’a mpasi, tulenda kukiyuvula vo: “Nga ekiaki i zingu emvimba?” Akweyi tulenda bakila e mvutu za kiuvu kiaki?

O unu, ayingi bevavilanga e mvutu muna ngangu za nza. Akwa ngangu za mawuku besololanga lekwa ilenda kutusadisa mu zinga mvu miayingi. Ayingi muna akwa ngangu bevanganga e ngolo mu solola e nlongo milenda sadisa wantu mu kudikila e mvu mia zingu. Kana una vo ngolo zayingi bevanganga, o wantu bakinu kukiyuvula: Ekuma tununinanga yo fwa? Nga vekala ye ntangwa lufwa lusinga fokoka? Malongi melanda mevovela mambu mama yo vana e mvutu za kiuvu eki: Nga ekiaki i zingu emvimba?