Nzambi Watuvanga Kimana Twazinga Yakwele Mvu
NANI mu yeto kazolele kala ye zingu kiakiese ko yakwele mvu? Yindula una wadi kala e zingu kieto kele vo twazinganga yakwele mvu kondwa kwa mpasi ye mayela! Ntangwa yayingi twadi kala yau ya kala vamosi ye azolw’eto, kangala mu fulu yayingi, longoka umbangu wampa, wokesa e ngangu zeto yo longoka salu yayingi tuzolanga.
Nga eyayi ndozi ankatu? Ve. O Nkand’a Nzambi uvovanga vo Nzambi wasia e ngindu za zinga yakwele mvu muna ntima mieto. (Kimpovi 3:11) Nkand’a Nzambi uvovanga mpe vo “Nzambi i zola.” (1 Yoane 4:8) Wau vo Nzambi otoma kutuzolanga, kadi sia ngindu za zinga yakwele mvu ko muna ntima mieto kele vo ke dilendakana ko.
Kieleka, o lufwa ke nkundi ko. Nkand’a Nzambi uyikilanga lufwa vo “mbeni.” (1 Korinto 15:26) Ayingi befwanga muna kileke, akaka belwakanga yamuna kinunu. Kansi, yeto awonso fwa kaka tufwa. Wantu ayingi ke bezolanga yindula diambu diadi ko, akaka wonga bemonanga. Nga vekala ye ntangwa o mbeni ndioyu kesinga sundwa? Nga vangama kikilu divangama?
EKUMA TUFWETE KADILA YE VUVU?
Nga diasivi kwa ngeye mu zaya vo Nzambi kakana ko vo wantu bafwanga? O Nkanda Etuku usonganga e ziku vo Nzambi wavanga wantu kimana bazinga yakwele mvu ova ntoto. Yave wa Nzambi wavanga o ntoto kumosi ye lekwa yawonso ina wantu bevua o mfunu muna zinga yo kala ye kiese. I bosi, wavanga muntu antete, Adami, yo kunsia muna paradiso, kuna mpatu ya Edene. Kuna kwalanda, ‘Nzambi wamona vo yawonso kavanga, yambote kikilu.’—Etuku 1:26, 31.
Adami muntu alunga kakala vava kavangwa, muna mpw’a Nzambi kavangilwa. (Nsiku 32:4) Eva wa nkaz’a Adami mpe walunga kakala muna ngindu ye muna nitu. Yave wabavovesa vo: “Nuwutana, nuwokela, nulungila nza, nukulula yo; nuyala mbizi za kalunga, ye nuni z’ezulu, ye ma yawonso yamoyo iyatatang’ova ntoto.”—Etuku 1:28.
Ntangwa diavavanga kwa Adami yo Eva muna wuta wana yo zadisa e nza. Eva wadi wuta wana, o wan’au mpe badi wutana yavana e nza yawonso yadi zala yo wantu nze una Nzambi kakana. (Yesaya 45:18) Nga Yave wadi vovesa Adami yo Eva vo bawutana kele vo mvu miakete kaka badi zinga vamosi yo wana ye atekelo au?
Yindula mpe kiyekwa kabavana kia lunga-lunga e bulu yawonso. Adami wavewa kiyekwa kia vana e nkumbu kwa bulu. Ediadi ntangwa yayingi diavavanga. (Etuku 2:19) Kansi, muna yala e bulu yawonso diavavanga vo kateka longoka mu kuma kia bulu yayi kimana kazaya una kalenda kubalunga-lungila. Ediadi ntangwa yayingi diadi vava lutila nkutu e ntangwa kadi viokesa muna kubavana e nkumbu.
Muna kuma kiaki, o luludiku kavana o Nzambi lwa zadisa e nza yo yala e bulu yawonso lusonganga vo Adami yo Eva bavangwa kimana bazinga yakwele mvu. Lusansu lusonganga vo Adami mvu miayingi kikilu kazinga.
NZAMBI WAKANA VO WANTU BAZINGA YAKWELE MVU MUNA PARADISO OVA NTOTO
WANTU ANA BAZINGA MVU MIAYINGI KIKILU
Adami: 930 ma mvu
Metuselake: 969 dia mvu
Noa: 950 za mvu
O unu: 70-80 lwa mvu
Nkand’a Nzambi usonganga vo kuna lubantiku, wantu mvu miayingi kikilu bazinganga, lutila e mvu tuzinganga o unu. Nkand’a Nzambi uvovanga vo: “E mvu miawonso mia Adami nkama vwa yo makumatatu.” I bosi, uyikanga wantu sambanu ana bazinga vioka 900 za mvu! Wantu awaya i Sete, Enose, Kenani, Yaredi, Metuselake yo Noa. Yau awonso bazinga vitila Kizalu kia lumbu ya Noa. Vitila Kizalu kiza, Noa wazinga 600 za mvu. (Etuku 5:5-27; 7:6; 9:29) Ekuma wantu awaya bazingila mvu miayingi?
O wantu awaya bazinga lukufi ye kolo kina Adami yo Eva bakala ye zingu kialunga. Nanga ekiaki i kuma bazingila mvu miayingi. Nkia ngwizani ina vana vena kimuntu kialunga yo zinga yakwele mvu? Aweyi lufwa lusinga sundilwa? Muna zaya e mvutu za yuvu yayi, entete tufwete zaya e kuma tununinanga yo fwa.