Nkand’a Nzambi uvovanga vo: “Yambula e zingu kieno kiakondwa zola muna nzimbu, nuyangalelanga ina nuna yau.”—Ayibere 13:5.

O unu, wantu bekutukasakesanga mu sumba lekwa yayingi. Kansi, Nkand’a Nzambi uvovanga vo ‘twayangalela ina tuna yau.’ Aweyi tulenda wo vangila?

Venga “zola nzimbu.” Wantu besianga zingu kiau mu vonza, bebembolanga esi nzo zau, akundi, befwasanga e fu yau yambote yo kulula zitu wau mu kuma kia “zola nzimbu.” (1 Timoteo 6:10) Kieleka, o zola nzimbu mfwilu miayingi ditwasanga! E ziku kia diambu i kiaki: Ndiona ozolanga mavua ‘ke yukutanga mo ko.’—Kimpovi 5:10.

Zolanga wantu, ke mu lekwa ko. Dialudi vo mavua mfunu mena. Kansi, e lekwa ke ilendi kutusonga zola ko, wantu kaka balenda wo vanga. O kala yo ‘nkundi akieleka’ kiese dikututwasilanga muna zingu.—Ngana 17:17.

Nkand’a Nzambi uvovanga vo: “O ntim’a kiese, nlongo miambote.”—Ngana 17:22.

Nze nlongo miambote, e kiese kilenda kutusadisa mu zizidila e mpasi za mayela. Kansi, aweyi tulenda kadila ye kiese avo kimbevo tuna kiau?

Yangalelanga ina una yau. Avo tusidi kaka e ngindu muna mpasi zeto, “e lumbu yawonso” yambi ikala. (Ngana 15:15) Nkand’a Nzambi uvovanga vo: “Nuvutulanga o matondo.” (Kolosai 3:15) Vutulanga matondo muna lekwa yambote una yau muna zingu, kana nkutu lekwa yakete. E mambu nze ndimuk’a ntangwa, mupepe wa kiozi, tusevo twa nkundi yovo yitu kieto malenda wokesa kiese muna zingu.

Sadisanga akaka. Kana nkutu vo vimpi weto ke una kiambote ko, Nkand’a Nzambi uvovanga vo “edi disundidi e kiese dia vana, ke mu tambula ko.” (Mavangu 20:35) Vava akaka bekutuvutulanga matondo mu kuma kia diambu diambote tubavangidi, e kiese kieto kiwokelanga. Ediadi dikutusadisanga mu lembi sia e sungididi kiasaka muna mpasi zeto. Tulenda kitula e zingu kieto kiakiese vava tusadisanga akaka mu kala ye zingu kiakiese.

Nkand’a Nzambi uvovanga vo: ‘Nuzaya oma masundidi o mfunu.’—Filipi 1:10.

Akazi ana ke bevaulanga ntangwa ko mu kala vamosi balenda sia longo lwau mu vonza. Muna kuma kiaki, diangangu kwa yakala yo nkento mu sianga longo lwau va fulu kiantete kadi dimosi muna mambu masundidi o mfunu muna zingu.

Nusalanga entwadi. Vana fulu kia sianga e zolela yaku vana fulu kiantete, diambote nuavanganga e nkubika ya salanga entwadi. Nkand’a Nzambi uvovanga vo: ‘O nwole usundidi o mosi.’ (Kimpovi 4:9) Nulenda lamba madia kumosi, sukula malonga yovo kwenda kingula yitu kumosi.

Songanga o zola kwa nkaz’aku. Nkand’a Nzambi ukasakesanga akazi mu songaziana o zola yo luzitu. (Efeso 5:28, 33) O sevesa nkaz’aku, kumbimbakana yovo kumvana lukau dilenda siamisa zola muna longo lweno. O yakala yovo nkento kafwete lungisanga kaka e nsatu zandi za vukana yo nkaz’andi.—Ayibere 13:4.