Nzambi wasia nsilu kwa Abarayama wa ngunza vo osadila mosi muna mbongo andi muna twasa e nsambu kwa “zula yawonso ova ntoto.” (Tuku 22:18) Nani i muntu ndioyu?

Se vioka 2.000 ma mvu, Nzambi wavana kwa Yesu una vo mbongo a Abarayama o nkuma wa vanga masivi. E masivi kavanga masonga vo muna Yesu o Nzambi i kelungisila o nsilu kasila Abarayama wa sambula e zula.—Ngalatia 3:14.

E masivi kavanga o Yesu masonga vo yandi i muntu ona Nzambi kasola muna sambula o wantu. Masonga mpe e mpila ina Nzambi kekunsadila muna sambula o wantu yakwele mvu. Tala una masivi ma Yesu masongela e fu yandi.

Nkwa Ngemba—Yesu wawuka e mbevo.

Lumbu kimosi, nkwa wazi mosi wadodokela Yesu kimana kanwuka. Yesu wansimba yo kumvovesa vo: “Nzolele wo!” Vana vau o wazi wakatuka.—Maku 1:40-42.

Wakayilanga akaka—Yesu wadikila mimfwa nzala.

Yesu kasindikanga wantu ko ye nzala zau. Nkumbu miayingi, Yesu wavanganga masivi muna sadila mbolo ye mbizi za maza zakete mu dikila ulolo wa wantu. (Matai 14:17-21; 15:32-38) Kuna mfoko, awonso bayukutanga yo suvisa ulolo wa madia.

Nkwa nkenda—Yesu wafula mafwa.

E “nkenda” zafila Yesu mu futumuna mwan’a mosi kaka wa nkento wafwilwa o yakala, ona kakala diaka yo muntu ko muna kunlunga-lunga.—Luka 7:12-15.