Aweyi Tulenda Songela Zola kwa Akaka?
Wau vo tu wan’a Adami, yeto awonso tu kanda dimosi. Divavanga vo awana bawutuka mu vumu kimosi basongaziananga o zola ye luzitu. Kansi, o zola kwaku ke kumonekanga ko. Ediadi ke diau ko Nzambi eto anzodi kazolele.
DINA SONO YAVAUKA IVOVANGA MU KUMA KIA ZOLA
“Ofwete zola o nkwaku wauna okuyizolelanga.”—LEVITIKU 19:18.
“Nukwamanana zola e mbeni zeno.”—MATAI 5:44.
O SONGA O ZOLA KWA AKAKA AWEYI DISONGELE?
Tala una Nzambi keyikilanga o zola muna Diambu diandi. Muna 1 Korinto 13:4-7 tutanganga vo:
“O zola kuna yo luzindalalu ye ngemba.”
Badika e diambu edi: Aweyi omonanga vava akaka bekadilanga yaku kuna luzindalalu ye ngemba yo lembi kufungila makasi vava ovanganga e vilwa?
“O zola ke kwina ye kimpala ko.”
Badika e diambu edi: Aweyi omonanga avo akaka ke bekubundanga vuvu ko yo kumwena e kimpala?
O zola “ke kuvavanga wete wa yandi kibeni ko.”
Badika e diambu edi: Aweyi omonanga vava akaka bezitisanga e ngindu zaku yo lembi siandama kaka muna ngindu zau?
O zola “ke kubadikanga mbi ko.”
Badika e diambu edi: Nzambi una ye tima dia loloka awana besumukanga yo viluka kikilu o ntima. “Ke kwamanana kututumba ko, ngatu funga makasi yakwele mvu.” (Nkunga 103:9) Tuyangalalanga vava tulolokwanga kwa muntu tuvangidi e mbi. Muna kuma kiaki, tufwete kalanga twakubama muna loloka akaka vava bekutuvanganga e mbi.—Nkunga 86:5.
O zola “ke kumwena vilwa kiese ko.”
Badika e diambu edi: Avo diambu diambi ditubwididi, ke tuzolanga ko vo akaka bayangalela e mpasi zeto. Muna kuma kiaki, ke tufwete yangalelanga e mpasi za akaka ko, kana nkutu vo diambu diambi batuvanga.
Muna vua nsambu za Nzambi, tufwete zolanga akaka lembi tala ntela, nsi ye dibundu diau. E mpila yambote tulenda songela o zola i sadisanga akaka.
