Vava Mvangi eto kasema o wantu, wasadilanga ambasi ye angunza muna mokena yau. I bosi, wabaka e nzengo za sonekesa e nsangu ye nsilu miandi muna nkanda. Nzambi watusia nsilu vo tulenda kala ye zingu kiakiese kuna sentu. Muna kuma kiaki, akweyi olenda sololwela e nsilu mia Nzambi o unu?

O unu, tulenda solola e nsangu za Nzambi muna Sono Yavauka. (2 Timoteo 3:16) Aweyi Nzambi kasadila angunza muna soneka e nsangu zandi? (2 Petelo 1:21) Nzambi wasia e ngindu zandi muna nyindu mia wantu ana basoneka zo. Muna bong’e nona: Yindula vo mfumu a salu olombele kwa nsoneki andi kasoneka o nkanda. Tulenda vova ye ziku kiawonso vo nkanda wau wa mfumu a salu kadi e ngindu i zandi. Diau dimosi mpe, kana una vo Nzambi wasadila wantu mu soneka e nsangu zandi, yandi kikilu i Nsonekesi a Sono Yavelela.

E nsangu kasonekesa o Nzambi zamfunu kikilu, ekiaki i kuma kazolele vo wantu awonso batanganga yo bakula zo. O unu e “nsangu zambote” za mvu ya mvu zilenda tangwa kwa ‘zula yawonso, makanda ye ndinga.’ (Lusengomono 14:6) Muna lusadisu lwa Nzambi, e Sono Yavelela yawonso yovo ndambu isekolwanga mu vioka 3.000 ma ndinga. Ke vena nkanda wankaka ko ova nza usekwelo kala mu ndinga zayingi.