Nkand’a Nzambi usundidi nkanda miawonso mia mabundu. Ke vena nkanda wankaka ko usobanga e ngindu za wantu mu kuma kia Nzambi tuka kuna nz’ankulu. Nkand’a Nzambi i nkanda ufimpwangwa ye sungididi kiawonso, kansi i wau mpe o wantu betoma vezanga.

Muna bong’e nona, akwa ngangu bekatikisanga kana vo mambu masonama muna Nkand’a Nzambi tuna miau o unu, betela mena ye sono yankulu. Tata nlongi mosi wavova vo: “Ke tuna ye ziku ko kisonganga vo e sono yankulu, yasekolwa kikilu una ufwene. Nkand’a Nzambi tuna miau o unu miazala ye vilwa, miazala ye mambu ke mena muna sono yankulu ko, miaswaswana mu mambu mayingi.”

Akaka befidisanga Nkand’a Nzambi e mpaka mu kuma kia mambu belongwanga muna mabundu mau. Faizal, wasanswa kwa mase ke mekwikilanga mu Yesu ko, banlonga vo Nkand’a Nzambi wavauka, kansi mambu mena mo masobwa. Muna kuma kiaki, Faizal wavova vo: “Kiatondanga ko vava o wantu bazolanga mokena yame o mambu ma Nkand’a Nzambi. Kadi ke bakalanga yo Nkand’a Nzambi wankulu ko. Kuna kwa mono Nkand’a Nzambi wasobwa mambu.”

Nga o mambu mena muna Nkand’a Nzambi sobwa kikilu masobwa? Toma yindula e yuvu eyi: Nga olenda kwikila muna nsilu mia Nkand’a Nzambi lembi zaya kana vo e nsilu miami miasonama kikilu muna sono yankulu e? (Roma 15:4) Kele vo e Nkand’a Nzambi tuna miau o unu ngindu za wantu kwandi zasonama mo, nga wadi lemvokela nkanikinu mia Nkand’a Nzambi vava obakanga e nzengo mu kuma kia salu, esi nzo aku ye nsambil’aku?

Kana una vo e sono yasonekwa kwa ngunza ye ntumwa, yavila, vena ye sono yankulu yabandulwa mu moko. Aweyi e sono yayi yalembi fusila, fukiswa yo lembi sobwa mambu? Wau vo Nkand’a Nzambi ke wafukiswa ko, aweyi disadisidi mu kwikila vo Nkand’a Nzambi waludi kikilu? Tanga e mvutu za yuvu yayi muna malongi malende, wazaya o lusansu lusonganga una Nkand’a Nzambi wavulukila vana moko ma mbeni.