Nga una ye vuvu vo e nsilu miawonso mia Nzambi milungana? Yesu wakala ye vuvu kiaki, malongi mandi makumikanga lukwikilu lwa wantu bawanga mo. Yambula twavovela e nona kasadila muna Longi diandi vana Mongo, kiasonama muna Matai 5:18, oku vo: “Kieleka inuvovese wo vo, e zulu ye nza ilenda vioka, kansi kana nkutu fisono fimosi muna Nsiku ke fikatulwa ko, yavana mambu mama mawonso melungana.”

E sono kisundidi o kete muna nding’a Kiyibere i י (yod), i sono kiantete muna sono yá muna nding’a Kiyibere isunzulanga nkumbu avauka ya Nzambi, Yave. * Vana ntandu a mvovo ye sono ina muna Nsiku a Nzambi o unu, asoneki ye Afarisi babadikilanga konso “sono” vo kiazala ye nsasa.

Yesu edi kazola vova vo, e zulu yo ntoto ulenda fwaswa, kansi e sono kiakete muna Nsiku ke kilendi funga nkutu ko. Muna Nkand’a Nzambi tutanganga vo e zulu yo ntoto usikila yakwele mvu. (Nkunga 78:69) Ozevo, e mvovo mia Yesu misongele vo muna Nsiku, kana nkutu diambu diakete kwandi ke dilendi funga ko, lungana kaka dilungana.

Nga Yave wa Nzambi otokananga mu kuma kia mambu makete? Ingeta. Yambula twavovela diambu edi: Aneyisaele kuna nz’ankulu bavoveswa vo ke balendi tolola kana visi kimosi ko kia mwan’ameme dia Nduta. (Luvaiku 12:46) Diambu diakiete kwandi. Nga babakula ekuma? Nanga ke babakula ko. Yave wa Nzambi wazaya vo e diambu diadi diakete diasunzulanga ungunza mu kuma kia Masia vo, vava kevondwa vana nti a mpasi kana nkutu visi kimosi kia nitu andi ke kitololwa ko.—Nkunga 34:20; Yoane 19:31-33, 36.

Adieyi tulongokele muna mvovo mia Yesu? Oyeto mpe tulenda kala ye vuvu vo e nsilu miawonso mia Yave wa Nzambi lungana milungana, kana nkutu vo nsilu wakete kwandi. Ekwe ziku kia nkuma muna sono kiakete mu nding’a Kiyibere!