Nkand’a Nzambi ke uvovanga ko vo konso muntu ovuidi mbasi okuntaninanga. Dialudi, Yesu wavova vo: “Nuyikenga nwalembi veza mosi mun’awaya andwelo; kadi inuvovese vo e mbasi zau kuna zulu ntangwa zawonso zitalanga e ndose a Se diame una kuna zulu.” (Matai 18:10) E mvovo miami ke misongele ko vo konso muntu ovuidi mbasi okuntaninanga. Yesu wasonga vo ambasi betoma vuanga konso nlongoki o mfunu. Kansi, asambidi aludi ke bekuyisianga mu vonza ko muna yindula vo mbasi za Nzambi zikubatanina.

Nga diadi disongele vo ambasi ke besadisanga wantu ko? Ve. (Nkunga 91:11) Akaka bekwikilanga vo Nzambi osadilanga mbasi muna kubatanina yo kubavana luludiku. Kenneth ona oyikilu kala muna longi diantete, mosi muna awana bekwikilanga muna diambu diadi. Kanele vo ke tulendi wo vova ko ye ziku kiawonso, Kenneth olenda kala ye ndungidi. Mbangi za Yave nkumbu miayingi bemonanga lusadisu lwa mbasi muna salu kia samuna nsangu zambote. Kansi, wau vo mbasi ke zimonekanga ko, ke tulendi vova ko yamu nkia tezo Nzambi kekubasadilanga muna sadisa wantu muna mambu mayingi. Kana una vo i wau, ke tufwete yindulanga mu mpila yambi ko muna konso lusadisu lutukanga kwa Mpungu-ngolo.—Kolosai 3:15; Yakobo 1:17, 18.