Ndonga bekwikilanga omu nza yawonso vo Natale i lumbu kia kembelela luwutuku lwa Yesu Kristu. Kansi, nga wakiyuvula kala kana vo Akristu a tandu kiantete, ana bakalanga kumosi yo Yesu bakembelelanga Natale? Nga ozeye dina divovanga Nkand’a Nzambi mu kuma kia lumbu kia luwutuku? Ovava mvutu za yuvu yayi dilenda kutusadisa mu zaya kana vo Natale nkinzi wa Akristu.

Diantete, o Nkand’a Nzambi ke uyikanga nkinzi a luwutuku lwa Yesu ko ngatu nkinzi wa luwutuku lwa selo kiankaka kia kwikizi kia Nzambi. Wantu wole kaka beyikwanga muna Nkand’a Nzambi bakembelela lumbu kia luwutuku lwau. Ke mosi ko muna yau wasambilanga Yave wa Nzambi aludi. Muna nkinzi miau mia luwutuku mambu mambi mabwa mo. (Etuku 40:20; Maku 6:21) Landila Encyclopædia Britanica, Akristu antete bamenganga “fu kia esi zula kia kembelela lumbu kia luwutuku.”

Nkand’a Nzambi ke uvovanga ko lumbu kawutuka Yesu. McClintock yo nkanda Cyclopedia Strong uvovanga vo: “E lumbu kia luwutuku lwa Kristu ke kilendi soloka ko muna Luwawanu Lwampa yovo muna nkanda miakaka.” Kieleka, kele vo Yesu kazola vo alongoki andi bakembelanga lumbu kia luwutuku lwandi, wadi kubazayisa lumbu kia luwutuku lwandi.

Dianzole, o Nkand’a Nzambi ke uvovanga ko vo Yesu yovo alongoki andi nkinzi a Natale bakembelelanga. Landila nkanda Nova Enciclopédia Católica, e diambu dia kembelela Natale diayikwa mu nkumbu antete “muna nkanda Chronograph wa Philocalus, nkanda wa mvu wa esi Roma. O mambu mandi malenda kala vo ma mvu wa 336 wa tandu kieto.” Dialudi, ediadi vava diavangama Nkand’a Nzambi wakisonekenwa kala, o Yesu wakikadila ova ntoto se vioka tandu yayingi. Muna kuma kiaki, o McClintock yo Strong babakula vo “Ke Nzambi ko wasikidisa nkinzi a Natale, ke watuka muna Luwawanu Lwampa ko.” *

Wau vo Nlongi Anene, Yesu wavana luludiku lwakia luna kazola vo alongoki andi balanda. O luludiku lwalu luna muna Nkand’a Nzambi. Kansi, kabavovesa ko vo bakembelelanga Natale. Nze una nlongi kezolelanga ko vo wan’a sikola balutakana luludiku luna baveno, Yesu mpe kezolanga ko vo alongoki andi ‘balutakana mana masonama’ muna Nkand’a Nzambi.—1 Korinto 4:6.

Kuna diak’e sambu, vena ye lumbu kiamfunu kiatoma zayakana kwa Akristu antete, i sia vo, Luyindulu lwa lufwa lwa Yesu. Yesu yandi kibeni wavovesa alongoki andi e lumbu bafwete yindulanga lufwa lwandi yo kubasonga una balenda wo vangila. O luludiku lwalu kumosi ye lumbu kia lufwa lwandi kiasonama muna Nkand’a Nzambi.—Luka 22:19; 1 Korinto 11:25.

Nze una tumwene, e Natale i nkinzi a lumbu kia luwutuku. Akristu a tandu kiantete ke balandanga fu kia esi zula ko. Vana ntandu, Nkand’a Nzambi ke uyikanga ko vo Yesu yovo muntu ankaka wakembelelanga Natale. Muna kuma kia mawonso mama, ulolo wa Akristu omu nz’amvimba babakula vo e Natale ke nkinzi au ko.