E tini yankaka ya nkanda wau ikutusadisanga mu bakula dina Paulu kavovelanga, i sia vo, nsangu za Nzambi mu kuma kia kani diandi zina muna Nkand’a Nzambi.

Nkumbu miayingi tusadilanga e sono kia Ayibere 4:12 muna nkanda mieto mu songa vo Nkand’a Nzambi una yo nkuma wa soba zingu kia wantu. Ediadi dialudi. Kansi, dia lusadisu mu bakula dina Paulu kavovelanga vava kasoneka e mvovo mina muna Ayibere 4:12. Paulu wakasakesanga Akristu Ayibere muna zingila e ngwizani ye kani dia Nzambi. Mayingi mena muna kani dia Nzambi masonama muna sono yavauka. Paulu wasadila nona kia Aneyisaele ana Nzambi kavevola muna ubundu kuna Engipito. Bakala ye vuvu kia kota muna nsi a nsilu, “nsi ina ifwamfumukang’e kimvumina yo wiki” kuna badi vuila vundu kiakieleka.—Luvaiku 3:8; Nsiku 12:9, 10.

Diadina i kani dia Nzambi. Kansi, Aneyisaele bayambula landa luludiku lwa Yave ye ke bakala yo lukwikilu ko. Muna kuma kiaki, ayingi muna yau ke bakota ko muna vundu kiakina. (Ntalu 14:30; Yosua 14:6-10) Kansi, Paulu wakudikila vo vena yo ‘nsilu wa kota muna vundu [kia Nzambi].’ (Ayibere 3:16-19; 4:1) O nsilu wau dimosi muna mambu kasengomona o Nzambi mena muna kani diandi. Nze Akristu Ayibere, tulenda tanga oma ma kani dia Nzambi yo zingila e ngwizani ye kani diadi. Muna kiesesa vo kani diadi mu Nkand’a Nzambi diasonama, Paulu wayika mvovo mina muna Etuku 2:2 ye muna Nkunga 95:11.

Dia lukasakeso mu zaya vo ‘nsilu wa kota muna vundu kia Nzambi wakinu.’ Tuna ye vuvu vo dina Nkand’a Nzambi uvovanga mu kuma kia kota muna vundu kia Nzambi dilendakana. Tuvavanga lungisa mana mevavuanga muna kota muna vundu kiaki. Tuvanganga wo ke mu landa Nsiku a Mose ko ngatu muna vanga oma mansongi muna vava tondakana kwa Yave. Kansi, muna kuma kia lukwikilu lweto muna Nzambi, tuzingilanga e ngwizani ye kani diadi yo kwamanana wo vanga ye kiese kiawonso. Mazunda ye mazunda ma wantu mu nza yawonso belongokanga Nkand’a Nzambi yo zaya mana Nzambi kasengomona mu kuma kia kani diandi. Ediadi dikasakesanga ayingi muna yau mu soba e zingu kiau, kumika lukwikilu lwau yo baka e nzengo za vubwa. E nsobani bevanganga o wantu awaya i ziku kisonganga vo “diambu dia Nzambi diamoyo yo nkuma.” Mana Nzambi kasengomona muna Nkand’a Nzambi mu kuma kia kani diandi nluta miayingi matwese kala muna zingu kieto ye mekwamanana soba zingu kieto.