1, 2. Ekuma Mbangi za Yave belandilanga e nkanikinu misonganga e mpila ya vuatila? (Tala fwaniswa va ntandu.)

ZULUNALU mosi kuna Holanda yasonga una mfumu za mabundu bavuatila muna lukutakanu bakala lwau. Yavova vo: “Wantu ayingi bavuata e mvuatu miasonganga e nitu, musungula vava vakala ye mwini angolo.” Kansi, e zulunalu yayi yavova mpe vo e Mbangi za Yave ke wau ko bevuatilanga muna tukutakanu twau. Yavova vo akala kiakala aleke yovo ambuta, nzaka bevuatanga ye gravata. Akento bevuatanga saya yandá, kansi ke yaviokela ntangwa ko. Mbangi za Yave nkumbu miayingi besanisinwanga mu kuma kia mpila bevuatilanga. Paulu wa ntumwa wavova vo Akristu bafwete vuatanga ‘mvuat’ambote yo luzitu’ eyi ifwanukini kwa selo ya Nzambi. (1 Timoteo 2:9, 10) Kana una vo Paulu akento kavovela mu sono kiaki, o nkanikinu wau usadilwanga mpe kw’akala.

 ² Wau vo tu nkangu a Yave, e nkanikinu mia nkal’ambote mu kuma kia vuata mfunu mina kwa yeto ye kwa Nzambi ona tusambilanga. (Etuku 3:21) Nkand’a Nzambi utoma kiesesanga vo Yave wa Mfumu a nsema wawonso wasikidisa e mpila ina selo yandi bafwete vuatilanga. Muna kuma kiaki, e mvuatu tusolanga ke mifwete yangidika kaka yeto kibeni ko. Edi disundidi o mfunu, e mvuatu mieto mifwete yangidikanga Yave wa Mfumu eto.

3. Adieyi tulenda longoka mu kuma kia mvuatu muna Nsiku kavana o Yave kwa Aneyisaele?

³ Muna Nsiku a Mose, mwakala ye nsiku miataninanga Aneyisaele kimana balembi landa mpil’a zingu kia usafu kina bakala kiau e zula yabazunga. O Nsiku wasonganga vo Yave ka yangalelanga ko e mvuatu mina ke miaswaswanesanga ko kana vo u yakala yovo u nkento. O unu, miami i mpil’a mvuatu betoma yangalelanga o wantu. (Tanga Nsiku 22:5.) Muna Nsiku, tulongokanga vo Yave ke yangalelanga mvuatu mikitulanga akala nze akento ko, yovo mina mikitulanga akento nze akala ye mina ke mitoma swaswanesanga ko kana vo u yakala yovo u nkento.

4. Adieyi dilenda sadisa Akristu mu baka e nzengo zambote mu mpila ya vuatila?

⁴ E nkanikinu mia Nkand’a Nzambi milenda kutusadisa mu baka nzengo zambote mu mpila ina tufwete vuatila. E nkanikinu miami ke misolanga nsi ko ngatu nsungi ina twina yovo fu ya kisi nsi. Ke dina mfunu ko mu yika e mpila zawonso za mvuatu mina tufwete vuata ye mina ke tufwete vuata ko. Tufwete landanga kaka nkanikinu mia Nkand’a Nzambi, kadi mikutuvananga o nswa wa vuata e mvuatu tuzolanga. Yambula twabadika miaka nkanikinu mia Nkand’a Nzambi milenda kutusadisa mu zaya “owu wina luzolo lwa Nzambi, lwambote, lwatondakana ye lwalunga” vava tusolanga e mvuatu tuvuata.—Roma 12:1, 2.

5, 6. E mvuatu mieto aweyi milenda vanga kw’akaka?

⁵ Paulu wa ntumwa wavumunwinwa mu soneka nkanikinu wamfunu una muna 2 Korinto 6:4 (Tanga.) E mpila tuvuatilanga, diambu isonganga kw’akaka. Ayingi balenda kutuvovela e mbote yovo mbi mu kuma kia mpila tuvuatilanga. (1 Samuele 16:7) Wau vo tu selo ya Nzambi, mayingi tufwete vanga, ke vuata kaka mvuatu ko mina twamwene vo miambote yovo mina tuzolele. Vava tusadilanga nkanikinu mia Nkand’a Nzambi, mifwete kutusadisanga mu venga e mvuatu miavuangalakana yovo  mina mikwitamanga muna nitu. Ediadi disongele vo tufwete venganga e mvuatu misonganga e yikwa ya nitu ina ke ifwete moneka kwa wantu awonso ko. Ke tufwete vuatilanga mu mpila yambi ko, ina ilenda fila wantu mu mona e nsoni za kututala.

⁶ Wau vo tu selo ya Yave wa Mfumu, avo tuvuete mvuatu miavelela, miambote ye mia luzitu, wantu betoma kutuzitisa. Ediadi dilenda kubafila mu vava zaya oma ma Nzambi ona tusambilanga, mu toma zitisa e nkubik’eto yo wá e nsangu za luvuluzu tusamunanga.

7, 8. Nkia ntangwa tufwete vuatanga e mvuatu mia luzitu?

⁷ Mfuka tuna yau kwa Nzambi eto avelela, kwa mpangi zeto ye kwa wantu a zunga kieto, ya vuatilanga mu mpila ina ivananga nkembo kwa Yave ye nsangu zina tusamunanga. (Roma 13:8-10) E mvuatu mina tuvuatanga mfunu kikilu mina, musungula vava tukwendanga muna tukutakanu yovo muna salu kia umbangi. Tufwete vuatilanga mu mpila ina ifwanukini o nkangu usambilanga Nzambi. (1 Timoteo 2:10) Kansi, vena ye mvuatu milenda monekena vo miambote  omu nsi eto, kansi muna nsi zankaka ke miambote ko. Muna kuma kiaki, kiakala nkia fulu tuzingilanga, wau vo tu Mbangi za Yave, tufwete venganga tesesa akaka e sakuba mu mpila ina tuvuatilanga.

⁸ Tanga 1 Korinto 10:31. Vava tukwendanga mu tukutakanu twa zunga yovo twa mvivu, e mvuatu mieto mifwete kalanga miambote ye mia luzitu. Ke tufwete tangininanga ko e mpila yambi bevuatilanga o wantu a nza. Kana nkutu vava tukwendanga yovo tuvutukanga ku lukutakanu lwa mvivu yovo vava tukalanga kuna otele, e mvuatu mieto mifwete kalanga miambote ye mia luzitu. Muna mpila yayi, ke tukala ye nsoni ko za kuyisunzula vo tu Mbangi za Yave ye twakubama tukala mu sila umbangi konso ntangwa.

9, 10. E sono kia Filipi 2:4 kifwete kutusadisanga vava tusolanga e mvuatu. Ekuma?

⁹ Tanga Filipi 2:4. Ekuma tufwete yindulwilanga dina e mvuatu mieto milenda vanga kwa mpangi zeto Akristu? Kimosi muna kuma i kia sia vo, o nkangu a Nzambi usianga ngolo za landa luludiku olu: “Nufwasa yîkwa yeno ina ova nza, mu diambu dia zumba, usafu, zinu diasaka dia vukana.” (Kolosai 3:2, 5) Akaka muna mpangi zeto bayambula e zingu kia usafu, kansi nanga bakinu nwana ye zolela yambi. Avo ka tuyikebele ko, e mpila ina tuvuatilanga, ilenda kudikila e mpasi benwananga zau za lemvokela luludiku lwa Nkand’a Nzambi yo sunda zolela yambi. (1 Korinto 6:9, 10) Ke tuzolele ko vo e ngolo bevanganga zakala zankatu.

¹⁰ Vava tukalanga vamosi ye mpangi zeto, tutaninwanga mu lembi vukumunwa kwa wantu ana benungununanga e mavangu ma zumba. E mpila tuvuatilanga, ifwete wokesanga kintwadi kieto, kiakala vava tukalanga muna tukutakanu yovo mu fulu yankaka. Kana una vo tuna yo nswa wa sola e mvuatu tuzolele, tuna mpe ye mbebe ya vuata e mvuatu mina misadisa akaka mu kala ye ngindu, mvovo ye mavangu mavelela vana meso ma Nzambi. (1 Petelo 1:15, 16) O zola kwa kieleka “ke kuvanga mambu malembi songa ko, ke kuvava wete wa yandi kibeni ko.”—1 Korinto 13:4, 5.

11, 12. Aweyi e sono kia Kimpovi 3:1, 17 kikutusadisilanga mu kala ye tezo?

¹¹ Vava selo ya Nzambi bebakanga e nzengo za mvuatu bevuata, bazeye wo vo ‘e lekwa yawonso ina ye ntangw’andi.’ (Kimpovi 3:1, 17) E nsungi, mpil’a zingu kieto ye mambu mankaka, malenda soba e mpila tuvuatilanga. Kansi, e nkanikinu mia Yave ke misobanga ko.—Malaki 3:6.

¹² Muna nsungi a mbangazi, diampasi dikalanga mu sola e mvuatu miambote  ye mia luzitu. E mpangi zeto z’akala ye z’akento beyangalalanga vava bemonanga vo ke tuvuatanga mvuatu miakangama ko yovo misonganga e nintu. (Yobi 31:1) Vava tuyowelanga muna nkoko yovo kalunga, e mvuatu mieto mia yowelela mifwete kalanga mia luzitu. (Ngana 11:2, 20) Kana nkutu vo ayingi mu nza bevuatanga mvuatu misonganga e nitu vava beyowelanga, oyeto tufwete kala ye ziku vo e mvuatu mieto mivana nkembo kwa Yave wa Nzambi eto avelela.

13. O nkanikinu una muna 1 Korinto 10:32, 33, aweyi ulenda kutusadisila vava tusolanga e mvuatu?

¹³ Vena ye nkanikinu wankaka wamfunu ulenda kutusadisa vava tusolanga e mvuatu. Tufwete kuyikebanga kimana e mvuatu mieto mialembi tesa akaka e sakuba. (Tanga 1 Korinto 10:32, 33.) Tuna ye mbebe ya venga e mvuatu milenda tesa e sakuba kwa mpangi zeto ye kw’awana ke besadilanga Yave ko. Paulu wa ntumwa wasoneka vo: “Konso muntu, yambula kayangidika nkw’andi muna wete diandi yo kunkasakesa.” Paulu wakudikila vo: “Kana nkutu Kristu kakiyangidika ko.” (Roma 15:2, 3) Nze Yesu, o vanga luzolo lwa Nzambi yo sadisa akaka i diambu difwete sundanga o mfunu, ke zolela yeto ko. Muna kuma kiaki, tufwete solanga e mvuatu mina mifila wantu mu wá e nsangu tusamunanga, ke mpasi vuata kaka ko wau vo zola tuzolanga mio.

14. Aweyi mase balenda longela wan’au mu vana nkembo kwa Nzambi muna mpila ina bevuatilanga?

¹⁴ Mase bena vo Akristu bavuidi mbebe ya longa wan’au mu lemvokela nkanikinu mia Nkand’a Nzambi. Ediadi disongele vo bafwete kalanga ye ziku vo oyau yo wan’au beyangidikanga Nzambi muna mpil’au ya vuatila yo kuyikubika. (Ngana 22:6; 27:11) Aweyi mase balenda longela wan’au mu zitisa Nzambi eto avelela ye nkanikinu miandi? Mase bafwete songanga mbandu ambote kwa wan’au. Kuna zola kwawonso, bafwete longanga wan’au una balenda sololwela mvuatu miambote ye fulu balenda mio sololwela. O wana ke bafwete solanga kaka ko e mvuatu mina beyangalelanga, kansi edi disundidi o mfunu, bafwete solanga mvuatu mina mivana nkembo kwa Yave wa Nzambi ona besunzulanga.

15. Adieyi dilenda kutusadisa mu baka nzengo zambote?

¹⁵ Nkand’a Nzambi ulenda kutusadisa mu baka nzengo zambote zina zivana nkembo kwa Nzambi. Kana una vo i wau, e mvuatu tuvuatanga misonganga mana tuyangalelanga. E mpil’a mvuatu tuyangalelanga ye mina tusumbanga milenda kala miaswaswana ye mia wantu ankaka. Kansi, e mvuatu mieto mifwete kalanga miavelela, miambote ye mia luzitu. Tufwete solanga e mvuatu tuvuata mun’owu wa fulu tukwenda ye zunga tuzingilanga.

16. Ekuma dinina diamfunu mu vanga e ngolo za vuatila mu mpila yambote?

¹⁶ Ezak’e ntangwa, diampasi dikalanga mu solola mvuatu mia luzitu ye miambote.  Muna fulu yayingi, betekanga kaka mvuatu mina mitoma yangalelwanga kwa wantu a nza. Muna kuma kiaki, ntangwa ye ngolo divavanga mu solola saya, kinkutu, nzaka yovo mbati wambote ye waluzitu. Kansi, e mpangi zeto bemonanga yo yangalela e ngolo tuvanganga za vuata mvuatu miatoma vienga kansi mia luzitu. E kiese tumonanga kia kembelela Se dieto dianzodi una kuna zulu, kisundidi konso ngolo tulenda vanga mu solola e mvuatu mikumvana o zitu.

17. Adieyi dilenda fila mpangi mu lunda yovo lembi lunda e nzevo?

¹⁷ Nga diambote kwa mpangi z’akala mu lundanga e nzevo? Muna Nsiku a Mose diavavanga vo akala balundanga e nzevo. Kansi, Akristu ke bena ku nsi a Nsiku a Mose ko ngatu kanikinwa vo balemvokela wo. (Fuka 19:27; 21:5; Ngalatia 3:24, 25) Muna fu yankaka ya kisi nsi, o lunda e nzevo ke diambi ko ye ditondakananga, ke dikakidilanga wantu ko mu wá e nsangu tusamunanga. Muna kuma kiaki, mpangi zankaka z’akala ana bena ye kiyekwa muna nkutakani, nzevo bekalanga zau. Kana una vo i wau, e mpangi zankaka balenda baka e nzengo zalembi lunda e nzevo. (1 Korinto 8:9, 13; 10:32) Muna fu yankaka ya kisi nsi, o lunda e nzevo ke fu kiau ko ye ke ditondakananga ko vana vena Akristu. Muna kuma kiaki, avo mpangi olundanga e nzevo, dilenda kunkakidila mu vana nkembo kwa Nzambi yo kondwa “lusembo.”—1 Timoteo 3:2, 7; Roma 15:1-3.

18, 19. Aweyi e sono kia Mika 6:8 kikutusadisilanga?

¹⁸ Tuvutulanga kikilu matondo kwa Yave wau vo ka tuvana nsiku miayingi ko misonganga e mpila tufwete vuatilanga yo kuyikubika. Kansi, watuvana nswa wa baka e nzengo yeto kibeni mun’owu wa nkanikinu mia Nkand’a Nzambi. Muna kuma kiaki, vava tubakanga e nzengo za mpila tuvuatila yo kuyikubika, tulenda songa vo tuzolele kala twavelela ekolo tusadilanga Nzambi eto.—Mika 6:8.

¹⁹ Tufwete sungamenanga vo Yave wavelela ye wavauka. E nkanikinu miandi mfidi ambote kwa yeto. Avo tuzolele kala twavelela yo kala alembami, tufwete yambula vo e nkanikinu miandi miafila e zingu kieto. O lulembamu lukutusadisa mpe mu zitisa e ngindu za wantu ankaka.

20. E mpil’eto ya vuatila yo kuyikubika adieyi ilenda vanga kw’akaka?

²⁰ E mvuatu mieto mifwete songanga vo tu selo ya Yave. E nkanikinu mia Yave misundidi e nkanikinu miawonso. Tukalanga ye kiese kia landa mio. E mpangi zeto mu nz’amvimba bafwene sanisinwa mu kuma kia mpila yambote bekuyikubikilanga ye mu kuma kia nkal’au yambote. Ediadi difilanga akwa ntima miambote mu tambulwila e nsangu za luvuluzu yo twasa nkembo ye kiese kwa Yave. Avo tubaka e nzengo zambote mu kuma kia mvuatu tuvuatanga, tukwamanana vana nkembo kwa Ndiona ovuete “zitu yo nkembo.”—Nkunga 104:1, 2.