E Nsangu Zambote zasoneka Luka zivovanga vo Yesu waziula ngungu (rolo) ya Yesaya wa ngunza yo tanga yo, i bosi wazinga yo. Kuna mfoko a Nsangu Zambote kasoneka o Yoane, wayika ngungu yo vova vo kalenda soneka mawonso ko kavanga o Yesu.​—Luka 4:16-20; Yoane 20:30; 21:25.

E ngungu aweyi zavangilwanga? Wantu basadilanga dimbu muna yikakesa e nkanda mia bulu yovo mabu kimana o nkanda wakala wandá. I bosi, wazingwanga mu nti, e ndambu yakala masono i yau yakalanga muna kati. Masono ma konso kunku, mayantikilanga kuna lumoso yo sukila kuna lunene. Avo nkanda wandá, nti miole basianga kuna nsuk’a muna wo zingumuna. Muntu wasadilanga nti miami muna zingumuna mu koko kumosi ekolo koko kwankaka kwazinganga wo yavana kawananga lukaya kazolele.

Nkanda umosi (The Anchor Bible Dictionary) uvovanga vo: “Avo e ngungu yandá (tezo kia meta 10), mwasonekwanga nkanda wamvimba wa Nkand’a Nzambi.” Akwa ngangu bevovanga vo nanga o nkanda Luka tezo kia meta 9.5 wakala muna lá. Ezak’e ntangwa e nsuka za nkanda zakonzekwanga.

Tuka o Nzambi kasikidisila kinganga muna Isaele yankulu, muntu mosi kaka wasolwanga mu kala se mbuta a nganga. (Ntalu 35:25) Arone i selo kiantete kia Nzambi wasolwa mu salu kiaki. I bosi, kiayekekwa mpe kwa mwana antete. (Luvaiku 29:⁠9) Wana ayingi a Arone basala e salu kia kinganga, kansi akete kaka basala se mbuta za nganga.

Vava nkangu a Isaele wayalwanga kwa atinu a nsi zankaka, atinu awaya batumbikanga yo katula mbuta za nganga za Ayuda. E nganga zatumbikwanga mu makanda ma tunda zasolelwanga, musungula muna luvila lwa Arone. O mvovo “nganga za mbuta” uyikanga awana bavitanga o ntu mu salu kia kinganga. Muna yau mwakala ye 24 ma wantu basalanga e salu kiaki ye yitu ya nganga za mbuta ye awana bakatulwa kiyekwa kiaki nze Anasi.​—⁠1 Tusansu 24:​1-19; Matai 2:4; Maku 8:31; Mavangu 4:⁠6.