Malongi ma Bibila mavuidi o nkuma wa soba zingu kia wantu. Tala e nona kia mpangi Ricardo yo Andres.

RICARDO: Vava yakala ye mvu 15 yakota muna buka kia yimpumbulu. Nze aleke akaka, ngindu za akundi ame kaka yazitisanga. Dilenda moneka vo dia uzowa, kansi yakala ye kani diaviokesa mvu 10 muna boloko. Kadi muna zunga yazingilanga, awana bavaika muna maboloko batoma zitiswanga, muna kuma kiaki mono mpe yazola kala nze yau.

Vava yakala muna buka kia yimpumbulu, yavanga mambu mayingi mambi nze sadila droga, mavangu ma zumba ye nsoki. Lumbu kimosi muna fuku, twayantika e nkindu ya nkele ye buka kiankaka kia yimpumbulu. Yayindula vo kiadi vuka ko, kansi yavuka. Vava diambu diadi diavangama, yayantika yindula e makani mame ye mpila zingu yanatanga. Ozevo, yabaka e nzengo za soba e mpila zingu kiame, kansi mu nkia mpila? Nani wadi kunsadisa?

Ayingi muna yitu yame mpasi zayingi banuananga zau muna zingu ye ke bakala ye kiese ko. Kansi, o ngudi ame ankazi ye esi nzo andi, e zingu kiau kiaswaswana kiakala. Yazaya wo vo wantu ambote bakala kadi malongi ma Bibila balemvokelanga. Lumbu kimosi, bandonga vo e nkumbu a Nzambi, Yave. Vava twanuana e nkindu ye buka kiankaka kia yimpumbulu, ke vavioka lumbu yayingi ko yasamba kwa Nzambi yo sadila e nkumbu andi. Yatoma sivika kadi muna lumbu kialanda, Mbangi a Yave mosi wadodela e kielo kia nzo ame. Wakituka se nlongi ame a Bibila.

Vana vau yawanana ye diambu diampasi. Akundi ame ankulu, nkumbu miayingi bambokelanga twavaika entwadi. Diampasi diakala muna kubavovesa vo kizolele ko. Kansi, yabaka e nzengo za kwamanana longoka e Bibila. Diambote wau yakwamanana longoka, kadi e zingu kiame kiasoba emvimba yo solola e kiese kiakieleka.

Isungamenanga e lumbu yasamba kwa Nzambi muna kunzayisa e kani diame dia viokesa mvu kumi muna pelezo kimana yazitiswa kwa akwame yimpumbulu. Kansi, wau vo e kani diame diasoba, yalomba kwa Nzambi vo kampana e lau diaviokesanga ntangwa yayingi muna longa wantu e Bibila wauna mono yasadisilwa. Nzambi wavana e mvutu za sambu kiame, owau se mvu 17 isalanga e salu kiaki. Edi disundidi o mfunu, kiasidi siwa mu pelezo ko.

Kansi, ayingi muna akundi ame, mvu miayingi se bena muna pelezo, ankaka nkutu bafwa. Vava iyindulanga mawonso mavioka, ivutulanga matondo kwa yitu yame bena vo Mbangi za Yave. Bavanganga e ngolo mu kala baswaswana yo zingila e ngwizani ye nkanikinu mia Bibila. Yau itoma zitisanga vana fulu kia zitisa konso muntu muna buka kia yimpumbulu. Vana ntandu, ivutulanga matondo kwa Nzambi wau kansadisa mu solola e mpila zingu kisundidi o wete.

 ANDRES: Yawutukila yo sansukila vana belo kia asukami ana bakivananga mu sadila droga, yiba, vonda wantu ye ta zumba. Se diame mpe nduvu a malavu kakala yo mbundu a cocaína. O papa yo mama, ntangwa zawonso batantananga yo nuana.

Tuka muna kileke, yayantika nua malavu mankolwa yo sadila droga. Ntangwa yayingi yaviokesanga muna mabala-bala muna yiya yo teka e lekwa yayiyanga. Vava yakituka se mbuta, se diame wavanga yame kikundi, kansi wavangila wo ye kani diambi, wandonga fu kia sumba yo teka e droga ye lekwa yankaka yambi. Yalenda baka nzimbu zayingi mu ntangwa ya fioti. Kansi, lumbu kimosi, masoladi bayiza ku nzo eto yo kunkanga. Wau vo muntu yazola vonda, yazengelwa mvu tanu muna boloko.

Lumbu kimosi muna nsiuka muna boloko, abakami babokelwa mu wa longi dia Bibila difilwa kwa Mbangi za Yave. Yabaka nzengo za kwenda wa e longi diadi. Yatoma yangalela muna malongi yawa. Muna kuma kiaki, yayantika longoka e Bibila ye Mbangi za Yave. Ke banzayisanga kaka mana yazola wa ko, kansi bansonganga muna Bibila e fu ina iyangidikanga Nzambi.

Ke vavioka kolo ko, yabakula vo mono kibeni kilenda vanga sobani zazi ko. Muna sakisa mambu, abakami ana ke bayangalalanga ko e nsobani yavanga, bayantika kumvumisa. Muna kuma kiaki, yasamba kwa Yave yo lomba nkuma ye ngangu, Nzambi wansadisa. Vana fulu kia yoya, yakala ye unkabu yo yayantika sila umbangi kwa abakami akaka.

Vava e lumbu kia vaika muna boloko kiafwana, yakendalala kikilu ye kiazola nkutu vaika ko. Ekolo yavaikanga, abakami ayingi banzayisanga, yoyo. Ankaka nkutu bampovesa kuna ngemba vo: “Wenda kiambote, e nlongi.”

Wonga kikilu imonanga vava iyindulanga una wadi kala e zingu kiame kele vo kiayambula ko vo Nzambi kandonga. Itoma vutulanga matondo kwa Nzambi wau vo wanzola yo lembi kumbadikila vo kilenda diaka soba ko. a