Wantu ayingi befuntukanga lumbu yawonso muna lenda e lekwa bavuidi o mfunu muna zingu. Diankenda vo, omu nza yayi yankinda-nkinda, diampasi kikilu mu lenda e lekwa yayi. Ekuma?

• Vava kimvuama kia nsi kikulukanga, e mpasi mpe ziwokelanga. E lekwa nze madia yo futila e nzo ilenda manta e ntalu.

• Vava kimvuama kia nsi kikulukanga, o wantu mpe balenda vidisa e salu yau yovo futwa nzimbu zakete.

• E sumbula ilenda fwasa makompani, zinzo ye lekwa yankaka ina o wantu bena yau yo kituka se asukami.

• Avo otomene sadila e nzimbu zaku, wakubama okala mu zingila ye nzimbu zakete avo kimvuama kia nsi kikulukidi.

• Sungamena dio vo, e salu kiaku, nzimbu olundanga ye lekwa yankaka una yau ilenda vila vana vau.

• Kansi, vena ye mambu mana e nzimbu ke zilendi sumba ko, nze kiese ye ngwizani ambote yo esi nzo aku.

Bibila kivovanga vo: “Avo tuna ye madia ye mvuatu, tuyangalela yo.”—1 Timoteo 6:8.

Tuyangalelanga ina tuna yau muna lembi sianga sungididi kiasaka muna zolela yeto. Ediadi diamfunu kikilu mu sungula avo nzimbu zakete kaka tuna zau.

Muna yangalela ina una yau, nanga divava vo wavevola e zingu kiaku. Avo lekwa osumbanga isundidi e nzimbu ofutwanga, mpasi zayingi okuyitwasila.