Wantu ke Bezitisanga Diaka Akaka Ko

WINIKINA MU

EKUMA OFWETE ZITISILANGA AKAKA?

Avo tuna ye fu kia zitisa akaka tulenda kakidila e ntantani ye mambu mambi.

Kingana kimosi kia Bibila kivovanga vo: “E mvutu za malembe nganzi zilembekanga, kansi, e mvovo milwekanga makasi misakisanga.” (Ngana 15:1) Ovovela kuna makasi yo vangila mambu kuna makasi, dina nze kudikila e nkuni vana tiya. Nkumbu miayingi mfwilu kaka ditwasanga.
Yesu wavova vo: “Mana mazele muna ntima i mevovang’o nua.” (Matai 12:34) Avo ke tuzitisanga akaka ko dilenda moneka muna mpila tubadikilanga wantu bena ye se ya nitu yaswaswana, makanda maswaswana, kisi nsi kiaswaswana yovo awana bena ye mpila zingu kiaswaswana.

Lufimpu lwavangamene ke kolo ko kwa vioka 32.000 ma wantu muna nsi 28, ndonga muna yau bavovele vo, o kondwa kwa fu ya nkal’ambote ye fu kialembi zitisanga muntu yo nkwandi kitomene wokela ke mu mvu miavioka ko.

AWEYI OLENDA ZITISILANGA AKAKA?

Zitisanga wantu awonso, kiakala kuna salu yovo kuna sikola, kana nkutu vo e ngindu zaku zaswaswana ye zau. Vava zaya mambu mana nulenda kadila ye ngindu zau zimosi. Ediadi dikusadisa mu lembi vovelanga akaka e mbi yo venga e fu kia fundisa akaka.

“Nuyambula fundisa kimana nualembi fundiswa.”—Matai 7:1.

Kadilanga ye akaka wauna ozolele vo akaka badilanga yaku. Avo ovuanga akaka o mfunu yo kadila yau kuna unsongi, oyau mpe mpila mosi bekadila yaku.

“Konso una nuzolele vo wantu banuvanga, i una mpe nuvanga kwa yau.”—Luka 6:31.

Kala ye fu kia loloka. Muna lembi funganga makasi mu nzaki, kalanga ye ngindu vo dina kavovele o muntu yovo dina kavangidi, kavangidi dio ku lukanu ko.

“O nkwa ngangu ke funganga makasi mu nzaki ko, diambote kuna kwa yandi mu viokesa e mbi.”—Ngana 19:11.

DINA MBANGI ZA YAVE BEVANGANGA

Muna belo ina bezingilanga ye muna fulu ya salu, Mbangi za Yave bezitisanga akaka yo sadisa wantu basonganga luzitu kwa akaka.

Lembi lomba nzimbu, tulonganga oma ma Bibila kwa wantu awonso, kansi ke tukomekenanga wantu ko bakwikila mana tukwikilanga yovo landa e ngindu zeto. Vana fulu kia vanga ediadi, tuvanganga e ngolo mu sadila luludiku lwa Bibila luvovanga vo twasamunanga e nsangu zambote “kuna lulembamu yo vumi.”—1 Petelo 3:15; 2 Timoteo 2:24.

Ke tusianga mpambula ko, muna tukutakanu tweto tutambulanga wantu a mpila zawonso ana bazolele longoka mana Bibila kilonganga. Tuvanganga e ngolo mu lembi bembola konso muntu mu kuma kia ngindu zandi yovo mana kekwikilanga ye ‘tuzitisanga wantu a mpila zawonso.’—1 Petelo 2:17.

Tuzitisanga wisa kia ayadi muna fulu ina tuzingilanga. (Roma 13:1) Tuzitisanga nsiku yo futa e mpaku. Kana una vo ke tukuyisianga muna mambu ma mbumba ko, tuzitisanga nswa wa akaka wa kuyisolela muna nzengo bebakanga mu mambu ma mbumba.

SIKAMA!