Wantu ke Bezitisanga Diaka Moyo Ko

WINIKINA MU

EKUMA OFWETE ZITISILANGA MOYO?

Vava ovanganga mambu mesianga vimpi waku yo vimpi wa wantu akaka mu vonza, ediadi disonganga vo kuzitisanga moyo ko.

O nua fomo ke ditwasanga kaka kimbevo kia câncer ko, kansi diyoyesanga mpe e nitu muna kuyitanina muna kimbevo kiaki. Muna wantu awonso befwilanga muna kimbevo kia câncer ya lufulu, ndonga muna yau i mu kuma kia nua fomo yovo kala va fulu kimosi ye awana benuanga o fomo.
Vava yimpumbulu benonganga wantu muna fulu ya ndonga, ayingi muna awana bevulukanga bebakamanga kwa wonga wasaka. E nsangu za Universidade Stanford, Estados Unidos zisonganga vo: “Vava yimpumbulu [benonganga wantu muna sikola], kana nkutu awana bevulukanga lembi lwala, bekalanga mu lukendalalu ye wonga wasaka mu mvu miayingi.”
Vava wantu bediatisilanga makalu kuna nkolwa za malavu yovo droga, besianga e zingu kia wantu ankaka mu vonza. Vava wantu ke bezitisanga moyo ko, e zingu kia minkondwa-kuma mu vonza kikalanga.

AWEYI OLENDA ZITISILA O MOYO?

Tanina vimpi waku. Ntangwa yakinu mu yambula mavangu malenda sia vimpi waku mu vonza, nze nua fomo, nkolwa za malavu yovo droga. Mavangu mama mesonganga vo kuzitisanga moyo wa ngeye kibeni ko ye mioyo mia akaka ana bazungidi nze yitu yaku.

“Yambula twayivelelesa muna usafu wawonso wa nitu.”—2 Korinto 7:1.

Sungamenanga lutaninu lwaku ye lwa akaka. Muna venga e sumbula, toma lunga-lunganga e nzo aku. Toma keba muna diatisa e kalu ye mota, toma lunga-lunganga e kalu diaku yovo mota. Kuyambula ko vo akaka bakomekena mu vanga mambu malenda twasa e sumbula yovo lufwa lwa muntu.

“Avo otungidi nzo, ofwete zungisa yaka kuna nludi, kimana walembi twasa nkanu a menga muna nzo aku mu kuma kia muntu obwidi tuka kuna nludi.” —Nsiku 22:8. a

Songanga ngemba kwa akaka. Muna songa vo tuzitisanga moyo, tufwete songanga ngemba kwa wantu a makanda mawonso, kiakala mvuama yovo mputu, ana batanga yovo ana balembi tanga. Vana ntandu, e fu kia sia mpambula yo lumengo i tuku dia nsoki ye vita zinuanuanga mu nza yawonso.

“Nuyambula e fidititi diawonso, makasi, nganzi, ntantani, mvovo mialutiangu ye mbi yawonso. Kansi nusonganga ngemba kwa muntu yo nkwandi.”—Efeso 4:31, 32.

DINA MBANGI ZA YAVE BEVANGANGA

Mbangi za Yave belonganga akaka e mpila balenda kuyitanina yo kala ye vimpi wambote. E salu kieto kia longa oma ma Bibila kwa wantu, kisadisanga wantu ayingi mu sunda e fu yambi ikubabundunanga, nze nkolwa za malavu yo nua droga.

Tutoma zitisanga e nsiku mia lutaninu muna salu kieto kia tunga e fulu ya nsambila. Ampangi ana bekuyivananga kuna mvevo muna tunga fulu yeto ya nsambila ye mavula mankaka mesadilwanga muna yikama salu kia longa e Bibila kwa wantu, betoma longwanga muna venga e sumbula. Muna zitisa e nsiku mia lutaninu, e fulu yeto ya nsambila itoma lungwa-lungwanga ntangwa zawonso.

Tuvananga lusadisu kwa awana bebwilwanga e sumbula. Muna mvu wa 2022, twasadidi tezo kia milhões 12 za dolare muna sadisa awana babwidilu e sumbula muna 200 za fulu mu nza yawonso.

Vava kimbevo kia Ébola kiayantika sayana kuna África Ocidental (2014) ye kuna República Democrática do Congo (2018), twalonganga o nkangu una balenda kakidila e kimbevo kiaki kimana kialembi sayana. Twatuma ampangi muna sasila kwa wantu e longi dina ye ntu a diambu, “O Songa Nlemvo Mioyo Divuluzanga.” Twatula katini ya sukulwila moko muna mielo mia Maseka meto ma Kintinu. Twatoma songanga o mfunu wa sukula moko ye mambu mankaka malenda sadisa muna kakidila e kimbevo.

Kuna Serra Leoa, radio mosi yasanisina Mbangi za Yave mu kuma kia lusadisu bavananga kwa Mbangi za Yave ye kwa nkangu awonso muna mavata mu venga mumvidi wa Ébola.

Katini kia sukulwila e moko muna Seka dia Kintinu muna mvu wa 2014 vava kiabundumuka e vuku kia Ébola kuna Libéria

a Kuna nz’ankulu kuna Oriente Médio, o nludi a nzo wasingama wakalanga ye wasadilwanga muna salu ya lumbu ke lumbu. O nkanikinu wau wasonganga vo e diambu dia tanina esi nzo ye wantu ankaka, mfunu kikilu diakala.

SIKAMA!