O kala ye mbokena zambote, i yambula vo ongeye yo wan’aku nuavovanga kwa muntu yo nkwandi mawonso nuyindulanga ye una numonanga.

Dilenda kala diampasi mu mokena ye aleke. O nkanda, Decifrando o Código, uvovanga vo: “Nanga mu mvu miavioka, diasazu diakalanga mu zaya mawonso mavangamanga muna zingu kia wan‘aku. Kansi wau bakudidi, edi kaka olenda vingila, i vuanda ye nanga va fulu kiambi, i sia vo, se diampasi kikilu mu zaya mana bewanananga mau ye mana beyindulanga.” E nsobani yayi ilenda moneka vo ke yambi ko. Kansi, vava ediadi divangamanga i kolo kiokio kikilu o mwan’aku kavuidi o mfunu wa mokena.

Mokenanga yo wan’aku muna ntangwa ina bamwene vo i yambote mu mokena. Vanga wo, kana nkutu vo mu fuku kikilu.

“Olenda kala ye ngindu za yuvula vo: ‘Nga yayi i ola ozolele mokena yame? Lumbu kiamvimba tunangini vamosi!’ Kansi, nga ofwete yidima avo wan’aku bazolele mokena yaku muna ola ina vo yambi kwa ngeye? Nga ke diau ko mase bevavanga vo wan’au bamokenanga yau?”—Lisa.

“Izolanga leka mu ola yambote. Kansi, isungamenanga vo imosi muna moko yambote yakala yau yo wan’ame i vava bandomba mu mokena muna ola ya dingi-dingi dia fuku.”—Herbert.

DINA BIBILA KIVOVANGA: “Konso muntu kavavi wete dia yandi kibeni ko, kansi wete dia nkwandi kaka.”—1 Korinto 10:24.

Venga o mambu malenda kufwis’e diya. Se dimosi wavova vo: “Ezak’e ntangwa, vava wan’ame bemokenanga yame, mambu mankaka kwame iyindulanga. Oyau mpe bebakulanga wo vo kina kubasia sungididi ko.”

Nze se diadi, avo ngeye mpe i wau ovanganga, kanga e televizau, telefone yovo tablete. Sia e sungididi muna mvovo mia mwan’aku yo songa vo otokanenanga mpe o mambu kena nuana mau. Vanga wo kana nkutu omwene vo mana kena vova ke mena kwandi mfunu wayingi ko.

“Tufwete songa kwa wan’eto vo tukubavuanga kikilu o mfunu. Avo ke babakwidi wo ko, wan’eto ke bezola mokena yeto ko yovo bevava lusadisu kwa muntu akaka.”—Maranda.

“Kala wavuvama, kana nkutu vava e ngindu za wan’aku ke zina zasonga ko.”—Anthony.

DINA BIBILA KIVOVANGA: “Nutoma tala e ngwa nuwa.”—Luka 8:18.

Sadilanga e ntangwa nuviokesanga kumosi. Ezak’e ntangwa o wana betoma mokenanga yo mase mau avo ke bena bavuanda mantalani ko yo yau.

“Vava tukangalanga kumosi muna kalu, tuzolanga sadila e lau diadi mu mokena. Wau vo ke tukalanga mantalani ko, ediadi dikutusadisanga mu kala ye mbokena zambote.”—Nicole.

E ntangw’a dia i ola yambote mpe olenda mokena yo wan’aku.

“Muna ntangw’a dia muna fuku, tuzolanga mokena mu kuma kia mana konso muntu kawanane mau muna lumbu kiakina, kiakala mambote yovo mambi. Ediadi dikutuyikakesanga nze esi nzo yo kutuvana e ziku vo ke dina mfunu ko mu nuana ye mpasi zeto yeto mosi.”—Robin.

DINA BIBILA KIVOVANGA: ‘Kalanga ye nzaki za wá, kansi kukadinge ye nzaki za vova ko.’—Yakobo 1:19.