Kuna diak’e sambu, wantu ayingi bemonanga vo aleke ana beviokesanga ntangwa yayingi mu sadila Internete bekalanga ye fu kia . . .

• kituka se abundu a celular yovo tablet.

• tonta yovo veza akaka muna Internete.

• tala mavangu ma nsoni, kana nkutu vo ke bena ye kani dia vanga wo ko.

KITUKA SE MBUNDU

Mambu mankaka muna Internete nze i nsaka, malenda kitula muntu se mbundu. Ediadi i kani mekubikilwanga. Nkanda mosi uvovanga vo: “Aplicativo zayingi muna celular yovo muna tablet zakubikwa kimana twalembi vavukanga e salanganu yayi. Vava tutoma sadilanga aplicativo imosi, oyeto tukalanga nze amwangi a nsangu za aplicativo yoyo yo vuamisa ndiona wasoka yo.”

TOMA YINDULA: Nga o wan’aku bakituka se abundu a celular yovo tablet? Aweyi olenda kubasadisila kimana batoma sadilanga e ntangw’au? —EFESO 5:15, 16.

VEZA YOVO TONTA AKAKA MUNA INTERNETE

Akaka muna Internete bekitukanga se akwa lulendo, ke betokanenanga e ngindu z’akaka ko. Ediadi dikubakitulanga se akwa luvezo.

O vava e tunda yovo vava zayakana i difilanga akaka mu songa e fu kiaki ekolo besadilanga e nzila za mokenena muna Internete. Akaka vava bemonanga vo ke besiwanga e sungididi ko, beyindulanga vo bembolwa bebembolwanga. Kasikil’owu, e ngindu zazi zilenda kubalwakila kele vo ke babokelo ku nkinzi ko.

TOMA YINDULA: Nga wan’aku mvovo mia matingu besadilanga muna Internete? (Efeso 4:31) Aweyi bemonanga avo ke babokelo ku nkinzi ko yovo muna nsaka?

MAVANGU MA ZUMBA

Internete itomene wokesa e fu kia tala yovo tanga mavangu ma zumba. Dialudi vo vena ye salanangu yayingi nulenda sadila muna yingilanga wan’eno, kansi ke diasazu ko.

O twika mafoto ma nsoni ma ngeye kibeni yovo tambula mafoto m’akaka muna internete, nkanu ampwena. Muna mambu mankaka, landila e nsiku mia nsi ye ntela y’awana babwidi mu vangu diadi, balenda fundwa vo nsangu za mavangu ma zumba ya wan’akete bemwanganesanga.

TOMA YINDILA: Aweyi olenda sadisila wan’aku bavenga ntonta za tala yovo twika mafoto ma nsoni muna Internete?—EFESO 5:3, 4.

LONGANGA WAN’AKU

Kana una vo diasazu kwa wan’akete mu zaya sadila e salanganu ya umbangu, divavanga vo basadiswa. Nkanda mosi uvovanga vo oyambulwila mwan’akete kasadilanga celular yovo Internete lembi kunlonga e mpila yambote yasadila yo, “diavonza kikilu. Dina nze ngeye unyambwidi kayituba vana zinga kia yolela kana una vo kazaye siensia ko.”

Sia sinsu muna malongi ozolele sadila yovo soneka ngindu zaku.

• Zayisa kwa mwan’ame kakalanga nkwa ngemba vava kemokenanga y’akaka muna Internete

• Sadisa mwan’ame kazaya dina kalenda vanga avo akaka bambembwele

• Kanga site zambi muna Internete

• Ezak’e ntangwa mfwete fimpanga e celular ya mwan’ame

• Sikidisa e ntangwa ina kafwete viokesanga mu sadila Internete konso lumbu

• Katula e tablet yovo celular muna suku dia mwan’ame muna ntangw’a leka

• Unsima kayambula sadila e celular muna ntangw’a dia