Kansi, kuna kw’akaka akundi au kaka bemokenanga yau muna nzila zazi. Nkia mambu mampasi ditwasanga? Mankaka muna mambu mama i . . .

• lembi kuyisia va fulu kia akaka, lembi yindula una akundi au bemonanga.

• mona kinsona.

• tokanena kaka wete dia yau kibeni ke mu wete dia akaka ko.

UYISIANGA VA FULU KI’AKAKA

Muna kuyisia vana fulu ki’akaka, divavanga vo twavaulanga e ntangwa mu yindula e mambu bewawananga mau. Kansi, ediadi dilenda kala diampasi avo ntangwa yayingi tuviokesanga mu soneka yo tanga messagem yovo landa e nsangu muna nzila za mwangina e nsangu.

Avo ke tuyikebele ko, o ulolo wa mensagem tutambulanga zilenda kutufila mu yindula vo akundi eto tukanesa bekututokanesanga. I bosi, tuyima e fu kia vunzuna e mensagem lembi zo tanga ye ke tukala diaka ye ngindu zasadisa nkundi eto ko.

TOMA YINDULA: Aweyi olenda kadila ye fu kia ‘kuyisianga vana fulu kia akaka’ vava osadilanga umbangu muna mokena ye akundi aku?—1 PETELO 3:8.

KINSONA

Lufimpu lumosi lwasongele vo wantu ayingi betoma kendalalanga kuna mfoko a viokesa ntangw’ayingi muna nzila za mokenena muna Internete. Afimpi bavova vo o tala mafoto yo tanga nsangu zampa za wantu ankaka, difilanga muntu mu yindula vo: “Ntangwa yankatu mviokese.”

Vana ntandu, o tala mafoto mambote m’akaka dilenda fila muntu mu yantika kuyitezanesa ye akaka. Dilenda kumfila mpe mu yindula vo ekolo wantu awonso beviokesanga e ntangwa yakiese, oyandi e zingu kiandi kiampasi kaka.

TOMA YINDULA: Aweyi olenda vengela e fu kia kuyitezanesa ye akaka vava osadilanga e nzila za mokenena muna Internete? —NGALATIA 6:4.

VAVA KAKA O WETE WA NGEYE KIBENI

Nlongi mosi wamona vo alongoki andi akwa loko, muna vanga kikundi ye konso muntu, beteka yuvulanga: “Nkia nluta ivua kwa nkundi ndioyo?” Ovanga kikundi ye kani dia mpila yayi, difilanga o muntu mu vavanga kaka o wete wa yandi kibeni. Olenda badikila akundi andi nze telefone celular ina kalenda sadila yo kanga yo konso ntangwa ina kazolele.

TOMA YINDULA: E mafoto ye mambu otulanga muna nzila za Internete, nga mesonganga vo fu kia vava sunda akaka una kiau yo vavanga kaka o wete wa ngeye kibeni?—NGALATIA 5:26.

TOMA FIMPA E MPILA OSADILANGA UMBANGU

Avo ngeye otuminanga o umbangu, kansi ke umbangu ko ukutuminanga, ke dikala diampasi ko mu vanga kikundi ye akaka yo toma kubafinama.

Sia sinsu muna malongi ozolele sadila yovo soneka e ngindu za ngeye kibeni.

• Mokena yo muntu (vana fulu kia soneka mensagem yovo e-mail)

• Kanga e telefone (yovo kanga e zú diandi) ekolo omokenanga y’akaka

• Yambula viokesa ntangwa yayingi muna sadila e nzila za mokenena muna Internete

• Sianga e sungididi mu mana akaka bevovanga

• Mokena yo nkundi una mu mpasi