Wantu ke besonganga kaka ko e fu kia sia mpambula kwa wantu a nsi zankaka, se kia nitu, makanda ye ndinga zaswaswana. Kansi, besonganga mpe e fu kia sia mpambula kw’awana bena muna mabundu mankaka, akento, akala, amvuama yovo mapobele. Akaka besianga e mpambula kwa wantu mu kuma kia kimbuta, sikola batanga, kimbevo yovo mu kuma kia mpwa. Kansi, beyindulanga vo ke bena ye fu kia sia mpambula ko.

Nga e fu kiaki kilenda kusambukila? Ndonga mu yeto e fu kia sia mpambula kwa wantu ankaka kaka tumwenanga kio. Diampasi dikalanga mu bakula vo yeto kibeni tuna ye fu kiaki. Dialudi vo yeto awonso tusonganga e fu kia sia mpambula muna maka mambu. David Williams wa nlongi a sociologia wavova vo: Vava wantu bekalanga ye ngindu zabendomoka mu kuma kia kanda dimosi, avo bawanane yo muntu a kanda diadina, ke bekunsonganga ngemba ko. Muna vova e ludi ke bezayanga ko vo diambu diambi bavangidi.”

Kasikil’owu, kuna nsi ya Bálcãs kuna kazingilanga Jovica, kuna ye kanda diandwelo. Jovica wavova vo: “Yayindulanga vo muna kanda diadi, ke muna muntu ambote ko. Kansi, kiazaya wo ko vo mpambula yasianga. Kadi yabanzanga vo mana yazaya mu kuma kiau, maludi.”

Tuyalu twayingi tusikidisanga e nsiku misimanga fu kia menga wantu a makanda mankaka ye fu kia sia mpambula. Kansi, e fu kiaki kikwamanananga kaka. Ekuma? Kadi nsiku miami mavangu ma wantu kaka misimanga. E nsiku miami ke misimanga e ngindu za wantu ko. E fu kia sia mpambula mu ngindu ye ntima kiyantikilanga. Nga disongele vo ke tulendi sunda e fu kia sia mpambula ko? Nga vena ye malongi malenda fokola e fu kiaki?