Wantu ayingi besadilanga e nkanikinu miyikilu muna malongi mavitidi, belendanga katula e fu kia sia mpambula muna ntima miau. Kieleka, muna ngolo za yeto kibeni ke tulendi katula emvimba e fu kia sia mpambula muna ntima mieto ko. Nga e fu kia sia mpambula kifokoka emvimba?

O luyalu lwa muntu ke lulendanga sadisa wantu ko mu katula e fu kia sia mpambula. Nga ediadi disongele vo ke vena luyalu ko lulenda fokola e fu kia sia mpambula?

O luyalu lulenda fokola emvimba e fu kia sia mpambula lufwete:

1. 1. Sadisa o wantu basoba e ngindu zau ye mpila bebadikilanga akaka.

2. 2. Sadisa awana bamweswa e mpasi mu kuma kia fu kia sia mpambula balembi vutula mbi muna mbi.

3. 3. Kala ye afidi ana ke bena ye fu kia sia e mpambula ko.

4. 4. Yikakesa o wantu a nsi zawonso.

Bibila kivovanga vo Nzambi wasikidisa o luyalu lwa mpila yayi. O luyalu lwalu luyikilwanga vo “Kintinu kia Nzambi.”—Luka 4:43.

Tala mana lulungisa o luyalu lwalu:

‘Awana bezingila muna nsi besinga longoka unsongi.’—YESAYA 26:9.

“O nlut’a unsongi wakieleka ukala se luvuvamu, o nsendo a unsongi wakieleka ukala se luvuvamu yo lutaninu lwakwele mvu.”—YESAYA 32:17.

Aweyi disongele? Kintinu kia Nzambi kilonga o wantu oma mansongi. Vava o wantu bezaya swaswanesa o wete yo bi, unsongi yo lembi songa e mpil’au ya badikila muntu yo nkwandi isoba. Wantu awonso bezaya wo vo e diambu diambote bafwete vanga i zola o wantu a mpila zawonso.

Nzambi “okunguna mansanga mawonso muna meso mau, o lufwa ke lukala diaka ko, ngatu kala diaka dilu, yovo kazu ngatu mpasi. O mambu mantete maviokele.”—LUSENGOMONO 21:4.

Ayeyi i nsas’a sono kiaki? E Kintinu kia Nzambi kifokola mpasi zawonso bemonanga o wantu mu kuma kia kondwa kwa unsongi. Wantu awonso bamweswa e mpasi ke bekala diaka ye kuma ko kiakala ye kudi muna ntima.

“Ke fundisila muna mbona meso ko, ngatu tumbila kaka mu dina kawidi. Ofundisila nsukami muna unsongi, otumbila kuna ziku muna wete dia alembami a nza.”—YESAYA 11:3, 4.

Ayeyi i nsas’a sono kiaki? Yesu Kristu wa Ntinu a Kintinu kia Nzambi kuna zulu, oyadila kuna unsongi ye kesia mpambula ko. Yesu ke yangalela zula kimosi ko yo menga kiankaka, ovanga mawonso kimana awonso ova nza balemvokela e nsiku miandi.

E Kintinu kia Nzambi kilonganga wantu bakala “yo nyindu mosi, nzola mosi, akwa ntima mosi ye kani dimosi.”—FILIPI 2:2.

Ayeyi i nsas’a sono kiaki? O wantu muna Kintinu kia Nzambi mu kintwadi kikilu bekala. Bekala yo “nyindu mosi” kadi betoma zolana muntu yo kwandi.