Bafwan’o Tambula Kintinu
Bafwan’o Tambula Kintinu
“I mona-meso kia lufundisu luansongi lua Nzambi; nwafwaneswa muna kintinu kia Nzambi.”—2 TES. 1:5.
1, 2. Adieyi i kani dia Nzambi mu kuma kia mfundisa? Nani okala se mfundisi?
MUNA mvu a 50 wa tandu kieto, Paulu wa ntumwa mu mbanza Atenai kakala. Watokana kwayingi vava kamona ulolo wa nsambila za teke muna mbanza yayi. Ediadi diamfila mu sila umbangi kuna ndekwa zawonso. Wafokola elongi diandi ye mvovo miasimba e ntima mia esi zula ana bawanga. Wavova vo: “Owau [Nzambi] okanikini wantu awonso, mwawonso, bavilukw’e ntima: wau kasidi e lumbu, kina kefundisil’e nza muna nsongi muna muntu ndiona katumba kio, ediadi kasikidisa dio kwa wantu awonso, wau kamfula muna mafwa.”—Mav. 17:30, 31.
2 Diamfunu kikilu mu fimpa e diambu diadi, wau vo Nzambi wasikidisa lumbu kefundisa e nza. Mun’elongi diandi kuna Atenai, Paulu kavova ko e nkumbu ya ndiona osinga fundisa wantu, kansi oyeto tuzeye wo vo muntu ndioyo i Yesu Kristu ona wafulwa muna mafwa. O fundiswa kwa Yesu kulenda kutufila ku moyo yovo ku lufwa.
3. Ekuma Yave kakangila ekangu yo Abarayama? Nani una ye kiyekwa kiampwena muna ndungan’ekangu diadi?
3 E Lumbu kiaki kia Lufundisu, 1.000 dia mvu kizingila. O Yesu ofundisa muna nkumbu a Yave nze Ntinu a Kintinu kia Nzambi, kansi kekala yandi mosi ko. Yave wasola akaka vana vena wantu, mu yala kumosi yo Yesu mu fundisa e nza, mun’ezunda dia mvu. (Tezanisa ye Luka 22:29, 30.) Se vioka 4.000 ma mvu, Yave wasikidisa e Lumbu kiaki kia Lufundisu vava kakanga ekangu yo selo kiandi kiakwikizi, Abarayama. (Tanga Etuku 22:17, 18.) Ekangu diadi diasikidiswa muna mvu a 1943 vitila Kristu. Kieleka, Abarayama katoma bakula ko o mfunu w’ekangu diadi mu kuma kia wantu. Kansi, o unu tulenda mona una e mbongo a Abarayama kelungisilanga dina diayikwa mun’ekangu diadi, mu lungisa ekani dia Nzambi dia fundisa e nza.
4, 5. (a) Nani wantete muna mbongo a Abarayama? Adieyi kavova mu kuma kia Kintinu? (b) E vuvu kia yala muna Kintinu nkia ntangwa kiayantika?
4 Ona wantete muna mbongo a Abarayama i Yesu, ona wakuswa muna mwand’avelela, muna mvu a 29 wa tandu kieto yo kituka se Masia yovo Kristu ona wasilwa nsilu. (Ngal. 3:16) Yesu wasala e salu kia samun’e nsangu zambote za Kintinu kw’Ayuda mu mvu ntatu ye ndambu. Vava Yoane wa Mvubi kasiwa mu pelezo, Yesu wasonga vo vesinga kala y’akaka bekala ye vuvu kia yala muna Kintinu. Wavova vo: “Tuka muna tandu kia Yoane wa Mvubi yamu wau, e kintinu ki’ezulu se mu ngolo kaka, akwa ngolo se zavuna kio.”—Mat. 11:12.
5 Una kayikidi ko ana ‘bezavuna’ e Kintinu ki’ezulu, Yesu wavova vo: “Kieleka inusamunwini vo, mun’awana bawutuka kw’akento, ke mutundalele mosi ko, on’osundidi Yoane wa Mvubi o nene: kansi ona wandwelo muna kintinu ki’ezulu unsundidi o nene.” (Mat. 11:11) Ekuma kavovela e mvovo miami? E kuma kadi, e vuvu kia yala muna Kintinu ke kiavewa kwa selo ya kwikizi ko ekolo mwand’avelela ka ubungwilu ko kina kia Pentikosti ya mvu a 33 wa tandu kieto. Muna kolo kiakina, Yoane wa Mvubi wayifwila kala.—Mav. 2:1-4.
E Mbongo a Abarayama Yabadikilwa vo Yansongi
6, 7. (a) E mbongo a Abarayama aweyi yakitukila “nga ntetembwa z’ezulu”? (b) Abarayama nkia nsambu kavwa ye nkia nsambu zivwa e mbongo andi?
6 Abarayama wavoveswa vo e mbongo andi yisayana yo kituka “nga ntetembwa z’ezulu,” nga esenge van’ekumu dia kalunga. (Etu. 13:16; 22:17) Muna mvovo miakaka, muna lumbu ya Abarayama diampasi diakala kwa wantu mu zaya lutangu lwa mbongo yayi. Kansi, lutangu lwa mbongo ya mwanda ya Abarayama lwazayakana. Katula Yesu, o lutangu lwalu i 144.000.—Lus. 7:4; 14:1.
7 Muna kuma kia lukwikilu lwa Abarayama, Nkand’a Nzambi uvovanga vo: “[Abarayama] okwikidi muna Yave: umbadikidi dio vo ndungidi.” (Etu. 15:5, 6) Kieleka, ke vena muntu ko una vo wansongi muna mawonso. (Yak. 3:2) Kansi, wau vo Abarayama nkwa lukwikilu kakala, Yave wambadikila vo wansongi yo kunyikila nkutu vo nkundi andi. (Yes. 41:8) Awana bena entwadi yo Yesu muna mbongo a mwanda ya Abarayama, bebadikilwanga mpe vo asongi. Ediadi dikubatwasilanga nsambu zayingi ziviokele zina katambula Abarayama.
8. Nki’elau bena diau e yikwa ya mbongo a Abarayama?
8 Akristu akuswa bebadikilwanga vo asongi, kadi bekwikilanga muna kimenga kia lukulu lwa Yesu. (Roma 3:24, 28) Muna meso ma Yave, balungiswa mun’esumu yo kuswa muna mwand’avelela nze wan’a Nzambi a mianda, mpangi za Yesu Kristu. (Yoa. 1:12, 13) Bekotanga mun’ekangu diampa yo kituka se zula kiampa, “Isaele a Nzambi.” (Ngal. 6:16; Luka 22:20) Kieleka, elau diadi diampwena kikilu. Muna kuma ki’evangu diadi dia Nzambi muna wete diau, Akristu akuswa ke bena ye vuvu kia zingila va ntoto yakwele mvu ko. Bayambula e vuvu kiaki mu kuma ki’elau dia yikama Yesu muna Lumbu kia Lufundisu yo yala yandi kumosi kun’ezulu.—Tanga Roma 8:17.
9, 10. (a) Nkia ntangwa bakuswa Akristu muna mwand’avelela e nkumbu antete? Adieyi divavwangwa kwa yau? (b) Nkia lusadisu betambulanga Akristu akuswa?
9 Kina kia Pentikosti ya mvu a 33 wa tandu kieto, buka ki’akwa kwikizi bavewa elau dia yala kumosi yo Yesu muna Lumbu kia Lufundisu. Tezo kia 120 m’alongoki a Yesu bavubwa muna mwand’avelela yo kituka Akristu antete akuswa. Kansi, muna vwila moyo kun’ezulu, ediadi diakala se lubantiku kuna kwa yau. Tuka muna lumbu kiakina, divavanga vo basonga kwikizi kiau muna Yave, kana una vo betontwanga kwa Satana. Bafwete sikila ye kwikizi yamuna lufwa, kimana batambula e kolow’a moyo kun’ezulu.—Lus. 2:10.
10 Muna sikila ye kwikizi, Yave muna Diambu diandi ye nkutakani y’Akristu, ovananga Akristu akuswa luludiku yo lukasakeso bevwanga o mfunu. Kasikil’owu, Paulu wa ntumwa wasonekena Akristu akuswa kuna Tesalonika vo: ‘Nz’ese kwa wan’andi, twanuwondelelanga yo kunukasakesanga, yo sia umbangi, nwakangal’e nkangala ifwene Nzambi, on’okunubokelanga muna kiandi kintinu, yo nkembo.’—1 Tes. 2:11, 12.
11. O Yave nkia lusansu kasonekesa mu kuma kia “Isaele a Nzambi”?
11 Vioka 60 ma mvu, tuka yikwa yantete ya nkutakani y’Akristu akuswa basolwa, Yave wasonekesa lusansu lwa salu kia Yesu ova ntoto ye una kakadila y’Akristu akuswa a tandu kiantete ye luludiku kabavana. Muna mpila yayi, Yave wakudikila e Sono ya Kingerekia ya Kikristu vana ntandu a Sono ya Kiyibere. E Sono ya Kiyibere yasonekwa mu kuma kia Isaele ya nitu vava bakala ye ngwizani ambote yo Nzambi. E Sono ya Kingerekia ya Kikristu yasonekwa mu kuma kia “Isaele a Nzambi” ana bakuswa nze mpangi za Kristu ye wan’a Nzambi a mianda. Kansi, ediadi ke disonganga ko vo awana bena vo ke Aneyisaele ko ke balendi baka nluta ko muna longokang’e Sono ya Kiyibere. Diau adimosi, Akristu ana ke bakuswa mu mwand’avelela ko balenda baka nluta miayingi muna longoka yo landa luludiku luna muna Sono ya Kingerekia ya Kikristu.—Tanga 2 Timoteo 3:15-17.
12. O Paulu nkia diambu kasungamesa Akristu akuswa?
12 Akristu a tandu kiantete babadikilwa vo asongi yo kuswa muna mwand’avelela, kimana bakala bafwana mu tambul’evwa diau kun’ezulu. O tambula evwa diadi ke dikubasianga va ntandu akw’au Akristu akuswa ko ana ben’ova ntoto. Nanga akaka muna Akristu a tandu kiantete bavilakana e diambu diadi, kadi bayantika vava etunda vana vena mpangi zau muna nkutakani. Muna kuma kiaki, Paulu wabavovesa vo: “Nwavwa yukuta kala, nwavwa vwama kala, nuyele, yeno ke mu yeto: kadi kala vo nuyala, oyeto twayala yeno.” (1 Kor. 4:8) I bosi, Paulu wasungamesa Akristu akuswa a tandu kiandi vo: “Ke sia ko vo kimfumu tuna kiau muna lukwikilu lueno, tu asadisi kaka mun’ekembo dieno.”—2 Kor. 1:24.
Ndungis’a Lutangu Lwasikidiswa
13. E nsola ya Akristu akuswa aweyi inungunukinanga tuka muna mvu a 33 wa tandu kieto?
13 Ke Akristu awonso ko akuswa, 144.000, basolwa muna tandu kiantete. E nsolwa y’Akristu akuswa yakala muna tandu ki’antumwa yamu tandu yalanda ye yakinu yamu lumbu yeto. (Mat. 28:20) Vava Yesu kayantika yala muna mvu a 1914, e diambu diadi dianungunuka mu nzaki.
14, 15. Adieyi divangamanga mu lumbu yeto mu kuma kia nsola y’Akristu akuswa?
14 Entete, Yesu wavelelesa ezulu muna vaikisa awonso batelamena e kimfumu kia Nzambi. (Tanga Lusengomono 12:10, 12.) I bosi, wasia sungididi mu kutakesa awana beyala yandi entwadi muna Kintinu kiandi kimana kalungisa lutangu lwa 144.000. Muna mvu mia 1930, akete kaka basala mu lungisa lutangu lwalu. Ayingi muna awana batambulwilanga e nsangu zambote ke bakala diaka ye vuvu kia kwenda kun’ezulu ko. O mwanda ke wasianga umbangi ko vo yau mpe wan’a Nzambi. (Tezanisa ye Roma 8:16.) Babakula vo mu buka kia “mameme makaka” bena, ki’awana bena ye vuvu kia zinga yakwele mvu muna paradiso ova ntoto. (Yoa. 10:16) Muna kuma kiaki, tuka muna mvu a 1935, e sungididi muna salu kia samuna nsangu zambote kiayantika siwa mu kutakesa e “ndong’ayingi,” ina kamona o Yoane wa ntumwa muna mona-meso, ina isala yo moyo muna “mpasi zayingi.”—Lus. 7:9, 10, 14.
15 Kansi, tuka muna mvu mia 1930, vena yo wantu besolwanga ye vuvu kia kwenda kun’ezulu. Ekuma? Dilenda kala vo besolwanga mu vinga va fulu ki’awana bateka solwa kansi bayambula e ludi. (Tezanisa ye Lusengomono 3:16.) Paulu wayika nkutu awana kazaya babembola ludi. (Fili. 3:17-19) Nani kesolanga o Yave mu vinga vana fulu yau? Yandi kaka wafwana bak’e nzengo zazi. Tuna ye ziku vo Yave kesolanga wantu ampa ko muna ludi, kansi, awana basonga kala e kwikizi kiau nze alongoki ana kayika Yesu vava kasikidisa o nkinzi a Luyindulu. *—Luka 22:28.
16. Muna kuma ki’akuswa, adieyi tufwete vutulwila matondo? Nkia vuvu tufwete kala kiau?
16 Kansi, nanga ke awonso ko muna awana besolwanga mu kwenda kun’ezulu tuka muna mvu mia 1930, i bevinganga va fulu ki’awana bayambula lukwikilu. O Yave nanga wasikidisa vo twakala kumosi ye Akristu akuswa mu lumbu yambaninu ya tandu kiaki, yavana kifwaswa “Babele Anene.” * (Lus. 17:5) Tulenda kala ye vuvu vo lutangu lwawonso lwa 144.000 lulunga muna ntangwa kasikidisa o Yave, i bosi awonso betambula o nsendo au wa yala muna Kintinu. Tulenda kwikila mpe muna Diambu diasakuka disonganga vo e ndong’ayingi izindalala songa kwikizi kiau. Ke kolo ko, ‘bevaika muna mpasi zayingi’ zibwila e nza ya Satana yo kota ye kiese kiawonso muna nz’ampa ya Nzambi.
E Kimfumu kia Nzambi Ki’ezulu se Kilungana
17. Adieyi diasonama muna 1 Tesalonika 4:15-17 ye Lusengomono 6:9-11, dibwilanga Akristu akuswa ana bezizilanga yamuna lufwa?
17 Tuka muna mvu a 33 wa tandu kieto, Akristu ayingi akuswa besonganga lukwikilu lwasikila yo zizila yamuna lufwa. Akristu awaya bafwaniswa mu tambula Kintinu ye tuka lubantiku lwa nkal’a Kristu muna Kintinu, bevewanga nsendo au kun’ezulu.—Tanga 1 Tesalonika 4:15-17; Lusengomono 6:9-11.
18. (a) Nkia vuvu bena kiau Akristu akuswa aya bakinu ova ntoto? (b) E mameme makaka aweyi bebadikilanga ampangi zau z’Akristu akuswa?
18 Akristu akuswa ana bakinu ova ntoto bena ye ziku vo avo bezindalala ye kwikizi, ke kolo ko yau mpe betambula nsendo au kun’ezulu. Vava ndong’ayingi ya mameme makaka bemonanga e kwikizi kia mpangi zau z’akuswa, bevovanga nze una wavova Paulu wa ntumwa kwa mpangi zandi z’akuswa kuna Tesalonika vo: “Tukunusaninanga muna mabundu ma Nzambi, oyeto kibeni, muna diambu dia luzindalalu lueno, yo lukwikilu, muna mbangama zeno zawonso, yo muna mpasi zina numonanga; i mona-meso kia lufundisu luansongi lua Nzambi; nwafwaneswa muna kintinu kia Nzambi, kina numwenene mpasi.” (2 Tes. 1:3-5) Vava kifwa oyu wansuka muna Akristu akuswa bena ova ntoto, o lutangu lw’awana beyala muna kimfumu ki’ezulu kia Nzambi lulunga. Ekwe kiese kikala kun’ezulu y’ova ntoto!
[Mvovo ku yanda dia lukaya]
^ tini. 15 Tala mun’Eyingidilu dia 1 Malusu, 1992, Lukaya lwa 20, tini kia 17 mu kimputu.
^ tini. 16 Tala “Yuvu Y’atangi” mun’Eyingidilu dia 1 Mayu, 2007 mu kimputu.
Nga Olenda Sasila?
• O Yave adieyi kasengomona kwa Abarayama mu kuma kia Lumbu kia Lufundisu?
• Ekuma Abarayama kabadikilwa vo wansongi?
• O badikilwa vo asongi nkia nsambu diatwasa kwa mbongo a Abarayama?
• Nkia vuvu bena kiau Akristu awonso?
[Juvu ja longokela]
[Foto ina muna lukaya lwa 20]
Yesu wakasakesa alongoki andi basia ngolo mu vwa Kintinu
[Foto ina muna lukaya lwa 21]
Kina kia Pentikosti ya mvu a 33 wa tandu kieto, Yave wayantika sola e yikwa yakaka ya mbongo a Abarayama
[Mafoto zina muna lukaya lwa 23]
Mameme makaka bevutulanga matondo mu kala entwadi y’Akristu akuswa mu lumbu yayi yambaninu