Batomesa e Zingu Kiau nga Ngeye mpe Olenda wo Vanga?
Batomesa e Zingu Kiau nga Ngeye mpe Olenda wo Vanga?
MARC, mpangi wa mwisi Canadá, wasadilanga ku fulu kivanganga e sadilwa ya makumbi m’ezulu. Ndambu a lumbu kasadidinge yo sala mpe se mviti a nzila a ngonde ke ngonde. Kuna kwalanda, mfumu andi a salu, wazola sia Marc va fulu kifutwanga nzimbu zayingi, kansi kiavavanga vo kasalanga lumbu kiamvimba. Adieyi kavanga o Marc?
Amy, mpangi ankento wa mwisi Filipinas, salu kia mviti a nzila a ngonde ke ngonde kasadidinge vava katanganga e sikola zampwena. Vava kafokola e sikola, wavewa elau dia futwa nzimbu zayingi mu sala e salu kiavavanga ntangwa yayingi. Adieyi kasola Amy?
Marc ye Amy nzengo zaswaswana babaka, e mfoko ya nzengo zau isonga o mfunu w’elongi diavewa kw’Akristu muna Korinto ankulu. Paulu wa ntumwa wasoneka vo: ‘Ana besadilanga nza yayi, nze ana ke besadilanga yo ko.’—1 Kor. 7:29-31.
Kusadila Mvimba e Nza Ko
Una katuwidi ko e mfoko ya nzengo zabaka Marc ye Amy, yambula twafimpa e nsas’a mvovo “nza” (yovo koʹsmos muna Kingerekia) una kasadila o Paulu muna nkand’andi kwa esi Korinto. Muna sono kiaki, o mvovo koʹsmos nza uyikanga, i sia vo wantu awonso kumosi ye lekwa tuvwang’o mfunu muna zingu nze nzo, madia ye mvwatu. * Muna vwa e lekwa yayi, divavanga vo twasala. Kieleka, muna lungisa e mbebe eto ya Kikristu ye nsatu zeto, y’esi nzo eto, divavanga vo twasadila e nza. (1 Tim. 5:8) Kansi, tusungamenanga vo “e nza mpe vempoka ivempoka.” (1 Yoa. 2:17) Idianu vo, ke tusadilanga ‘mvimba’ e nza ko, kansi mu tezo.—1 Kor. 7:31.
Muna landa elongi dia Nkand’a Nzambi dia lembi sadila emvimba e nza, mpangi zayingi zamakala ye zamakento befimpanga mpila zingu kiau, yo vava salu kia ndambu a lumbu mu vevola e zingu kiau. Vava bevanganga wo, bemonanga vo zingu kiau kisikidi, wau vo bekalanga ye ntangwa yafwana mu sala salu kia Yave yo kala vamosi y’esi nzo zau. Vana ntandu, ovevola e zingu dikubasadisanga mu toma kuyivana muna salu kia Yave, ke mu funtuka mu kuma kia nza ko. Ng’olenda vanga diau adimosi mu vevola e zingu kiaku, kimana wasia e Kintinu kia Nzambi va fulu kiantete?—Mat. 6:19-24, 33.
“Ngwizani eto yo Yave Yawokela”
Marc, on’oyikilu kuna lubantiku, wasadila elongi dia Nkand’a Nzambi dia lembi sadila mvimba e nza. Katambulwila ko elau dia salu kina kavewa. Vioka fikolo, mfumu andi a salu wansonga ulolo wa nzimbu kadi futwa, kele vo katambulwil’e salu kiampa. Marc wavova vo: “Diampasi diakala, kansi kiazola ko.” Wasonga e kuma: “Omono yo Paula wa nkaz’ame mu salu kia Yave twazola kuyivana. I kuma vo, twabaka e nzengo za vevola e zingu kieto. Twalomba ngangu kwa Yave muna sambu kimana twalungisa ekani dieto yo sikidisa e lumbu kina tukuyivana emvimba muna salu kia Yave.”
Paula wavova vo: “Lumbu tatu yasalanga muna lumingu nze nsoneki kuna lupitalu yo futwa nzimbu zayingi. Yasalanga mpe nze mviti a nzila a ngonde ke ngonde. Kansi, yazola sadila Yave nze Marc muna zunga ina yo mfunu ateleki a Kintinu. Vava yabak’e nzengo za katuka mu salu, o mfumu ame a salu wampovesa vo mono yasolwa mu sala vana fulu kia nsoneki ambuta eki kiavavilwanga muntu. E salu kiaki, nzimbu zayingi kiafutanga, kansi kiasoba ko e nzengo yabaka. Vava yavovesa mfumu ame e kuma kiatondela ko e salu kiakina, wansanisina mu kuma kia lukwikilu lwame.”
Ke kolo ko, Marc yo Paula bafilwa mu salu kia kimviti a nzila a espesiale mu nkutakani yakete kuna zunga kimosi kia Canadá. Adieyi diabwa vava bayenda? Marc wavova vo: “Wonga yakala wau vava ya yambula e salu yasalanga mu mvu miayingi, kiampananga nzimbu zayingi, kansi Yave wasambul’e salu kieto kia umbangi. Tukalanga ye kiese kia sadisa akaka mu sadila Nzambi. E salu kia ntangwa ke ntangwa kiatomesa mpe longo lweto. E moko yeto ya mambu masundidi kaka o mfunu, oma ma mwanda. E ngwizani eto yo Yave yawokela kikilu.” (Mav. 20:35) Paula wakudikila vo: “Vava muntu keyambulanga e salu ye nzo ambote, kafwete sia e vuvu kiandi kiawonso muna Yave. I wau twavanga, o Yave mpe watusambula. O zola twasongwa kw’ampangi zamakala ye zamakento muna nkutakani eto yampa kwatusadisa mu zaya vo mfunu batuvwanga. Owau nsadilanga e ngolo yafwasanga mu salu kia kinsuni mu sadisa wantu muna mwanda. Kiese kiayingi ngina kiau mu sala e salu kiaki.”
‘Yakala Mvwama, Kansi Kiakalanga ye Kiese Ko’
Amy ona tuyikidi kala, nzengo zakaka kabaka. Watambulwila salu kavewa kiamfutanga nzimbu zayingi, kansi ntangwa yayingi kiavavanga. Amy wavova vo: “Muna mvu wantete, yasalanga mpe salu kia umbangi. Kansi, vana fulu kia sia mambu ma Kintinu va fulu kiantete, malembe malembe yayantika kuyivana mvimba muna salu kia kinsuni. Yavewanga elau diayingi dia nungunuka muna zingu yo yantika fwasa ngolo zame mu vava kala y’etunda. Ekolo e mbebe yawokelanga kuna salu, kiakalanga diaka ye ntangwa yafwana ko ya sala salu kia umbangi. Kuna kwakwiziwa, yayambula mvimba salu kia umbangi.”
Amy osungamenanga lumbu yayina yavioka yo vova vo: “Nzimbu zayingi yakala zau. Yakangalanga kwayingi yo yangalela etunda yakala diau muna salu kiame. Kansi, kiakalanga ye kiese ko. Kana una vo nzimbu zayingi yakala zau, mambu mayingi mantokanesanga, kiazayanga etuku dia mpasi zazi ko. I bosi, yabakula vo, wau yayivana muna salu ya nza, yayantika ‘tungiana muna lukwikilu.’ Yamona kikilu e ziku kia mvovo mia Diambu dia Nzambi, yayisia muna ‘mbidi a mpasi.’”—1 Tim. 6:10.
Adieyi kavanga Amy? Wavova vo: “Yalomba kw’akuluntu bansadisa, yavutukila kala ye mavimpi muna mwanda yo kwenda muna tukutakanu. Lumbu kimosi, ekolo kiayimbilwanga nkunga yadila. Yasungamena e kiese yamona muna mvu ntanu yasala salu kia kimviti a nzila, kana una vo nsukami yakala. Yamona vo mfwete vutukila sia mambu ma Kintinu va fulu kiantete mu lembi fwasa diaka ntangwa mu vava nzimbu zayingi. Yatambulwila sala salu kiakaka yo futwa ndambu a nzimbu zina yafutwanga yo kuyivana diaka mu salu kia samun’e nsangu zambote.” Kuna kiese kiawonso, Amy wavova vo: “Yamon’e kiese kia sala nze mviti a nzila mu fikolo. Owau e kiese monanga kilutidi kina yamonanga vava yasadilanga e nza.”
Ng’olenda vang’e diambu mu vevola mpila zingu kiaku? Kele vo ovawidi e ntangwa mu wokesa e salu kia Kintinu, ongeye mpe olenda tomesa zingu kiaku.—Nga. 10:22.
[Mvovo ku yanda dia lukaya]
^ tini. 6 Tala muna nkanda Estudo Perspicaz das Escrituras, Volume 3, lukaya lwa 40-41.
[Foto muna lukaya 19]
Ng’olenda vang’e diambu mu vevola mpila zingu kiaku?
[Foto muna lukaya 19]
“Ntoma Yangalelanga Salu Kiaki!”
David, nkuluntu a nkutakani Akristu kuna Estados Unidos, wazola yikama nkaz’andi yo wana mu salu kia ntangwa ke ntangwa. Wabaka e salu kia ndambu a lumbu kuna kompani kasadilanga yo sala se mviti a nzila a ngonde ke ngonde. Nga dina kavanga diatomesa e zingu kiandi? Ke vavioka ngonde zayingi ko, David wasonekena nkundi andi vo: “Ke vena diambu dilutanga kumpana kiese ko, avo ke kuyivana emvimba ko muna salu kia Yave kumosi y’esi nzo ame. Dialudi vo mpasi dina mu kulukilwa e salu kia kimviti a nzila, kansi ntoma yangalelanga salu kiaki! Dialukasakeso kikilu.”
[Foto ina muna lukaya lwa 18]
Marc yo Paula muna salu kia umbangi