Eyingidilu Diampa dia Longoka

EYINGIDILU diadi otanganga, i diantete dia longoka. Tuzolele kuzayisa e mpila dikala.

Eyingidilu dia longoka dikubikilu mu kuma kia Mbangi za Yave ye alongoki a Nkand’a Nzambi ana benungunukanga. Nkumbu mosi divaika muna konso ngonde. Malongi maya yovo matanu ma longoka mekala mo. E ntu mia mambu mia malongi melongokwa misonama va fukwa ki’Eyingidilu. Nswaswani y’Eyingidilu dia nkangu, Eyingidilu dia longoka ke dikala ye fukwa ya fwaniswa ya mpila mu mpila ko, wau vo ke dikaywa kwa nkangu ko muna salu kia umbangi.

Muna lukaya lwa 2 lw’Eyingidilu, omona e mvovo miankufi misonga ekani dia konso longi ye ntu mia mambu makaka. Mambu mama mesadisa afidi elongi di’Eyingidilu, ekolo bekubikanga elongi dilongokwa muna lukutakanu.

Omona vo malongi ma longoka mateza kufikwa, ka nze m’Eyingidilu diankulu ko. Ediadi, divana ntangwa yafwana mu fimpa e sono yasina ekolo kifilwanga Elongi di’Eyingidilu. Tuwondelele watanganga sono yawonso ya Nkand’a Nzambi yiyikilu. Sono yakaka yasonama vo “tanga,” yifwete tangwa yo sasilwa ekolo kifilwanga Elongi di’Eyingidilu. E sono yakaka mpe, yilenda tangwa kele vo ntangwa yina. Muna malongi makaka omona e sono yasonama vo, “tezanisa.” Wau vo e sono yayi ke yisonganga e mbuta diambu ko muna konso tini ki’elongi, nkumbu miayingi ke yitangwa ko muna lukutakanu. Kana una vo i wau, e sono yasonama vo “tezanisa” yivwidi mambu mamfunu, ilenda kutuvana e ngindu zakaka zina tulenda kotesa muna diambu dilongokwa. Tuwondelele watanganga yo vava okubikanga Elongi di’Eyingidilu. Nanga, olenda yo yika muna mvutu zaku.

E nsangu za salu kia mvu amvimba ke zivaikiswa diaka mun’Eyingidilu ko. Tuka mvu a 2008, e nsangu zazi zivaikiswa muna Salu Kieto kia Kintinu ye muna Anuário. Nze una tuyikidi kala, mun’Eyingidilu dia longoka mukala mpe ye malongi makaka. Kana una vo mengi muna malongi mama ke melongokwa muna nkutakani ko, okasakeso mu toma mo tanga. Kadi, omama mpe madia ma mwanda oma tuvewanga kwa “ntaudi akwikizi yo lulungalalu.”​—⁠Mat. 24:​45-47.

Muna fokola, Eyingidilu dia longoka y’edi dia nkangu ke dina y’ekani diaswaswana ko. Kadi, mau mole mena se Eyingidilu Disamunanga Kintinu kia Yave. Muna lukaya lwa 2 muna ye mvovo misonganga ekani di’Eyingidilu. Mau mole mekoteswa muna volume encadernado ya konso mvu. Malongi m’Eyingidilu dia longoka y’edi dia nkangu mevaikiswa mu tini kivovanga vo “Nga Osungamenanga?” mun’Eyingidilu dia longoka.

Tuka mvu a 1879, Eyingidilu disamunanga e ludi mu kuma kia Kintinu kia Nzambi, kana nkutu mu ntangwa vita, lutonto ye mpasi za nzimbu. Tusambanga vo, muna nsambu za Yave diakwamanana wo vanga mun’Eyingidilu diadi diampa. Tusidi e vuvu vo Yave okusambula ekolo otoma sadila Eyingidilu diadi diampa dia longoka.