“Toma Tala Uselo una Watambula Muna Mfumu”
“Toma Tala Uselo una Watambula Muna Mfumu”
“Toma tala uselo una watambula muna Mfumu, walunganisa wo.” —KOL. 4:17.
1, 2. Akristu nkia mbebe bena yau kuna kwa wantu?
MBEBE ampwena tuna yau muna wantu aya batuzungidi. E nzengo bebaka o unu, zilenda kubatwasila moyo yovo lufwa muna lumbu ya “mpasi zayingi.” (Lus. 7:14) E mvovo miavumunwinwa mia nkand’a Ngana mivovanga vo: ‘Kôl’awana befilwa kuna lufwa, awana se bevondwa, ubavuluza kaka.’ Kieleka, e mvovo miami mina ye nsasa. Tulenda bwa mu nkanu a menga avo tuyambwidi lukisa wantu mu kuma kia nsola bafwete vanga. E sono kiaki kivovanga mpe vo: “Ovo ovova vo, ke tuzeye wo ko: Wa! On’omika ntima, kebakula wo ko e? On’olunga-lunga moyo aku, kezaya wo ko e? Kavutula kwa muntu muna mavangu mandi.” Kieleka, e selo ya Yave ke balendi vova ko vo ‘ke bazeye wo ko’ vo wantu mu vonza bena.—Nga. 24:11, 12.
2 E mioyo mia wantu mfunu mina kwa Yave. Owondelelanga selo yandi mu vanga mawonso balenda mu vuluza mioyo mia wantu ayingi. Konso selo kia Nzambi kafwete zayisa kw’akaka e nsangu za luvuluku zina muna Diambu dia Nzambi. E salu kieto kiafwanana ye kina kiasalanga nyingidi ona walukisanga wantu vava kiafinamanga e vonza. Ka tuzolele nata nkanu a menga ma wantu aya bevondwa ko. (Yez. 33:1-7) Ozevo, diamfunu kikilu twazindalala muna salu kieto kia ‘teleka nsangu zambote.’—Tanga 2 Timoteo 4:1, 2, 5.
3. Nkia mambu mebadikwa mun’elongi diadi ye mamole melanda?
3 Elongi diadi disonga e mpila olenda sundila nkakalakani muna salu kiaku kia umbangi ye mpila olenda sadisila wantu ayingi. Elongi dilanda disonga una olenda kitukila se nlongi ambote. Elongi dietatu disonga e nluta miambote mibakanga ateleki a Kintinu mu nza yawonso. Una ke twafimpidi mambu mama ko, yambula twazaya ekuma lumbu yeto yinina ya mpasi.
Ekuma Akaka Bakondelo Lukwikilu
4, 5. Nkia mambu mebwilanga wantu ye adieyi bevanganga?
4 Mambu mebwanga omu nza mesonganga vo mu “mbaninu a tandu” tuzingilanga. Wantu mu mona bena e mpasi za mambu mebwanga, mana Yesu y’alongoki andi bavova vo mekala se sinsu kia “lumbu yambaninu.” Emaka muna “nsongo” yovo mpasi zazi i vita, nzala, nzakama za ntoto ye mambu makaka mebangikanga o wantu. E fu ki’eloko, umpumbulu, yo lembi vumina Nzambi mu wokela kaka yina. E “lumbu yambaninu” yampasi kikilu kana nkutu kw’awana besianga ngolo za lemvokela e nsiku mia Nkand’a Nzambi.—Mat. 24:3, 6-8, 12; 2 Tim. 3:1-5.
5 Kansi, ndonga ya wantu ke bazeye ko e nsasa za mambu mevangamanga ova nza. Muna kuma kiaki, balutidi tokanena mambu ma zingu kiau ye kia esi nzo zau. O fwilwa nzolwa yovo sumbula yakaka, nkenda zayingi ditwasanga kw’akaka. Wantu awaya ke bena ye vuvu ko kadi kebazeye ko, ekuma mambu mama mevangamenanga ye una malenda fokokela.—Ef. 2:12.
6. E “Babele Anene” nkia kuma ke yilendelanga sadisa alandi andi ko?
6 “Babele Anene,” kintwadi kia nsambila zawonso za luvunu ova nza, ke yitwasanga lufiaulwisu lwafwana ko kwa wantu. Kansi, muna kuma kia “vinyo a zumba yandi,” osianga ulolo wa wantu muna mvwang’a kimwanda. Vana ntandu, wau vo nkembi, e nsambila ya luvunu yivukumunanga yo fila “antinu mia nza,” osadilanga mpe malongi ma luvunu ye mavangu ma mpandu kimana o nkangu wakala muna nsi a wisa kia ayadi au. I ntundalala yatundalal’e nsambila ya luvunu yo bembola emvimba e ludi.—Lus. 17:1, 2, 5; 18:23.
7. Adieyi divangamanga kwa ndonga ya wantu? Aweyi balenda sadisilwa?
7 Yesu wavova vo ulolo wa wantu bekangalela muna nzila yasanzuka, ina ifilanga ku lubukumuku. (Mat. 7:13, 14) Akaka bekangalelanga muna nzila yasanzuka, kadi bayisolela kuna lukanu o bembola dina kelonganga o Nkand’a Nzambi. Vo i akaka bekangalelanga mo kadi bavunginikwa yovo mu tombe bena, afidi au a mabundu ke babalonga ko mana Yave kevavanga kwa yau. Nanga balenda kwau soba mpila zingu kiau kele vo muntu ubazayisi e ziku kia Nkand’a Nzambi. Kansi, awana bekwamanana muna Babele Anene y’awana bakinu bembola nsiku mia Nkand’a Nzambi ke bevuluzwa ko muna kolo kia “mpasi zayingi.”—Lus. 7:14.
‘Kuvweni’ Samuna Nsangu Zambote Ko
8, 9. Akristu a tandu kiantete adieyi bavanga vava basiwa e kitantu? Ekuma?
8 Yesu wavova vo alongoki andi besamun’e nsangu zambote za Kintinu yo kitula wantu s’alongoki. (Mat. 28:19, 20) Ikuma vo, kuna kw’Akristu akieleka, e salu kia samuna nsangu zambote i diambu diamfunu muna songa kwikizi ye lukwikilu lwau kwa Nzambi. Ekiaki, ikuma alongoki a Yesu muna tandu kiantete bazindalelanga samuna nsangu zambote kana nkutu vava basiwanga kitantu. Basianga e vuvu kwa Yave muna kubakumika, basambanga kimana kabasadisa mu zindalala “vovela diambu [diandi] kuna nkabu.” Muna kuma kiaki, Yave wabazadisa yo mwand’avelela yo vovela diambu diandi kuna nkabu.—Mav. 4:18, 29, 31.
9 Alongoki a Yesu nga bayambula salu kia samuna nsangu zambote vava kitantu kiasaka? Ve. Vava afidi a nsambila za Ayuda bafunga makasi mu kuma kia malongi m’antumwa, babakanga, babavumisa yo kubawanda. Kana una vo i wau, antumwa ‘ke bavwena longa ko, yo samun’e nsangu zambote za Yesu, vo i Kristu.’ Babakula vo bafwete ‘lemvokela Nzambi nze nyadi ke mu wantu ko.’—Mav. 5:28, 29, 40-42.
10. Nkia mpasi benwananga zau Akristu o unu? Mavangu mau mambote adieyi malenda vanga?
10 O unu, selo yayingi ya Nzambi ke bewandwanga ko ngatu koteswa mu pelezo mu kuma kia samuna nsangu zambote. Kansi kadi, Akristu awonso akieleka benwananga ye ntonta za mpila mu mpila. Kasikil’owu, e ntona zaku zalongwa muna Nkand’a Nzambi zilenda soba e fu yaku yo kuswaswanesa. Akundi a sikola yovo a salu ye mfinangani zaku balenda kuveza wau vo nzengo obakanga zin’e betela ye nsiku mia Nkand’a Nzambi. Kansi, e ntonta zau ka zifwete kuyoyesa ko. E nza mu tombe kia mwanda ina, kansi Akristu bafwete kezima “nze mini.” (Fil. 2:15) Akaka nanga balenda mona yo yangalela mavangu maku mambote yo kembelela Yave.—Tanga Matai 5:16.
11. (a) Akaka adieyi balenda vanga mu kuma kia salu kiaku kia umbangi? (b) O Paulu wa ntumwa nkia mpila kitantu kasiwa? Adieyi kavanga?
11 Unkabu mfunu wina muna zindalala samun’e nsangu za Kintinu. Wantu akaka, kana nkutu ayitu, balenda kuveza yovo vanga mawonso mu kukendeleka. (Mat. 10:36) Paulu wa ntumwa wawandwa nkumbu miayingi mu kuma kia salu kiandi kia umbangi. Tala dina kavanga vava kasiwanga kitantu. Wasoneka vo: “Wau twateka mona mpasi, yo tiakidilwa, owu nwiyizayidi, twakabukila muna Nzambi eto twanusamunwin’e nsangu zambote za Nzambi muna ndwan’ayingi.” (1 Tes. 2:2) Kieleka, diampasi diakala kwa Paulu mu zindalala samun’e nsangu zambote vava kabakwa, yo bâkwa e mvwatu, wandilwa muna nti yo siwa muna pelezo. (Mav. 16:19-24) Adieyi diankumika mu zindalala? O luzolo lwa lungisa salu kiandi kia umbangi lwa nkumika.—1 Kor. 9:16.
12, 13. Ateleki akaka nkia mpasi benwananga zau? Aweyi besundilanga zo?
12 Dilenda kala mpe diampasi mu kwamanana yo vema muna zunga ina o wantu ke betoma kalanga mu nzo ko yovo ke beyangalelanga nsangu za Kintinu ko. Adieyi tulenda vanga? Tufwete wokesa unkabu mu mokena yo wantu muna silanga umbangi kuna kinsalukisa. Tufwete silanga mpe umbangi mu ntangwa zaswaswana yovo sia ngolo za sila umbangi muna fulu tulenda wana wantu ayingi.—Tezanesa ye Yoane 4:7-15; Mavangu 16:13; 17:17.
13 Ateleki akaka benwananga ye mpasi za kinunu ye za mayela zina zilenda kulula dina balenda vanga muna salu kiau kia umbangi. Kele vo i diau mpe divangamanga kwa ngeye, kukendalala ko. Yave ozeye e mpasi zaku yo yangalela kina olendang’o sala. (Tanga 2 Korinto 8:12.) Kana nkia mpasi nkutu onwananga zau, zakala kitantu, lembi tambulwa muna salu kia umbangi yovo mpasi za mayela, vanga mawonso olenda muna samun’e nsangu zambote kw’akaka.—Nga. 3:27; tezanesa ye Maku 12:41-44.
‘Toma Tala Uselo Waku’
14. O Paulu wa ntumwa nkia mbandu kasisa kw’Akristu? Nkia luludiku kavana?
14 O Paulu wa ntumwa wabadikilanga uselo wandi se wa mfunu yo kasakesa minkwikizi y’akwandi mu vanga diau adimosi. (Mav. 20:20, 21; 1 Kor. 11:1) O Arekipo wa Nkristu a tandu kiantete i muntu katoma kasakesa o Paulu. Muna nkand’andi kwa esi Kolosai, Paulu wasoneka vo: “Nusamunwina Arekipo vo, toma tala uselo una watambula muna Mfumu, walunganisa wo.” (Kol. 4:17) Katuzeye ko kana nani i Arekipo ye nkia mambu kanwananga mau, kansi watambulwila e salu kia samun’e nsangu zambote. Avo u Nkristu wayiyekola, ongeye mpe watambulwila uselo wau. Nga ozindalala tala uselo yo lungisa wo?
15. Kuyiyekola kw’Akristu adieyi kusonganga? Nkia yuvu tufwete kiyuvula?
15 Vitila luvubu, twayekola mioyo mieto kwa Yave muna sambu. Disongele vo twabaka e nzengo za vanga luzolo lwandi. Owau tufwete kiyuvula: ‘Nga vanga luzolo lwa Nzambi i diambu kieleka disundidi o mfunu muna zingu kiame?’ Tulenda kala ye kiyekwa kiayingi kina o Yave kevava vo twalungisa, nze kiyekwa kia lungisa e nsatu za esi nzo eto. (1 Tim. 5:8) Kansi, aweyi tusadilanga e ntangwa ye ngolo zeto? Nkia mambu tusianga va fulu kiantete muna zingu kieto?—Tanga 2 Korinto 5:14, 15.
16, 17. Adieyi bafwete badika aleke Akristu y’awana ke bena ye kiyekwa kiayingi ko?
16 Nga u nleke Ankristu wayiyekola ona wafokola yovo finama fokola sikola? Nanga kuna ye kiyekwa kiampwena ko kia lunga-lunga esi nzo. Ozevo, adieyi okubikanga mu vanga muna zingu kiaku? Nkia nzengo zilenda kusadisa mu lungisa e nsilu aku wa vanga luzolo lwa Yave mu mpil’ambote? Aleke ayingi bekubamanga mu kota mu salu kia kimviti a nzila yo vwa nsambu zayingi.—Nku. 110:3; Kim. 12:1.
17 Nanga u nleke ona osalanga lumbu kiamvimba, kansi kuna ye kiyekwa kiayingi ko, nanga kuyilunga-lunga kaka. Ka lukatikisu ko vo oyangalelanga sala e salu ya nkutakani muna ntangwa olendanga. Nga olenda kuyivana mu salu kikutwasila kiese kiayingi? Nga wayindula kala edi dia wokesa salu kiaku kia umbangi? (Nku. 34:8; Nga. 10:22) Muna zunga yakaka, salu kiayingi kifwete salwa muna samun’e nsangu zambote zivana o moyo kwa konso muntu. Ng’olenda kubika zingu kiaku mu kwenda sadila ku zunga kivwidi ateleki a Kintinu o mfunu?—Tanga 1 Timoteo 6:6-8.
18. Adieyi basoba eyakala dimosi yo nkaz’andi? Nkia nluta diabatwasila?
18 Badika e nona kia Kevin yo Elena kuna Estados Unidos. * Nze una uvanganga akazi ampa kuna zunga kiau, bamona vo bafwete sumba e nzo. I kuma vo, yau ewole lumbu kiamvimba basalanga mu kala ye lekwa yayingi muna zingu. E salu kiau ye salu ya nzo yabafwasanga ntangwa yayingi yo lembi kala ye ntangwa muna salu kia umbangi. Babakula vo ntangw’au yawonso ye ngolo zau muna mambu mama bafwasilanga yo. Kansi, vava bamona e zingu kiavevoka ye kiakiese kiakala yo mpangi mosi wa mviti a nzila yo nkaz’andi, Kevin yo Elena babak’e nzengo za soba e zingu kiau. Balomba luludiku lwa Yave muna sambu, i bosi bateka e nzo au yo kwenda zingila mu nzo yakete. Elena wayantika sala salu kia ndambu a lumbu yo sala salu kia mviti a nzila. O Kevin vava kamona e kiese kamonanga o nkaz’andi muna salu kiaki, wayambula e salu kia lumbu kiamvimba yo kota mu salu kia mviti a nzila. Kuna kwalanda, bayaluka kuna América do Sul, mu kwenda sadila kuna zunga kivwidi ateleki a Kintinu o mfunu. Kevin wavova vo: “Kanele vo longo lweto lwakikadila lwa kiese, vava twayantika kuyivana muna salu kia mwanda, e kiese kieto kiawokela.”—Tanga Matai 6:19-22.
19, 20. E salu kia samun’e nsangu zambote kisalwanga o unu ekuma kisundidi o mfunu?
19 Samun’e nsangu zambote i salu kisundidi o mfunu kisalwanga o unu ova ntoto. (Lus. 14:6, 7) Kisadisa muna velelesa e nkumbu a Yave. (Mat. 6:9) E nsangu zambote za Nkand’a Nzambi zitomesanga zingu kia ulolo wa wantu ana betambulwilanga zo konso mvu yo kubafila ku luvuluku. Kansi, “nkia ngwa bewa, ovo ke bena ya nteleki ko?” u kayuvula o Paulu wa ntumwa. (Roma 10:14, 15) Diampasi diadi kala kele vo ke vakadi nteleki ko. Ekuma olembi vangila mawonso olenda mu lungisa uselo waku?
20 Tomesa mpil’aku ya longa i mpila yakaka olenda sadisila wantu babakula ekuma e lumbu yayi yinina yampasi ye mfwilu zilenda kubatwasila e nzengo bebakanga. Elongi dilanda disonga una olenda wo vangila.
[Mvovo ku yanda dia lukaya]
^ tini. 18 E nkumbu zasobwa.
Nkia Mvutu Ovana?
• Akristu nkia mbebe bena yau kwa wantu?
• Aweyi tulenda sundila e nkakalakani muna salu kieto kia umbangi?
• Aweyi tulenda lunganisina uselo una twatambula?
[Juvu ja longokela]
[Foto ina muna lukaya lwa 5]
Unkabu mfunu wina muna samun’e nsangu zambote vava tusiwanga kitantu
[Foto ina muna lukaya lwa 7]
Adieyi olenda vanga kele vo muna zunga osilanga umbangi wantu ke betoma kalanga mu nzo ko?