Ampangi aya Bafokwele e Sikola ya Ngiladi Bakasakesom mu “Yantika Tima”
Kalasi kia 123 kia Sikola ya Ngiladi
Ampangi aya Bafokwele e Sikola ya Ngiladi Bakasakesom mu “Yantika Tima”
KINA kia Sabala, kia 8 kia ngonde a Setemba, 2007, wantu 6.352 batuka mu nsi 41, bakutakana muna lumbu kiafokoka e kalasi kia 123 kia Sikola ya Ngiladi (Escola Bíblica de Gileade da Torre de Vigia). Muna ola ya 10, o mfidi a lukutakanu lwalu, Anthony Morris, wa mwisi Buka kia Selo Yambuta, wakayisa o nkangu. Una kamanisa o vova, wabokela mpovi antete, mpangi Gary Breaux, mosi muna Afidi a Vula kuna Estados Unidos.
Mpangi Breaux wavovesa alongoki vo, lembi yindula owu bena muna nitu, awana bevanganga luzolo lwa Yave bavienga vana meso ma Yave. (Yer. 13:11) Wabavovesa vo balunga-lunga o vienga kwau vana meso ma Nzambi. I bosi, mpangi Gerrit Lösch wa mosi muna Buka kia Selo Yambuta, wasonga vo ke diambi ko dia vingila o nsendo wau tusadilanga Yave. (Ayib. 11:6) Kansi, tufwete kalanga y’ekani diasikila.
O mpangi William Samuelson una vo i nkengi otalanga mambu ma Sikola za Kimfumu, wavovesa alongoki mu zindalala muna salu kiau kia samuna oma ma Kintinu yo songanga fu yambote. * O mpangi Sam Roberson wa nsadisi a nkengi a Sikola za Kimfumu, wavovesa alongoki mu siang’o meso muna fu yambote y’ampangi zau. Mu mpila yayi kaka alongoki balenda songel’o ‘zola kwa wana-ngudi awonso.’—1 Pet. 2:17.
Una mafokoka malongi mama ma lukasakeso, o mpangi Mark Noumair, wa nlongi a Sikola ya Ngiladi, wamokena y’ampangi ana bafokola e sikola mu vova mana bawanana mau muna salu kia umbangi, ekolo batanganga e Sikola ya Ngiladi. E mvovo miau miasonga kw’ampangi e zola kwau muna salu kia umbangi y’etima diau dia sadisa akaka. O mpangi Kent Fischer, osadilanga kuna Betele ya Patterson, wamokena y’Afidi a Mavula ma nsi tatu zatambula misionario. E mvovo miau miasonga kwa nkangu ye kwa yitu y’alongoki vo e misionario zolwa betoma zolwanga muna nsi zina befilwanga. O mpangi Izak Marais, osadilanga kuna Departamento ya Salu kia Nsekola, wamokena ye misionario ana besalanga e salu kiaki se mvu miayingi. Mana bavova masonga kw’alongoki e kiese kikubavingilanga muna salu kiau.
Mpangi Geoffrey Jackson mwisi Buka kia Selo Yambuta wafila elongi diasina dia lukutakanu lwalu diakala yo ntu a diambu vo: “Adieyi Nuvanga Owau mu Kuma kia Mawonso Nulongokele?” E mpangi Jackson, ona wasala salu kia kimisionario mu mvu 25 kuna Pacífico Sul, wayika e mvovo mia nsuka mi’Elongi dia Yesu vana Mongo. Mun’elongi diadi, Yesu wayika wantu wole batunga nzo, mosi nlungaladi, wakaka zowa. O mpovi wasonga vo e nzo zau zole zina zatunga wantu awaya va zunga kimosi zakala. Kansi, o zowa watunga e nzo andi van’esenge, vo i nlungaladi, wateka tima yavana kasolola e nsenzele, vana katungila e nzo andi. Vava kiayiza tembwa kiangolo, e nzo andi ke yabwa ko, kansi ina yatungilwa van’esenge, yabwa.—Mat. 7:24-27; Luka 6:48.
Yesu wavova vo e zowa ofwananene y’awana bawa kaka e mvovo miandi yo lembi vanga diambu. Vo i nlungaladi ofwananene y’awana bawa yo lemvokela mana kabavovesa o Yesu. E mpangi Jackson wavovesa alongoki vo: “Avo nusadila mana nulongoka muna Nkand’a Nzambi muna salu kieno kia kimisionario, nukala nze nlungaladi.” Kuna mfoko, wakasakesa awana bafokola e Sikola ya Ngiladi mu “yantika tima” muna salu kiau kia kimisionario.
I bosi, alongoki batambula mapolomi mau yo zayiswa e nsi bekwenda. Muna fokola, mpangi Morris wabavana luludiku lwansuka. Wakasakesa alongoki mu zindalala landa Yesu yo bund’e vuvu muna nkum’a Yave. E mvovo miami i miafokola e nkubika yayi.
[Mvovo ku yanda dia lukaya]
^ tini. 5 E Departamento ya Sikola za Kimfumu, eyi ifilwanga kwa Buka Kikubikanga Malongi, yau italanga mambu ma sikola ya Ngiladi, ye sikola ya Afidi a Mavula ye sikola ya akengi a zunga ye a mvivu.
[Foto muna lukaya 31]
OMA M’ALONGOKI
Lutangu lwa nsi zina batuka: 10
Lutangu lwa nsi zina bafilwa: 24
Lutangu lwa alongoki: 56
Tezo kia mvu: 33,5
Tezo kia mvu bena mu ludi: 17,9
Tezo kia mvu bena muna salu kia ntangwa ke ntangwa: 13,8
[Foto ina muna lukaya lwa 32]
Kalasi kia 123 kia Sikola ya Ngiladi
Nlonga bakiatamene miyantikidi ku ntwala yakuna nima, e nkumbu zau zasonekwa tuka kuna koko kwalumonso yakuna koko kwalunene muna konso nlonga.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.