Tanginina Misionario Anene

“Nuntanginina, waun’omono ntangininanga Kristu.” ​—⁠1 KOR. 11:⁠1.

1. Ekuma tufwete tanginina Yesu Kristu?

PAULU wa ntumwa, Yesu Kristu katangininanga, wa Misionario anene. Paulu wawondelela mpe Akristu y’akwandi vo: “Nuntanginina, waun’omono ntangininanga Kristu.” (1 Kor. 11:⁠1) Vava Yesu kasonga mbandu ambote ya lulembamu kwa ntumwa zandi muna kubasukula malu, wabavovesa vo: “Inuvene e mbandu, nwavanga konso owu inuvangidi.” (Yoa. 13:​12-​15) Wau vo tu Akristu, tuna ye mbebe ya tanginina Yesu Kristu muna mvovo, mavangu ye muna fu yeto.​—⁠1 Pet. 2:⁠21.

2. Kana una vo kufidilu ko kwa Buka kia Selo Yambuta nze misionario, nki’etima olenda kala diau?

² Mun’elongi divitidi, twalongokele vo misionario i ndiona ofilwanga mu kwenda teleka nsangu zambote kw’akaka. Muna kuma kiaki, Paulu yuvu yamfunu kayuvula. (Tanga Roma 10:​11-15.) Nze “nkia ngwa bewa, ovo ke bena ya nteleki ko?” I bosi wasadila mvovo mia Yesaya wa ngunza yo vova vo: “Mawete vana miongo o malu ma nteleki a nsangu zambote.” (Yes. 52:⁠7) Kana una vo kufidilu ko mu kwenda sila umbangi ku nsi za kinzenza, olenda kwaku kala y’etima dia teleka nsangu zambote mu tanginina Yesu wa nteleki avema a nsangu zambote. Muna mvu wavioka, 6.957.852 m’ateleki a Kintinu ‘basamuna nsangu zambote’ mu nsi 236.​—⁠2 Tim. 4:⁠5.

“Oyeto Tuyambwidi Yawonso, Twakulanda”

3, 4. O Yesu nkia lekwa kasisa kun’ezulu? Adieyi tufwete vanga muna kituka alandi andi?

³ Muna sal’e salu kiandi ova ntoto, Yesu ‘wayisisa nkatu, yo baka mpw’a ntaudi,’ vava  kasisa e zingu ye nkembo kakala wau kunz’ezulu. (Fili. 2:⁠7) Konso mana tulena vanga muna tanginina Kristu, ke malendi tezaniswa ko ye mana kavanga o Yesu vava kakala ova ntoto. Kansi, tulenda kwamanan’o kala alandi andi muna lembi lakukilwang’o moyo mana twasisa mu nza ya Satana.​—⁠1 Yoa. 5:⁠19.

⁴ Lumbu kimosi, Petelo wa ntumwa wavovesa Yesu vo: “Oyeto tuyambwidi yawonso, twakulanda.” (Mat. 19:​27) Vava Petelo, Andere, Yakobo ye Yoane babokelwa mu landa Yesu, vana vau basisa makonde mau. Bayambula salu kiau kia lowa yo kuyivana mu salu kia umbangi. Nze una usonganga Nsangu Zambote zasoneka Luka, Petelo wavova vo: “Oyeto tuyambwidi eyeto, twakulanda.” (Luka 18:​28) Ndonga muna yeto ke tusisanga ‘lekwa yeto’ yawonso ko muna landa Yesu. Kansi, ‘tukuyivaninanga nkalu’ mu kituka alandi a Kristu yo sadila Yave ye nsi a ntim’eto yawonso. (Mat. 16:​24) O vanga wo, nsambu zayingi ditwasanga. (Tanga Matai 19:29.) O kala y’etima dia samuna nsangu zambote mu tanginina Kristu, kiese ditwasanga, musungula vava tusadisanga muntu mu finama Nzambi yo Mwan’andi anzolwa.

5. Yika e nona kisonganga e nzengo kalenda baka e nzenza vava kelongokanga e ludi kia Nkand’a Nzambi.

⁵ Valmir, wa mwisi Brasil ozingilanga kuna nsi ya Suriname, salu kia tima wolo kasadidinge. Nduvu a malavu kakala yo kuyivana mu mavangu ma zumba. Lumbu kimosi, Mbangi a Yave wayantika longoka yandi Nkand’a Nzambi. Walongokanga lumbu yawonso yo soba e zingu kiandi, ke kolo ko wavubwa. Vava kamona vo e salu kiandi ke kiansadisanga ko mu sadila mana kalongokanga, wateka lekwa yandi yawonso yo vutuka kuna Brasil mu sadisa esi nzo andi mu solola lusalu lwa mwanda. Nzenza zayingi vava belongokanga e ludi kia Nkand’a Nzambi, besisanga e salu yambote yo vutuka muna nsi zau zakingutukila y’ekani dia kwenda sadisa yitu yau ye akaka muna mwanda. Ateleki awaya a Kintinu etima dia teleka nsangu zambote besonganga.

6. Adieyi tulenda vanga kele vo ka tulendi yaluka ko mu kwenda ku zunga ina yo mfunu ateleki a kintinu?

⁶ Mbangi zayingi beyalukanga yo kwenda muna zunga kikalanga yo mfunu ateleki a Kintinu. Akaka nkutu bekwendanga muna nsi za kinzenza.  Nanga ke tukalanga y’elau dia yaluka ko, kansi tulenda tanginina Yesu mu vanga mawonso tulenda muna salu kia umbangi.

Yave Okutulonganga

7. Nkia sikola zakubikwa mu longa awana bazolele nungunuka nze ateleki a Kintinu?

⁷ Nze una Yesu kalongelwa kwa S’andi, oyeto mpe tulenda baka nluta muna nkubika za Yave za kutulonga. Yesu wavova vo: ‘Wasonama muna ngunza vo, yau awonso belongwa kwa Yave.’ (Yoa. 6:45; Yes. 54:​13) O unu, sikola zayingi zikubikwanga muna kutulonga mu kala ateleki a Kintinu. Kieleka, yeto awonso tubakanga nluta muna Sikola ya Salu kia Kimfumu ifilwanga muna nkutakani zeto. Aviti a nzila bekalanga y’elau dia kota Sikola za Salu kia Kimviti a Nzila. Aviti a nzila ayingi azikuka beyangalelanga kota e sikola yayi mu nkumbu wezole. Akuluntu ye selo ya salu bekotanga Sikola ya Salu kia Kintinu mu wokesa ngangu zau za longa yo sadila mpangi zau una ufwene. Akuluntu ayingi ye selo ya salu bena vo ampumpa, belongwanga muna Sikola ya Nkubama ya Uselo, yina ikubakubikanga mu sadisa akaka muna salu kia umbangi. Mpangi zayingi zamakala ye zamakento ana befilwanga muna salu kia kimisionario mu nsi za kinzenza, belongwanga muna Sikola ya Ngiladi.

8. Aweyi mpangi zayingi besongelanga luyangalalu lwau muna nkubika za Yave za kutulonga?

⁸ Mbangi zayingi za Yave bevevolanga zingu kiau kimana bakota muna sikola zazi. Muna kota muna Sikola ya Nkubama ya Uselo kuna Canadá, Yugu wabak’e nzengo za katuka mu salu, wau vo mfumu andi a salu kazola kunyambula ko. Yugu wavova vo: “Kikuyibanzanga ko. Kele vo bangyambula kuna salu, badi vingila vo yavutuka yo kwamanana sadila muna kompani yayina. Kansi, owau yakubama mu sala konso salu kalenda kumpana o Yave.” Muna baka nluta muna nkubika za Nzambi za kutulonga, ayingi besisanga yawonso bakala yau.​—⁠Luka 5:⁠28.

9. Yika e nona kisonganga o mfunu wa malongi ma Nkand’a Nzambi kumosi ye luzolo lwambote.

⁹ Malongi ma Nkand’a Nzambi kumosi ye luzolo lwambote malenda sadisa muntu mu nungunuka muna mwanda. (2 Tim. 3:​16, 17) Badika nona kia Saulo wa mwisi Guatemala. Kimbevo kia nzengomoka kawutuka kiau. Nlongi andi ankento wavovesa ngudi andi vo ke diamfunu ko dia komekena mwan’andi mu longoka o tanga, kadi mpasi zankatu kemona. Saulo wakatuka mu sikola lembi zaya tanga. Kansi, Mbangi mosi a Yave walonga Saulo o tanga muna sadila finkanda Aplique-se à Leitura e à Escrita. Saulo wazaya o tanga yamu tezo kia fila nkutu elongi muna Sikola ya Salu kia Kimfumu. Lumbu kimosi, ngudi a Saulo wawanana yo nlongi andi vava kasilanga umbangi muna nzo ya nzo. Vava kawa vo Saulo wazay’o tanga, o nlongi ndioyo wamvovesa vo keza kumosi yo Saulo muna lumingu lulanda. Vava Saulo kayenda kuna nzo andi, o nlongi wanyuvula vo: “Nkia diambu okundonga?” Saulo wantangila tini kimosi muna nkanda, O Nkand’a Nzambi Adieyi Kieleka Kelonganga? O nlongi wavova vo: “Kilendi kwikila ko vo ngeye okundonganga.” Kalenda zizidila ko, wadila yo bimba Saulo.

Malongi Mesimbanga o Ntima

10. Nkia sadilwa kiamfunu tuna kiau muna longa e ludi kia Nkand’a Nzambi?

¹⁰ Yesu walonga mana kalongwa kwa Yave ye mana mena muna Diambu diasonama dia Nzambi. (Luka 4:​16-21; Yoa. 8:​28) Tutangininanga Yesu vava tusadilanga luludiku lwandi yo longa mana mena muna Nkand’a Nzambi. Muna mpila yayi, yeto awonso tuvovanga yo nyindu mosi, ediadi diwokesanga ungudi weto. (1 Kor. 1:​10) Tuvutulanga matondo wau vo “ntaudi akwikizi yo lulungalalu” ovaikisanga e nkanda milenda kutusadisa mu kala ye ngwizani muna malongi meto yo sal’e salu kieto kia teleka nsanga zambote. (Mat. 24:45; 28:​19, 20) Umosi muna nkanda  miami i Nkand’a Nzambi Adieyi Kieleka Kelonganga? Uvaikisu kala mu ndinga 179.

11. Aweyi mpangi mosi ankento kuna Etiópia kasundila kitantu muna sadila O Nkand’a Nzambi Adieyi Kieleka Kelonganga?

¹¹ O sadila O Nkand’a Nzambi Adieyi Kieleka Kelonganga? mu longa Nkand’a Nzambi kw’akaka, dilenda soba ntima mi’awana bekutusianga kitantu. Lumbu kimosi, vava o Lula wa mpangi mosi ankento, una vo mviti a nzila kuna Etiópia, kafilanga elongi dia Nkand’a Nzambi, yitu kia nlongoki andi wamfwemena yo kumvovesa vo bayambula longoka Nkand’a Nzambi. Lula wavovana yandi mu malembe yo kunsonga e nona kia nzimbu za luvunu kina muna kapu kia 15 kia Nkand’a Nzambi Adieyi Kieleka Kelonganga? O nkento ndioyo wavuvama yo kubayambula bakwamanana mun’elongi diau. Mun’elongi dialanda, oyandi mpe wakala yo lomba vo kayantika mpe longwa Nkand’a Nzambi, kana nkutu vo nzimbu kefuta. Nkumbu ntatu kalongokanga muna lumingu yo nungunuka muna mwanda.

12. Yika nona kisonganga una aleke balenda longela e ludi kia Nkand’a Nzambi.

¹² Aleke mpe balenda sadisa akaka muna sadilanga O Nkand’a Nzambi Adieyi Kieleka Kelonganga? Kuna Havaí, vava Keanu una ye kimbuta kia mvu 11 katanganga o nkanda wau kuna sikola, nkundi andi mosi wanyuvula vo: “Ekuma nulembi kembelelanga nkinzi mia nza?” Keanu wantangila e mvutu muna nkudika ina yo ntu a diambu vo, “Nga Tufwete Kembelelanga Nkinzi mia Nza?” I bosi, wansonga e ntu mia mambu yo kunyuvula kana nkia diambu ditomene kunyangidika. Vana vau bayantika longoka Nkand’a Nzambi. Muna mvu wa salu uviokele, Mbangi za Yave balongoka Nkand’a Nzambi yo wantu 6.561.426. Ayingi muna yau basadila O Nkand’a Nzambi Adieyi Kieleka Kelonganga? Nga osadilanga nkanda wau mu longoka Nkand’a Nzambi yo wantu?

13. Elongi dia Nkand’a Nzambi aweyi dilenda sadisila wantu mu bak’e nzengo zambote?

¹³ O longoka Nkand’a Nzambi muna lusadisu lwa Nkand’a Nzambi Adieyi Kieleka Kelonganga? dilenda fila akwa luzolo lwambote mu vanga luzolo lwa Nzambi. Yakala dimosi yo nkaz’andi bena vo aviti a nzila a espesiale kuna Noruega, bayantika longoka Nkand’a Nzambi y’esi nzo mosi batuka kuna Zâmbia. Akazi awaya a Zâmbia wan’atatu amakento bakala yau, ke bazola diaka wuta ko. Kansi, vava nkento kayimita diaka, babak’e nzengo za katula e vumu. Una ke bayele ko kwa dotolo, balongoka e kapu kina yo ntu a diambu vo, “O Nzambi Aweyi Kebadikilanga Moyo?” E fwaniswa kia nsedia una muna  vumu kiabasimba o ntima yo soba e ngindu. Banungunuka muna mwanda yo luka mpangi ona wabalonga.

14. Yika e nona kisonganga e nluta mia zingila ngwizani ye mana tulonganga.

¹⁴ E diambu diamfunu kavanganga o Yesu vava kalonganga, i zingila ngwizani ye dina kalonganga. Wantu ayingi beyangalelanga e fu yambote ya Mbangi za Yave ana betangininanga Yesu. Nkiti mosi kuna Nova Zelândia wafwilwa e kalu yo yiwa e nkutu. Wazayisa wo kwa polisia yo voveswa vo: “Olenda solola e nkutu aku avo inoneno kaka kwa Mbangi a Yave.” Mpangi mosi ankento watekanga e zulunalu wasolola e nkutu yayina. Vava kazayiswa wo, wayenda kuna nzo a mpangi. Wayangalala vava kamona vo e nkanda miandi miamfunu ke miavila ko. O mpangi ankento wamvovesa vo: “O mono i Mbangi a Yave, i kuma ivutulwidi e nkutu aku.” Eyakala diadina wasivika kikilu yo sungamena dina kavoveswa kwa polisia muna mene wauna. Elo, Akristu akieleka bezingilanga e ngwizani ye malongi ma Nkand’a Nzambi yo tanginina Yesu.​—⁠Ayib. 13:⁠18.

Tanginina Mpila Yesu Kakadilanga yo Wantu

15, 16. Aweyi tulenda tuntila wantu mu wa nsangu tusamunanga?

¹⁵ E mpila Yesu kakadilanga yo wantu yabatuntanga mu wa nsangu kasamunanga. Kasikil’owu, o zola yo lulembamu lwandi lwafilanga akwa ntima miambote mu kumfinama. Wabafwilanga e nkenda yo kubakasakesa ye mvovo miangemba yo wuka mbevo zayingi. (Tanga Maku 2:​1-5.) Kanele vo ka tulendi vanga masivi ko, tulenda kweto songa zola, lulembamu ye nkenda zina vo i fu ituntanga wantu mu zaya e ludi.

¹⁶ O mfunu wa songa nkenda wamoneka vava Tariua wa mviti a nzila a espesiale, kasila umbangi kwa nunu mosi una ye nkumbu a Beere, okalanga kuna sanga kia Kiribati kuna Pacífico Sul. Kana una vo nunu ndioyo kazola wa ko, Tariua wamona vo mbevo kakala, wamfwila nkenda. Wanyuvula vo: “Ng’ozeye nsilu kesianga o Nzambi mu kuma kia ambevo ye anunu?” I bosi, watanga sono kimosi muna ungunza wa Yesaya. (Tanga Yesaya 35:​5, 6.) O nunu wasivika yo vova vo: “Se mvu miayingi ntanganga Nkand’a Nzambi yo kingulwa kwa misionario za dibundu diame, kansi kisidi tanga sono kiaki ko muna Nkand’a Nzambi.” O Beere wayantika longoka Nkand’a Nzambi yo nungunuka muna mwanda. Kana una vo mbevo kwandi, wavubwa, owau yandi una se ntu muna buka. Okangalanga e sanga kiawonso mu kwenda samun’e nsangu zambote.

Kwamanana Tanginina Kristu

17, 18. (a) Aweyi olenda kadila nteleki ambote? (b) Nkia nluta bevwa awana besalanga e salu kia umbangi y’etima diawonso?

¹⁷ Nze una usonganga nona yayingi ya salu kia umbangi, tulenda kala ateleki ambote kele vo tusonga e fu nze ina kasonganga o Yesu. Muna kuma kiaki, diamfunu twatangininanga Kristu muna kala ateleki avema.

¹⁸ Vava akaka bakituka alongoki a Yesu muna tandu kiantete, Petelo wayuvula: “Nki tukala kiau?” Yesu wavutula vo: “Konso ona wasisa nzo, ovo mpangi, ovo nsanga, ovo se, ovo ngudi, ovo wana, ovo mpatu, muna nkumbu ame, otambula nkama-nkama, yo vwila moyo a mvu ya mvu.” (Mat. 19:​27-​29) Ediadi dilenda vangama kwa yeto avo tukwamanana tanginina Yesu Kristu wa Misionario anene.

Azeyi i Mvutu Zaku?

• O Yave aweyi kekutulongelanga mu kala ateleki a nsangu zambote?

• Ekuma O Nkand’a Nzambi Adieyi Kieleka Kelonganga? winina wamfunu muna salu kieto kia umbangi?

• Aweyi tulenda tanginina Yesu muna mpila ya kadila y’akaka?

[Juvu ja longokela]

[Foto ina muna lukaya lwa 17]

Vava Yesu kabokela Petelo, Andere, Yakobo yo Yoane mu kunlanda, batambulwila vana vau

[Foto ina muna lukaya lwa 19]

E nkanda nze “Nkand’a Nzambi Adieyi Kieleka Kelonganga?” milenda kutusadisa mu kala ye ngwizani muna malongi meto