Tulongoka Diambu Muna Vilwa wa Aneyisaele

ANEYISAELE bazaya dina kavavang’o Yave kuna kwa yau vava bakota muna Nsi a Nsilu. Nzambi wabakanikina muna Mose vo: “Nuying’esi nsi vovo nwina, nwafwasa matadi mau mawonso mavosonwa, yo fwasa teke yau yawonso yazunzwa, yo fwasa mabata mau mawonso.”​—⁠Nta. 33:⁠52.

O nkangu a Isaele ke wafwana kang’ekangu y’esi nsi ko ngatu sompaziana. (Nsi. 7:​2, 3) Nzambi walukisa nkangu andi vo: “Toma kutala, unkwa kanga esi nsi in’okwend’ekangu, dinkwa kala s’enekwa vovo wina.” (Luv. 34:​12) Kansi, Aneyisaele bakolamena Nzambi yo bwa muna ntambu. Adieyi diababwisisa muna ntambu? Nki’elongi tulenda longoka mu dina diababwila?​—⁠1 Kor. 10:⁠11.

Kikundi ye Zula Kiabafila mu Sambila Teke

Vava bakota muna Nsi a Nsilu, Aneyisaele basunda atantu au ana bakala muna nsi. Kansi, ke balemvokela nsiku mia Nzambi mu mawonso ko. Ke bayinga atantu au ko. (Afu. 1:1–2:​10) Kansi, ekolo Aneyisaele bazinganga vamosi ye “zula nsambwadi” muna nsi, bakituka se akundi au. (Nsi. 7:⁠1) E kikundi kiaki, nkia mfwilu kiabatwasila? Muna Nkand’a Nzambi tutanganga vo: “Basangane kinkwezi ye zula yayi yo sadila nzambi zau. O wan’a Isaele basula bi muna meso ma Yave, bavilakanwa Yave wa Nzambi au, yo sadila Bale yo Asera.” (Afu. 3:​5-7) Ozevo, kikundi kiafila Isaele mu sompana y’esi nsi yo sambila mpe nzambi zau. Wau vo basompaziana, Aneyisaele ke balenda diaka kubayinga ko muna nsi.  E nsambila aludi yayiviswa, vo i Aneyisaele bayantika sambila nzambi zaluvunu.

O vanga kikundi ye nkangu wakala muna Nsi a Nsilu, diasia kimwanda kia Aneyisaele mu vonza vioka nkutu vava bakala atantu au. Tala mpila yakaka kiayivila kimwanda kiau.

Mpat’a Nsengo ye Nsambil’a Bale

Vava bakota muna Nsi a Nsilu, Aneyisaele bayambula zingu ki’ayaluki, ayingi muna yau bakituka s’avati a nsengo. E ndekwa zau za vatila zafwanana ye zina basadilanga esi nsi. Ediadi diabafila mu vanga mayingi ke tanginina kaka esi Kenani ko. E kikundi kiaki kiabafila mpe mu tambulwila lusansu lwau muna mambu ma mpatu.

Anekenani nzambi zayingi za Bale basambilanga. Bakwikilanga vo nzambi zazi zau zasakumunanga o ntoto muna yima mbongo ayingi. Kuna kwalanda, vava Aneyisaele bakunanga yo vela e mbongo, bayikamanga esi Kenani mu sambila nzambi zina bayindulanga vo i zabavananga e mbongo. Ndonga muna Isaele bavovanga vo Yave basambilanga, ovo tala bavengomoka kwau.

Lulukisu kwa Yeto o Unu

Vava Aneyisaele bavanga kikundi ye nkangu wakala muna Nsi a Nsilu, ke bakala ye ngindu za sambila Bale ko ngatu kuyisia mu mavangu mau ma nsoki. Kansi, e kikundi kiau kiabakotesa mu vonza kiaki. Nga ke diau ko dilenda kutubwila avo tuvangidi kikundi y’awana bemonekanga nze wantu ambote, kansi ke besambilanga Yave ko ngatu lemvokela nsiku miandi? Dialudi vo, ezak’e ntangwa divavanga vo twakalanga vamosi ye mindembi kwikila kuna salu, kuna sikola yovo kuna nzo. Kansi, dina diabwila Aneyisaele disonganga vo, o vanga kikundi yo wantu awaya dilenda kututwasila vonza. Nkand’a Nzambi ulukisanga vo: “E yikundi yambi ifwasa fu yambote.”​—⁠1 Kor. 15:33.

O unu kiaki ntota zayingi zituzungidi nze una wakala Aneyisaele. E nza ya tandu kiaki yazala ye nsambila za teke ya mpila mu mpila yo wantu bebadikilwanga nze nzambi, kumosi ye nzimbu, y’akwa nsaka za cinema, abudi a somba, ayadi, afidi a nsambila yovo nkutu yitu. Avo ke tukebele ko, tulenda yantik’o sia e vuvu kiasaka muna lekwa yovo wantu awaya. O vanga kikundi y’awana ke besambilanga Yave ko dilenda fwasa kimwanda kieto.

E nsambil’a Bale yazala ye mavangu ma zumba mana mavukumuna Aneyisaele ayingi. Mavangu ma zumba makinu vukumuna ayingi vana vena nkangu a Nzambi. Kasikil’owu, komputadore ilenda fila muntu mu tala mavangu ma zumba yo yivisa e ntona zandi. Diankenda kikilu kele vo Nkristu uyivene mu tala mavangu ma zumba muna Internete.

‘Akwa Nsambu Alundi a Nsiku Miandi’

O lemvokela Yave yovo lembi kulemvokela mu diambu dia sola akundi, diambu dia muntu yandi kibeni. (Nsi. 30:​19, 20) Muna kuma kiaki, diamfunu twakiyuvula: ‘Aki nani nsakananga yau? Aweyi bebadikilanga e nsiku mia Nzambi? Nga Yave besambilanga? E kikundi kiau nga kikumfilanga mu kala Nkristu ambote?’

Ntozi a nkunga wayimbila vo: “Akwa nsambu azikuki muna nzila, ana bekangadila muna nsiku a Yave. Akwa nsambu alundi a mabika mandi, ana bekuntomba ye nsi a ntima.” (Nku. 119:​1, 2) Elo, “nkwa nsambu konso on’ovumina Yave, on’okangadila muna nzila zandi.” (Nku. 128:⁠1) Muna kuma kiaki, vava tusolanga akundi eto, yambula twalongoka diambu muna vilwa wa Aneyisaele yo lemvokela Yave muna mawonso.​—⁠Nga. 13:⁠20.

[Foto ina muna lukaya lwa 26]

O vang’e kikundi y’awana ke bezolanga Yave ko dilenda kutufila mu nsambila za teke