Yesu Kristu wa Misionario Anene

“Kwa yandi i ntuka, oyandi mpe wantuma.”​—⁠YOA. 7:⁠29.

1, 2. Ayeyi i nsas’a mvovo misionario? Nani olenda yikilwa vo Misionario anene?

ADIEYI oyindulanga vava owanga e mvovo “misionario”? Akaka beyindulanga vo i misionario mia Kikristu kia Kimpangila, engi muna yau, mu mambu ma luyalu ye ma kinkita bekuyisianga muna nsi zina befilwanga. Wau vo u Mbangi a Yave nanga e misionario oyindulanga i awana befilwanga kwa Buka kia Selo Yambuta mu kwenda samuna nsangu zambote mu nsi zayingi omu nza. (Mat. 24:​14) E misionario zazi besadilanga ntangwa ye ngolo zau mu salu kiamfunu kia sadisa wantu bafinama Yave wa Nzambi yo kala ye ngwizani ambote yo yandi.​—⁠Yak. 4:⁠8.

² E mvovo “misionario” ke wasonama ko muna nsekola ya Nkand’a Nzambi. Kansi, e mvovo wa Kingerekia wasekolwa vo “nteleki” muna Efeso 4:​11, ulenda mpe sekolwa vo “misionario.” Yave i Nteleki anene, kansi kalendi yikilwa ko vo Misionario anene, kadi kalendi tumwa kwa muntu ko. Yesu Kristu wavova mu kuma kia S’andi ezulu vo: “Kwa yandi i ntuka, oyandi mpe wantuma.” (Yoa. 7:​29) Muna songa e nzola kazol’e nza, Yave watuma Mwan’andi amosi ova ntoto. (Yoa. 3:​16) O Yesu olenda yikilwa vo Misionario anene, kadi kimosi muna kuma katuminwa ova ntoto i ‘sila ludi o umbangi.’ (Yoa. 18:​37) Watoma sal’e salu kiandi kia samuna nsangu zambote za Kintinu, twakinu mona e nluta mia salu kiandi. Kasikil’owu, twakala misionario yovo ve, tulenda tanginina mpila kalongela muna salu kieto kia umbangi.

3. Nkia yuvu tufimpa?

³ E salu kia Yesu nze nteleki a Kintinu kivaikisanga yuvu nze yayi: O Yesu nkia mambu kawanana mau ova ntoto? Ekuma malongi mandi makadila mambote? Ekuma salu kiandi kiatwasila nluta?

Yesu Wayivana mu Sila Umbangi Muna Zunga Kiampa

4-6. Nkia mambu masoba muna zingu kia Yesu ova ntoto?

⁴ E misionario za tandu kiaki ye Akristu akaka ana bekwenda sadilanga muna zunga ivwanga ateleki a Kintinu o mfunu, bafwete kulukila mpila zingu bewananga ko. Se badiki nswaswani yakala vana vena e zingu kawana Yesu ova ntoto ye kina kakala kiau kun’ezulu, vava kazinganga yo S’andi kumosi ye mbasi zisadilanga Yave y’ekani diasikila! (Yobi 1:6; 2:⁠1) Diampasi kikilu diakala mu zingila mu nza yabendomoka y’akwa masumu.  (Maku 7:​20-​23) Yesu wasonganga nkutu luzindalalu vava alongoki andi batantananga. (Luka 20:46; 22:​24) Elo, wazaya una wa singikila konso diambu kawanananga diau ova ntoto mu mpil’ambote.

⁵ Yesu kayantika vova nding’a wantu mu mpila yesivi ko; kansi walongoka yo muna kinsedia kiandi. E ndinga yayi yaswaswana yakala ye yina kasadilanga vava kavovanga ye mbasi kun’ezulu. Ova ntoto, Yesu walongoka “ndinga za wantu.” E ndinga yayi yaswaswana kikilu yakala ye “ndinga za mbasi.” (1 Kor. 13:⁠1) Kansi, ke vasidi kala ye muntu ko wasadila e mvovo miangemba nze Yesu.​—⁠Luka 4:⁠22.

⁶ Badika mpila yakaka masobela mambu vava Mwan’a Nzambi kayiza ova ntoto. Kana una vo Yesu kavwila esumu dia Adami ko, wakituka se muntu nze awana bakituka “abunzi” yovo mpangi zandi, alandi akuswa. (Tanga Ayibere 2:​17, 18.) Muna fuku wansuka wa zingu kiandi ova ntoto, Yesu kazola lomba ko kwa S’andi kun’ezulu mu fila “mvengo mia mbasi, ekumi ye zole.” Se yindudi e wisa kakala kiau vana vena ambasi nze Mikaele wa Mbasi Ambuta. (Mat. 26:53; Yuda 9) Dialudi vo Yesu wavanga masivi, kansi mana kavanga ova ntoto ke malendi tezaniswa ko ye mana kesinga vanga kun’ezulu.

7. Aweyi Ayuda babendomwena e Nsiku?

⁷ Una kakala kun’ezulu nze “Diambu,” o Yesu wakala se Nkunzi a Nzambi ona wafilanga Aneyisaele vava bakala muna makanga. (Yoa. 1:1; Luv. 23:​20-​23) Kana una vo ‘batambul’o Nsiku muna nsiw’a mbasi, ke balunda wo ko.’ (Mav. 7:53; Ayib. 2:​2, 3) Elo, afidi a nsambila y’Ayuda a tandu kiantete ke babakula ko e nsas’a Nsiku. Muna bonga e nona, yindul’e nsiku mu kuma kia Lumbu kia Vundu. (Tanga Maku 3:​4-6.) Asoneki ye Afarisi ‘ke bavanganga ko mana ma Nsiku masundidi, nze unsongi ye nkenda, yo kwikizi.’ (Mat. 23:​23) Kansi, Yesu kayambula kubalonga e ludi ko.

8. Ekuma Yesu kelendelanga kutusadisa?

⁸ O Yesu ntim’amvevo kakala wau. O zola kwamfilanga mu sadisa wantu. Kakondwanga luzolo lwa samuna nsangu zambote ko. Wau vo wasikila ye kwikizi muna Yave ekolo kakala ova ntoto, Yesu ‘wakituka s’etuku dia mpuluk’a mvu ya mvu kw’awonso bekunlemvokelanga.’ Kansi, “wau vo oyandi kibeni wavukumunwa muna mpasi zina kamwene, win’owu kabasàdis’awana bevukumunwanga.”​—⁠Ayib. 2:18; 5:​8, 9.

Watoma Longwa mu Kala se Nlongi

9, 10. Nkia mpil’elongi katambula Yesu una kafidilu ko ova ntoto?

⁹ Buka kia Selo Yambuta bekubikanga vo Akristu a tandu kiaki bateka longwa i bosi befilwanga mu salu kia kimisionario. O Yesu Kristu mpe nga wateka longwa? Elo, kansi katanga sikola za kirabino ko mu kituka se Masia; ngatu longwa kwa afidi a nsambila. (Yoa. 7:15; tezanisa ye Mavangu 22:⁠3.) Ozevo, ekuma Yesu kakadila se nlongi watoma fwana?

¹⁰ Kanele vo Yesu walongoka diambu kwa Yosefe wa s’andi ansansi ye Maria wa ngudi andi, watoma longwa kwa Yave wa Nlongi on’osundidi. Muna kuma kiaki Yesu wavova vo: “Kiyivovèle ko; Se kaka, ona wantuma, i yandi wampan’o nkanikinu una mvova, yo una ngika.” (Yoa. 12:​49) Ng’omwene? O Mwana walongwa mana kafwete longa kw’akaka. Ka lukatikisu ko, una kayizidi ko ova ntoto, Yesu ntangwa yayingi kawa malongi ma S’andi. Yesu watoma longwa kikilu.

11. O Yesu yamu nkia tezo katanginina e mpila ina S’andi kekadilanga yo wantu?

¹¹ Tuka kasemenwa, o Mwana ngwizani  ambote kekalanga yau yo S’andi. Una kakedi ko nze muntu, Yesu wamona zola kasonganga Nzambi kwa wantu muna mpila ina kekadilanga yau. O zola kwa Nzambi kwamonekanga muna Mwana, ikuma vo nze ngangu wavova vo: “Eyangi diame diakala vana vena wan’a wantu.”​—⁠Nga. 8:​22, 31.

12, 13. (a) O Yesu adieyi kalongoka muna mpila ina o S’andi kakadilanga ye Aneyisaele? (b) O Yesu aweyi kesadilanga mana kalongwa?

¹² O Mwana walongoka mpe kwa S’andi e mpila ya kadila vana vena mambu mampasi. Kasikil’owu, badika mpila kakadila Yave vana vena akolami a Aneyisaele. Muna Nekemiya 9:28 tutanganga vo: “Vava bavundiswa, basula diak’edi diambi vana ndose aku [Yave]: i nsisa wabasisa vana koko kwa mbeni zau, babayala. Kansi vava bavutuka yo kaza kwa ngeye, wawila kun’ezulu; nkôla zingi wabakôla muna nkenda zaku.” O sala kumosi yo Yave yo mona e nkenda zandi, kwafila mpe Yesu mu fwila wantu e nkenda.​—⁠Yoa. 5:⁠19.

¹³ Yesu wasadila mana kalongoka muna songanga e nkenda kwa alongoki andi. Muna fuku wavitila lufwa lwandi, antumwa zandi zazolwa ‘bansisa, yo tina kwau.’ (Mat. 26:56; Yoa. 13:⁠1) O Petelo wa ntumwa nkutu, wamvakula o nkalu nkumbu ntatu. Kansi, Yesu waziula e moko kwa antumwa zandi vava bavutuka kwa yandi. Wavovesa Petelo vo: “Omono idodokelele, o lukwikilu luaku ke luasuka: onge ovo ovilukidi, osikidis’akw’aku.” (Luka 22:​32) Muna nkubilw’a “ntumwa ye ngunza,” i mwatungilwa Isaele ya mwanda. E nkubilw’a yaka kia Yerusaleme Yampa, nkumbu 12 za ntumwa zakwikizi za Yesu Kristu wa Mwan’ememe zina mo. Yamu unu kiaki, Akristu akuswa kumosi ye “mameme makaka” benungunukanga muna salu kia samuna nsangu zambote za Kintinu muna lusadisu lwa koko kwankuma kwa Nzambi ye lutumu lwa Mwan’andi anzolwa.​—⁠Ef. 2:20; Yoa. 10:16; Lus. 21:⁠14.

Mpila Kalongelanga o Yesu

14, 15. Malongi ma Yesu aweyi maswaswanena ye mana ma asoneki ye Afarisi?

¹⁴ O Yesu aweyi kasadila mana kalongwa vava kalonganga alongoki andi? Avo tutezanese malongi ma Yesu ye m’afidi a nsambila za Ayuda, tumona vo mpil’a Yesu ya longa yisundidi kikilu. Asoneki ye Afarisi ‘babolola diambu dia Nzambi muna diambu dia lusansu lwau.’ Vo i Yesu, mana kalonganga ke matukanga kwa yandi ko; kansi mu diambu dia Nzambi matukanga. (Mat. 15:6; Yoa. 14:​10) I diau mpe tufwete vanganga oyeto.

¹⁵ Vena mpe ye diambu diakaka diaswaswanesa Yesu ye afidi a nsambila. Wavova mu kuma kia asoneki ye Afarisi vo: “Mambu mawonso, konso mana bekunuvovesa, nuvanga mo yo lunda: kansi mun’owu wa mavangu mau, ke nuvangi wo ko; kadi vova bevovanga, kansi yau ke bavangi.” (Mat. 23:⁠3) Yesu wasadilanga mana kalonganga. Yambula twabadika e nona kisonganga e ziku kia diambu diadi.

16. Ekuma olenda vovela vo Yesu wazingil’e ngwazani ye sono kia Matai 6:​19-21?

¹⁶ Yesu wawondelela alongoki andi mu  ‘lundila lusalu lwau kun’ezulu.’ (Tanga Matai 6:​19-21.) Nga Yesu yandi kibeni mpe wasadila luludiku lwalu? Elo, kadi wavova vo: “Amfwenge bena ye nduzu, e nuni z’ezulu zina ye leko; kansi o Mwan’a muntu ken’oku kafil’o ntu ko.” (Luka 9:​58) Yesu zingu kiavevoka kakala kiau. Wasianga salu kia samuna nsangu zambote za Kintinu va fulu kiantete yo songa o mfunu wa lembi lundila lusalu ova ntoto. Yesu wasonga vo o lundila lusalu kun’ezulu kusundidi owete, kadi “ke kufwasila yinsekwa ko ngatu mbumbu, kuna ke kutimina mivi bayiya ko.” Nga olemvokelanga luludiku lwa Yesu lwa lundila lusalu kun’ezulu?

Fu Yatuntanga Wantu kwa Yesu

17. Nkia fu yakitulanga Yesu se nteleki ambote?

¹⁷ Nkia fu yakitula Yesu se nteleki ambote? Kimosi muna fu yayi i mpila kabadikilanga o wantu ana kasadisanga. Lulembamu, zola ye nkenda i fu yakaka ya Yave yina katanginina o Yesu. Tala una e fu yayi yatuntilanga wantu kwa Yesu.

18. Ekuma tulenda vovela vo Yesu nlembami kakala?

¹⁸ Vava katambulwila kiyekwa kia kwiza ova ntoto, Yesu ‘wayisisa nkatu, kabaka mpw’a ntaudi, wakituka se fwaniswa kia muntu.’ (Fili. 2:⁠7) Ediadi diakala se vangu dia lusakalalu. Vana ntandu, Yesu kavezanga wantu ko. Kayisananga ko vo, ‘mono ku zulu yatuka, nufwete kungwila.’ Nswaswani ye masia za luvunu, Yesu kayitundidikanga ko vo yandi kikilu i Masia. Ezak’e ntangwa, wasimanga wantu balembi zayisa kw’akaka vo yandi i Masia yovo zayisa dina kavanga. (Mat. 12:​15-​21) Yesu wazolanga vo wantu bayibakila nzengo za kunlanda mu kuma kia mana bamonanga. Alongoki bakasakeswa kikilu wau vo Mfumu au kavavanga ko vo bakala nze mbasi zalunga ana kakalanga yau kun’ezulu.

19, 20. O zola ye nkenda aweyi zafidila Yesu mu sadisa wantu?

¹⁹ Yesu Kristu wasonga mpe o zola kuna vo i fu kia S’andi eki kisundidi. (1 Yoa. 4:⁠8) Yesu walongelanga wantu muna zola. Kasikil’owu,  badika una kamona mu kuma kia toko dia nyadi. (Tanga Maku 10:​17-22.) “O Yesu unzolele” yo vava kunsadisa kansi, e toko ndioyo kazola sisa mavwa mandi mayingi ko mu kituka se nlandi a Kristu.

²⁰ Nkenda i dimosi muna fu yambote ya Yesu. Nze dina dibwilanga asumuki awonso, awana bawanga malongi ma Yesu, mambu mayingi mampasi banwananga mau. O zaya ediadi, diasadisa Yesu mu kubalongela ye nkenda. Muna bong’e nona: Lumbu kimosi Yesu ye antumwa zandi ke bakala nkutu ye ntangw’a dia ko, kadi salu kiayingi bakala kiau. Kansi, adieyi kavanga o Yesu vava kamona ndong’ayingi yina yanlwakila? “Ubafwidi e nkenda, kadi bakedi nze mameme makondelo mvungudi: obantikidi o kubalonga mambu mayingi.” (Maku 6:​34) Yesu wamonanga e mpasi za wantu ova ntoto, muna kuma kiaki wabalonganga yo vanga masivi mayingi mun’ewete diau. Akaka batuntwanga kwa fu yandi yambote ye malongi mandi, yo kituka alongoki andi.

21. Nkia diambu tuwa mun’elongi dilanda?

²¹ Nze una usonga elongi dilanda, vena ye mambu mayingi tulenda longoka mu kuma kia salu kia Yesu ova ntoto. Nkia mpila zakaka tulenda tanginina Yesu Kristu wa Misionario anene?

Azeyi i Mvutu Zaku?

• O Yesu aweyi kalongelwa una kayizidi ko ova ntoto?

• E mpila kalongelanga o Yesu aweyi yaswaswanena ye yina y’asoneki ye Afarisi?

• Nkia fu yatuntanga wantu kwa Yesu?

[Juvu ja longokela]

[Foto ina muna lukaya lwa 15]

O Yesu aweyi kalongelanga o wantu?