Nga Obadikilanga Akaka nze Una Yave Kekubabadikilanga?

“Ke mwakala mpambula muna to; e yîkwa yasiaziananga kak’e mioyo kumosi.”​—⁠1 KOR. 12:⁠25.

1. Aweyi wamona vava wakota e nkumbu antete muna paradiso ya mwanda?

VAVA tuyambulanga nza yayi yambi, yo yantika kutakana ye nkangu a Yave muna nkumbu antete, tuyangalalanga mona o zola besongaziananga ye mpila bevwilanga akaka o mfunu. Ekwe nswaswani ye wantu bena muna nsi a wisa kia Satana besonganga fu kia lulendo, akwa ntim’ambadi yo zola ntantani! Tukotanga muna paradiso ya mwanda yazala ye luvuvamu ye ungudi.​—⁠Yes. 48:​17, 18; 60:18; 65:⁠25.

2. (a) Nki kilenda kutufila mu monanga kaka e mpilakanu z’akaka? (b) Adieyi tufwete vanga?

² Kansi vava lumbu iviokanga, tulenda yantika badikila ampangi zeto mu mpila yambi. O usumuki weto ulenda kutufila mu monanga kaka e mpilakanu za mpangi zeto ke mu fu yau yambote ko. Ozevo, tulenda yambula kubabadikila nze una Yave kekubabadikilanga. Kele vo ediadi ditubwididi, tufwete fimpa e nyindu eto yo vava wo sia e ngwizani ye nyindu a Yave.​—⁠Luv. 33:⁠13.

O Yave Aweyi Kemwenanga Ampangi Zeto?

3. O Nkand’a Nzambi nki utezanesanga e nkutakani y’Akristu?

³ Muna sono kia 1 Korinto 12:​2-26, Paulu wa ntumwa watezanisa e nkutakani y’Akristu akuswa ye to kina ye ‘yîkwa yayingi.’ Nze una e yîkwa ya to yaswaswana, e yîkwa ya nkutakani mpe yaswaswana ina muna fu ye mavangu mau. Kana una vo i wau, Yave otondanga e nswaswani zazi zawonso. Ozolanga konso muntu muna nkutakani  yo kunyangalela. Ekiaki, i kuma Paulu kekutuwondelelanga vo, yîkwa ya nkutakani “yasiaziananga kak’e mioyo kumosi.” Dilenda kala diampasi mu vanga wo wau vo e kiwuntu kieto kilenda swaswana ye ki’akaka.

4. Ekuma tufwete singikila e nyindu eto muna mpila ya badikila ampangi zeto?

⁴ Ezak’e ntangwa, nanga tulenda sia kak’o meso muna mpilakanu z’ampangi zeto. Avo tuvangidi wo, dikala nze yeto tusadilanga pelo mu mona kaka e mpilakanu zakete-kete z’ampangi zeto. O Yave kesadilanga pelo ko mu vava mona mpilakanu zakete-kete za muntu, kansi omonanga mawonso ma muntu. Nanga tulenda sia kaka sungididi muna diambu diakete ke dituyangidikidi ko, kansi Yave otalanga mawonso ma muntu, kumosi ye fu yandi yambote. Avo tusia e ngolo mu tanginina Yave, tusadisa muna sikidisa o zola ye ungudi muna nkutakani.​—⁠Ef. 4:​1-3; 5:​1, 2.

5. Ekuma ke dinina diambote ko mu fundisa akaka?

⁵ Yesu wazaya wo vo wantu alembi lunga bena ye fu kia fundisa akaka. I dianu kavovela vo: “Ke nufundisa ko, nwalembi fundiswa.” (Mat. 7:⁠1) Mon’owu wa nding’a Kingerekia, Yesu kavova ko vo, “ke nufundisa ko,” nze una wasonama muna nsekola ya Nkand’a Nzambi. Kansi wavova vo: ‘Nuyambula fundisa,’ kadi wazaya wo vo ndonga mun’awana bawa malongi mandi bayikadila ye fu kia fundisa akaka. Nga fu kiaki mpe tuna kiau? Kele vo fu kiaki tuna kiau, tufwete sia ngolo mu soba kimana twalembi fundiswa. Nkia nswa tuna wau mu fundisa o muntu keyambulanga Yave vo kakala ye kiyekwa kiampwena yovo vova vo muntu ndioyo kafwene kala mu nkutakani ko? O mpangi nanga olenda kala ye mpilakanu zandi, avo Yave okwamanananga kunzola, ekuma tufwete kumengena? (Yoa. 6:​44) Nga tukwikilanga vo Yave ofilanga nkutakani a nkangu andi yo lenda singika konso diambu divavwa singikwa muna ntangw’andi?​—⁠Tanga Roma 14:​1-4.

6. O Yave aweyi kebadikilanga selo yandi?

⁶ O Yave omonanga edi diambote kalenda vanga konso Nkristu vava kekituka walunga muna nz’ampa. Muna kuma kiaki, ke diamfunu ko kwa yandi dia siang’e sungididi muna konso mpilakanu. Muna Nkunga 103:12 tutanganga vo: “Konso una wavavuzianina este ye weste, i una katuvengomwenena makuzuka meto.” Konso muntu mu yeto, kafwete vutula matondo muna kuma kiaki.​—⁠Nku. 130:⁠3.

7. Adieyi tulongokele muna mpila Yave kabadikilanga Davidi?

⁷ Nkand’a Nzambi ukutusonganga e ziku kia ngangu za Yave za mona edi diambote muna muntu. Nzambi wayikila Davidi vo “ntaudi ame Davidi, on’olundidi nkanikinu miame yo kundanda kun’etima diawonso, kavanga kaka owu wasonga mu meso mame.” (1 Nti. 14:⁠8) Elo, tuzeye wo vo Davidi wavanga mpe mambu mayingi mambi.  Kana una vo i wau, Yave wasia sungididi mu mana mambote kavanga o Davidi, kadi wazaya vo o ntim’andi wansongi wakala.​—⁠1 Tus. 29:17.

Badikila Ampangi Zaku nze Una Yave Kekubabadikilanga

8, 9. (a) Aweyi tulenda tanginina Yave? (b) Yika nona kilenda kutusadisa mu vanga wo ye adieyi tulenda longoka?

⁸ Yave olenda zaya mana mena muna ntima mia wantu, kansi oyeto katulendi ko. Ekiaki i kuma ka tufwete fundisila akaka ko. Katuzeye makani mandi mawonso ko. Tufwete tangininanga Yave mu lembi sianga o meso mu usumuki wa muntu, owu usinga fokoka. Nga ke diambote ko mu tanginina Yave muna diambu diadi? O vanga wo dilenda kutusadisa mu kala ye ngwizani ambote y’ampangi zeto.​—⁠Ef. 4:​23, 24.

⁹ Muna bong’e nona, yindula vo e nzo iyantikidi fwasakana. E nludi uyantikidi bwa, maza mayantikidi fwasa malunzi, e zianela ziyantikidi fusa. Ana bemonanga nzo yayi balenda vova vo yifwete bangulwa. Kansi, vavaikidi muntu akaka wamona e nzo yo vana e ngindu zakaka. Katala kaka mpw’a nzo ya kumbazi ko, kansi wavav’o zaya una ina muna kati yo mona vo e nzo ilenda kwandi vangululwa. Wasumba nzo yayi yo vangulula yawonso yafwasakana. I bosi, minduti-a-nzila bayantika sivika e mpila yatomena. Nga tulenda kala nze muntu ndioyo wavangulula e nzo? Vana fulu kia talanga kaka oma ma kumbazi m’ampangi zeto, nga tulenda sia sungididi muna fu yau yambote ya mukati yo zaya vo balenda kwau nungunuka muna mwanda? Avo tuvanga wo tuyangalela e fu y’ampangi zeto za mwanda nze una kevanganga o Yave.​—⁠Tanga Ayibere 6:⁠10.

10. Luludiku luna muna sono kia Filipi 2:​3, 4, aweyi lulenda kutusadisila?

¹⁰ O Paulu wa ntumwa watuvana luludiku lulenda kutusadisa mu kuma kia ngwizani eto ye wantu awonso muna nkutakani. Wavova kw’Akristu vo: ‘Ke nuvangila diambu mu mpaka ko, ngatu mu lusanu, kansi muna lusakalalu lua ntima, konso muntu kayibadikila vo nkw’andi unsundidi; ke nutadinge konso muntu yo mandi mambu ko, konso muntu oma m’akw’andi kaka.’ (Fili. 2:​3, 4) Lulembamu lulenda kutusadisa mu kala ye nyindu asikila mu kuma ki’akaka. O vwa akaka o mfunu yo vava edi diambote muna yau, dilenda kutusadisa mu kubabadikila nze una Yave kekubabadikilanga.

11. Mambu mebwanga mu nza nkia nsobani metwasanga muna nkutakani zakaka?

¹¹ Mambu mebwanga mu nza yawonso, mefilanga ulolo wa wantu mu yaluka. Ezak’e mbanza zazala ye wantu a nsi zakaka. Nzenza zakaka bezingilanga muna zunga kieto belongokanga e ludi yo kala yeto mu sambila Yave. Awana besambilanga Yave ‘betukanga muna zula yawonso, yo makanda, ye nsi, ye ndinga.’ (Lus. 7:⁠9) Muna kuma kiaki, muna nkutakani zeto muna ye wantu a nza yawonso.

12. Nkia nyindu tufwete kala wau mu kuma ki’akaka? Ekuma ediadi dilenda kadila diampasi?

¹² Muna nkutakani eto, tufwete sianga sungididi muna kala ye nyindu asikila mu kuma ki’akaka. Ediadi dilenda kutusungamesa elongi dia Petelo wa ntumwa dia songa “nzolani a ungudi yakondwa kuvùnina,” yo “zolana kikilu ye nsi a ntima.” (1 Pet. 1:​22) O songa zola kwakieleka dilenda kala diampasi vana vena ulolo wa wantu a nsi zaswaswana. Fu kia kisi nsi ki’ampangi zeto muna nkutakani nanga kilenda swaswana ye fu kia nsi eto, kumosi ye nsansuk’au ye mpila zingu kiau. Nga diampasi kwa ngeye mu bakula mpangi aku a mwanda wa nsi akaka? Diau adimosi mpe dilenda vangama mu kuma kiaku. Muna kuma kiaki, yeto awonso tuvoveswanga vo: ‘Nuzola wana-ngudi awonso.’​—⁠1 Pet. 2:⁠17.

13. Adieyi tufwete soba muna mpila tubadikilanga akaka?

 ¹³ Ezak’e ntangwa divavanga vo twasoba e ngindu zeto kimana twawokesa o zola muna mpangi zeto zawonso. (Tanga 2 Korinto 6:​12, 13.) Nga tuvovanga vo, “omono kikalanga ye ngindu zalembi songa ko mu kuma ki’akaka, kansi . . . ” tusungunanga ampangi zeto za nsi akaka? Kele vo i wau tuvanganga, tufwete sia ngolo za katula ngindu zalembi songa mu kuma ki’akaka muna ntima mieto. Tufwete kiyuvula: ‘Nga nsianga ngolo za zaya wantu bena vo e fu yau ya kisi nsi yaswaswana ye yame?’ Obadika e kiuvu kiaki, dilenda kutusadisa mu zola ampangi zeto za nza yawonso.

14, 15. (a) Yika nona y’awana basoba e ngindu zau mu kuma kia akaka. (b) Aweyi tulenda kubatanginina?

¹⁴ Nkand’a Nzambi ukutusonganga nona y’awana basoba e ngindu zau, mosi muna yau i Petelo wa ntumwa. Wau vo Nyuda kakala, Petelo kafwana kota mu nzo za esi zula ko. Yindula una kamona vava kavoveswa vo kenda kuna nzo ya Koneleo wa mwisi zula ona walembi zengwa! Petelo wasoba e ngindu zandi, wazaya wo vo i luzolo lwa Nzambi vo wantu a zula yawonso bakota muna nkutakani ya Akristu. (Mav. 10:​9-​35) O Saulu ona wakituka Paulu wa ntumwa, yandi mpe wasoba e ngindu zalembi songa mu kuma kia akaka. Wavova vo, wamenganga Akristu muna ‘mbangik’ansita kabangika dibundu dia Nzambi, yo fwantakesa dio.’ Kana una vo i wau, vava Mfumu Yesu kansingika, Paulu wasoba kikilu yo tambulwila luludiku lw’awana kabangikanga.​—⁠Ngal. 1:​13-20.

¹⁵ Ka lukatikisu ko vo muna lusadisu lwa mwand’a Yave tulenda soba e ngindu zeto za mpila tubadikilanga akaka. Kele vo tuna ye ngindu zalembi songa mu kuma ki’akaka muna ntima mieto, tusia ngolo za vuza zo yo “lunda untwadi wa mwanda muna kangwa kia ungudi.” (Ef. 4:​3-6) Nkand’a Nzambi ukutukasakesanga mu “vwata zola, kwina vo i kangwa kia zikuka.”​—⁠Kol. 3:⁠14.

Tutanginina Yave Muna Salu Kieto kia Umbangi

16. Adieyi ekani dia Nzambi mu kuma kia wantu?

¹⁶ Paulu wa ntumwa wasoneka vo: “Kuna kwa Nzambi ke kuna mandangi [mpambula] ko.” (Roma 2:​11) I kani dia Yave vo wantu a makanda mawonso bansambila. (Tanga 1 Timoteo 2:​3, 4.) Muna kuma kiaki, wakubika vo e “nsangu zambote za mvu ya mvu,” zasamunwa “kuna kwa zula yo makanda, ye ndinga, ye nkangu miawonso.” (Lus. 14:⁠6) Yesu wavova vo: “E mpatu i nza.” (Mat. 13:​38) E  mvovo miami aweyi misonganga kuna kwa ngeye ye kwa esi nzo aku?

17. Aweyi tulenda sadisila wantu a mpila zawonso?

¹⁷ Ke awonso ko balenda kwenda yakuna nsuk’a nza mu samuna nsangu za Kintinu kw’akaka. Kansi, tulenda kweto samuna e nsangu zazi kwa wantu a makanda mawonso ana bezingilanga muna zunga kieto. Nga tusadilanga elau dia sila umbangi kwa wantu a mpila zawonso, ke mu awana kaka twakulukilwa sila umbangi ko? Ekuma olembi dio kitulwila se kani diaku dia sila umbangi kw’awana ke bawidi nsangu zambote ko?​—⁠Roma 15:​20, 21.

18. O Yesu aweyi kavwilanga wantu o mfunu?

¹⁸ Yesu wazolanga sadisa wantu awonso. Kasila kaka umbangi mu zunga kimosi ko. Muna Nkand’a Nzambi tutanganga vo, Yesu “wele akangala muna mavata mawonso, yo muna mpata-vata.” I bosi, “una kamwene ndonga, ubamwene nkenda,” yo kubasadisa.​—⁠Mat. 9:​35-37.

19, 20. Nkia mpila zakaka tulenda songela nyindu a Yave ye wa Yesu mu kuma kia wantu a mpila zawonso?

¹⁹ Nkia mpila zakaka tulenda songela luzolo lwa sadisa akaka? Akaka bevanganga ngolo za sila umbangi muna fulu yakaka ya zunga yau ina keyitoma sadilwanga ko. E fulu yayi ilenda kala mazandu, fulu kibakilwanga makalu, vana ndambu za nzo zina ke beyambulanga ko vo wantu bakota. Akaka bevanganga e ngolo za longoka ndinga za kinzenza mu sila umbangi kwa nzenza zizingilanga muna zunga kiau yovo kw’awana kebasilwanga umbangi ko. O longoka kubakayisa muna ndinga zau za kingutukila, dilenda songa vo okubavwanga kielek’o mfunu. Kele vo katulendanga longoka ndinga za kinzenza ko, nga tulenda kasakesa awana bevanganga wo? Kieleka katuzolele yoyesa ko awana bevanganga e ngolo za longoka ndinga za kinzenza mu sila umbangi kwa wantu a nsi zakaka. Mioyo miawonso miantalu vana meso ma Nzambi. Tufwete badikilanga mambu nze una Nzambi kebadikilanga mo.​—⁠Kol. 3:​10, 11.

²⁰ Kala yo nyindu a Nzambi mu kuma kia wantu, divavanga mpe vo wasila wantu awonso umbangi, lembi tala mpila zingu kiau. Akaka muna yau balenda kala awana bakondwa e nzo, bezingilanga mu mpambu za nzila, yimpumbulu ye minta-zumba. Kele vo muntu utuveng’e mbi, ediadi kadifwete kutufila ko mu yindula vo esi nsi andi awonso yovo ekanda diandi mpe wantu ambi. Paulu wavangwa e mbi kw’akaka, kansi ediadi ke diamfila ko mu yambula sila umbangi kwa wantu a zunga yayina. (Mav. 14:​5-7, 19-​22) Wakala ye vuvu vo akaka balenda tambulwila e nsangu zambote.

21. O nyindu a Yave mu kuma ki’akaka aweyi ulenda kusadisila?

²¹ Owau tutomene bakula vo diamfunu diakala yo nyindu a Yave muna nkal’eto y’ampangi zeto muna nkutakani, ampangi zeto muna nza yawonso ye awana tusilanga umbangi. Muna tangininanga nyindu a Yave, i tulenda wokesela luvuvamu ye ungudi. Muna mpila yayi, tulenda sadisa akaka bazola Yave, wa Nzambi ‘ndion’olembi sianga mpambula,’ kansi osonganga zola kwa wantu awonso, kadi “yau awonso i salu kia moko mandi.”​—⁠Yobi 34:⁠19.

Nga Olenda Vana e Mvutu?

• Nkia nyindu tufwete venga mu kuma ki’ampangi zeto?

• Aweyi tulenda tanginina Yave muna mpila tubadikilanga ampangi zeto?

• Adieyi olongokele mu mpila tufwete badikila ampangi zeto za nza yawonso?

• Aweyi tulenda tanginina nyindu a Yave mu kuma kia wantu vava tukalanga muna salu kia umbangi?

[Juvu ja longokela]

[Foto ina muna lukaya lwa 26]

Aweyi olenda zayila o wantu a fu ya kisi nsi yaswaswana?

[Foto ina muna lukaya lwa 28]

Aweyi olenda samwinwina e nsangu zambote kwa wantu ayingi?