Nga Osungamenanga?

Nga wayangalele o tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:

• Anganga nkia ntangwa bakingula Yesu?

Nsekola mosi ya Nkand’a Nzambi ivovanga vo: “Akwa Mpandu ka bakingula Yesu mu dikilwa kia bulu ko muna fuku una kawutuka, nze una bavanga avungudi. Ngonde zayingi zateka vioka.” Vava bayenda kunkingula, wana Yesu se “kingyanangyana” muna nzo a mase mandi. (Mat. 2:​7-​11) Kele vo anganga bakingula Yesu muna fuku una kawutuka bantwasila wolo ye tukau twankaka twantalu, Maria kadi vana kaka lukau lwa nuni zole ko, kina kayenda muna tempelo vava Yesu kalungisa lumbu 40.​​—⁠Yanuali-Malusu, lukaya lwa 31.

• O wantu adieyi balenda vanga muna tomesa zingu kiau?

Nanga olenda kiyuvula: ‘Nga ndenda vanga diambu mu vevola mpila zingu kiame?’ I diau kavanga o Amy. Kana una vo nzimbu zayingi kakala zau, kakala ye kiese ko. Wabakula vo kuyivana muna salu ya nza yayi, dilenda yoyesa lukwikilu lwandi. Muna kuma kiaki, wabak’e nzengo za sia mambu ma Kintinu va fulu kiantete yo kuyivana mu salu kia kimviti a nzila mu fikolo. Amy wavova vo: “Owau e kiese imonanga kilutidi kina yamonanga vava yasadilanga e nza.”​​—15/1, lukaya lwa 19.

• Adieyi dilenda sadisa ngudi zayingi mu kala ye kiese?

Ngudi zayingi zisadilanga kumbazi. Akaka bevanganga wo mu lungisa nsatu za esi nzo, akaka mu vava kala ye nzimbu zafwana yovo mu sumba lekwa yantalu. Vena mpe y’awana bevanganga wo kadi betoma zolanga sala e salu kina bazeye. O Nkand’a Nzambi usonganga e kiyekwa kia ngudi muna nzo, musungula ekolo mwana kena wakete. Akaka besalanga ndambu a lumbu yo yambula e salu kimana batoma sia sungididi kwa esi nzo. Ediadi kiese kiayingi dikubatwasilanga.​​—Abidi-Yuni, lukaya lwa 26-​29.

• Nkia “mbandu” kayika o Yesu muna mvovo miandi miasonama muna Matai 24:⁠34?

Nkumbu miayingi, Yesu kasadila o mvovo “mbandu” mu yika wantu ambi. Kansi, vava kavova kw’alongoki andi, ana bekuswa muna mwand’avelela, Yesu mbandu akaka kayika. E mbandu kayika i y’awaya bebakula e nsas’a mambu masonama muna Matai 24:​32, 33. Ediadi disonganga vo, e mbandu kayika o Yesu i alongoki andi akuswa, tuka muna tandu kiantete yamu lumbu yeto.​​—⁠15/2, lukaya lwa 23-24.

• Nze una wasonama muna Ngalatia 3:​24, o Nsiku aweyi wakadila se nlongi?

Kuna nz’ankulu, o nlongi i ntaudi ona walunga-lungang’o mwana yo sikidisa vo luzolo lwa se lwazitiswa. Diau adimosi mpe, o Nsiku wataninanga Ayuda mu lembi kuyisia mu mavangu mambi nze sompana y’esi zula. Kansi, nze una wakala nlongi a mwana, o Nsiku kolo kiakete kaka wakala, yavana kiayiza Kristu.​​—Abidi-Yuni, lukaya lwa 18-​21.

• Nkia fu tufwete songanga ina tutanganga muna Yakobo 3:⁠17?

Muna kala aveledi, tufwete venga edi diambi vana vau. (Etu. 39:​7-9) Tufwete mpe kala akwa ungudi muna venganga fu yambi ilenda fwasa ungudi wau. Muna kuma kiaki, konso muntu mu yeto kafwete kiyuvula: ‘Nga nzayakene vo i mvangi a ungudi ovo i mfwasi a ungudi? Nga ngina ye fu kia tantana y’akaka? Nga ngina ye fu kia funga makasi mu nzaki yovo kia fungisa akaka makasi? Nga nlolokanga akaka yo lembi kubakomenena ngindu zame?’​​—15/3, lukaya lwa 24-25.

• Ekuma o Yesu kawukila e mpofo malembe-malembe? (Maku 8:​22-26)

O Nkand’a Nzambi kevananga mvutu zasikididi ko. Kansi, muna wuka e mpofo malembe-malembe, o Yesu wansadisa mu kulukilwa o ntemo. Evangu diadi diasonga o zola kakala kwau o Yesu muna muntu ndioyo wa mpofo.​—⁠1/4, lukaya lwa 30 mu kimputu.