Sompa yo Wuta Wana mu Lumbu Yayi Yambaninu

“E kolo kikufamene.”​—⁠1 KOR. 7:⁠29.

1. (a) Nkia mambu mekala muna ‘ntangwa yayi yampasi’? (b) Ekuma mpasi za zingu kia nzo zifwete kututokanesa?

DIAMBU dia Nzambi diazayisa vo muna “ntangw’a mbaninu” mukala ye vita, nzakama za ntoto ye vuku. (Dan. 8:​17, 19; Luka 21:​10, 11) O Nkand’a Nzambi walukisa mpe vo muna ntangwa yayi yambaninu mu kala ye mambu mayingi mampasi. E mpasi za zingu kia esi nzo, dimosi muna mambu mekala muna “nsungi za tema” yovo ntangwa zampasi mu ‘lumbu yayi yambaninu.’ (2 Tim. 3:​1-4) Ekuma tufwete tokanena mambu mama mampasi? E kuma kadi e mambu mama mevangamanga mu nza yawonso ye malenda vukumuna Akristu muna mpila bebadikilanga o sompa yo wuta wana. Mu nkia mpila?

2. O wantu aweyi bebadikilanga e longo yo vonda longo?

² Omu lumbu yayi, o vonda e longo diakituka se diambu diakete yo wokela muna nsi zayingi. Kansi, tufwete sungamena vo e mpila in’o Yave wa Nzambi kebadikilanga e longo yo  vonda longo yaswaswana ye una wantu bebadikilanga dio. O Yave aweyi kebadikilanga e diambu diadi?

3. Yave yo Yesu Kristu aweyi bebadikilanga e longo?

³ Yave wa Nzambi ovavanga vo awana basompa basongang’e kwikizi muna nsilu mia longo mina basilana. Vava kayikakesa yakala yo nkento antete, Yave wavova vo “o yakala . . . katatidila nkaz’andi: bekala nitu mosi.” I bosi Yesu Kristu wakudikila vo: “Kina kiayikakeswa kwa Nzambi, o muntu kavambanisa ko.” Wavova diaka vo: “Konso on’osindik’o nkaz’andi, ovo ke mu diambu dia zumba ko kasompa wakaka, zumba katele yandi: ndiona mpe osomp’on’osindikilu, zumba katele yandi.” (Etu. 2:24; Mat. 19:​3-6, 9) Muna kuma kiaki, Yave ye Yesu bezolanga vo longo lwazinga yo fokoka kaka kele vo mosi mun’akazi ofwidi. (1 Kor. 7:​39) Wau vo longo diambu diavauka, o vonda longo ke diambu diakete ko. Kieleka, Nkand’a Nzambi usonganga vo Yave omenganga evangu dia vonda longo, nanga vo mu kuma kaka kina kiyikwanga muna Nkand’a Nzambi. *​​—⁠Tanga Malaki 2:​13-16; 3:⁠6.

Zitisanga Longo

4. Ekuma aleke ayingi Akristu bekuyibanzilanga wau basompa mu nzaki?

⁴ E nza yayi yambi tuzingilanga iwokesanga mavangu ma zumba. Lumbu yawonso, tulenda mona mavangu ma zumba mesongwanga mu mpila zayingi. Katufwete veza ko una malenda kutuvukumwina, musungula aleke eto muna nkutakani. Aweyi aleke Akristu bafwete badikilanga mavangu malenda sikamesa nsatu za vukana kana nkutu vo ngolo besianga mu venga ngindu zazi zambi? Akaka bevavanga sompa nzaki mu venga ntonta zazi, kadi bebanzanga vo muna mpila yayi balenda sunda mavangu ma zumba. Kansi ke kolo kiayingi ko kiviokanga, aleke ayingi bekuyibanzanga mu kuma kia nzengo babaka. Ekuma? Vava kiese kia sompa kikulukanga, bebakulanga vo oyau ye akazi au ke batomene zayana ko mu mambu mayingi ma zingu. Muna kuma kiaki, akazi awaya mpasi zayingi benwananga zau.

5. Adieyi dilenda sadisa akazi mu zitisa nsilu mia longo? (Tala e mvovo vana yanda lukaya.)

⁵ O sompana yo muntu, kana nkutu vo Nkristu, ona wabadikilanga vo muntu ambote kansi owau osobele, dilenda kala diambu diampasi kikilu. (1 Kor. 7:​28) Kansi, kana nkutu nkia diambu dilenda bwa, Akristu akieleka bazeye wo vo o vonda longo mu kuma kiaswaswana y’eki kiasonama mu Nkand’a Nzambi, ke mpila yambote ko ya singikila e ntantani za longo. Muna kuma kiaki, awana besianga ngolo zalembi vonda longo, muna zitisa nsilu basilana vava basompana, bafwana sanisinwa yo sadiswa kw’ampangi muna nkutakani. *

6. Aweyi aleke Akristu bafwete badikila o sompa?

⁶ Nga u nleke ampumpa? Avo i wau, aweyi obadikilanga o sompa? Olenda venga mpasi zayingi zibwanga muna longo kele vo ozizididi yavana olwaka muna ntela yafwana mu sompa, yo zikuka muna ngindu ye muna mwanda, lembi yantika nzol’a kimakangu yo mpangi ayakala yovo ankento. Dialudi vo, Nkand’a Nzambi ke uyikanga mvu ko mina o muntu kafwete kala muna  sompa. * Kana una vo i wau, Nkand’a Nzambi usonganga vo diambote mu vingila yavana kivioka e ntangwa ina e nsatu za vukana zikalanga zayingi. (1 Kor. 7:​36) Ekuma? E kuma kadi, e nsatu za vukana zilenda yivisa o zayi waku yo kufila mu sompa nzaki yo kutwasila mpasi kuna sentu. Sungamena vo, o luludiku kevananga o Yave muna Nkand’a Nzambi mu kuma kia longo, i mu wete diaku ye lulenda kutwasila kiese.​—⁠Tanga Yesaya 48:​17, 18.

Mbebe ya Kala Ese Yovo Ngudi

7. Adieyi dibwilanga akazi ayingi bena vo bakinu aleke? Ekuma dilenda twasila ntantani muna longo?

⁷ Akazi akaka besompanga kileke bewutanga mwana ekolo yau kibeni bakinu aleke. Ke bakala ye ntangwa yafwana ko yatoma zayana muntu yo nkw’andi una ke bawutidi mwana ko, ona ovavanga vo kalungwa-lungwa ntangwa zawonso. Vava nkento keyantika sia sungididi kiawonso muna mwana, o yakala una vo nleke olenda mwena mwan’andi kimpala. Vana ntandu, o viokesa fuku wamvimba lembi leka mu kuma kia mwana, dilenda twasa mpasi yo sia ngwizani a yakala yo nkento mu vonza. Wau vo akazi bakinu aleke, beyantika mona vo ke bena diaka ye luvevoko ko. Owau ke balendi diaka kwenda mu fulu ina bazolanga kingula ko yovo vanga mambu mana bazolanga vanga una kebawutidi ko. Aweyi bafwete badikila e zingu kiau kisobele?

8. Aweyi tufwete badikilanga e diambu dia sansa wana? Ekuma?

⁸ Nze una divavilanga vo o longo lwazitiswa, o sansa wana mpe kufwete badikilwa se mbebe y’elau kevananga o Nzambi kwa mase. Konso mpasi zilenda twasa luwutuku lwa mwana muna zingu kia akazi Akristu, bafwete sia ngolo mu sunda mpasi zazi mu mpila yambote. Wau vo Yave wavana o wantu elau dia wuta wana, mase bafwete badikila mwana owutukidi se ‘lukau lutukidi kwa Yave.’ (Nku. 127:⁠3) Mase bena vo Akristu bafwete sia ngolo mu lungisa mbebe au ya kala ‘se yo ngudi muna Mfumu.’​—⁠Ef. 6:⁠1.

9. (a) Adieyi divavwanga muna sansa mwana? (b) O yakala adieyi kalenda vanga mu sadisa nkaz’andi kalembi yoya muna mwanda?

⁹ O sansa mwana salu kiayingi ditwasanga. Ntangwa ye ngolo divavanga kwa mase. O yakala una vo Nkristu kafwete bakula vo vava mwana kewutuka, diampasi dikala kwa nkaz’andi mu sia sungididi muna tukutakanu, kekala diaka ye ntangwa yafwana ko mu kubik’elongi dia yandi kibeni dia Nkand’a Nzambi yo badika mana kelongokanga. Ediadi dilenda yoyesa kimwanda kiandi. Muna lungisa e mbebe ya sansa mwana, divavanga  vo eyakala mpe kavanga mawonso kalenda mu sadisa nkaz’andi. Olenda mokena yo nkaz’andi muna nzo mu kuma kia mambu mana katomene bakula ko muna lukutakanu. Olenda mpe sala yo mwana kimana o nkaz’andi kakala ye ntangwa ya kwenda samun’e nsangu zambote za Kintinu.​—⁠Tanga Filipi 2:​3, 4.

10, 11. (a) O wana aweyi balenda longelwa muna “lusansu” lwa Yave? (b) Ekuma mase mayingi m’Akristu bafwana sanisinwa?

¹⁰ E mbebe ya nsasa mwana ivavanga mpe vo wamvana madia ye mvwatu, fulu kia leka yo lunga-lunga vimpi wandi. Musungula mu lumbu yayi yambaninu, o wana bafwete longwa nsiku mia nkal’ambote tuka kinsedia kiau. Wana bafwete longwa “muna ndonga yo lusansu lua Mfumu.” (Ef. 6:⁠4) Longa muna “lusansu lua Mfumu” divavanga vo wakotesa e nyindu a Yave muna ntim’a mwana tuka kinsedia yamuna mvu miampasi mia kileke.​—⁠2 Tim. 3:​14, 15.

¹¹ Vava Yesu kavovesa alongoki andi vo bafwete ‘kitula wantu a zula yawonso s’alongoki,’ wazola songa vo mase mpe bafwete sadisa wan’au mu kituka alongoki. (Mat. 28:​19, 20) Ediadi diampasi kadi e nza yayi ivukumunanga aleke. Muna kuma kiaki, mase ana betoma longanga wan’au mu kituka Akristu bafwana sanisinwa kwa mpangi zawonso muna nkutakani. Mase mama ‘besundanga’ e nza muna lukwikilu besonganga yo sansa wan’au mu mpila yambote.​—⁠1 Yoa. 5:⁠4.

Ekani dia Kala Mpumpa Yovo Lembi Wuta

12. Ekuma Akristu akaka bebakilanga nzengo zakala mpumpa mu mvu miayingi?

¹² Wau vo “e kolo kikufamene” ye ‘mpw’a nza yayi mu soba ina,’ Nkand’a Nzambi uwondelelanga mu badika e nluta mia kala mpumpa. (1 Kor. 7:​29-​31) Muna kuma kiaki, Akristu akaka bebakanga nzengo zakala mpumpa muna zingu kiau kiawonso yovo kala mpumpa mu fikolo, i bosi besompa. Ke bevanganga wo mu vava lungisa e zolela ya yau kibeni ko. Ndonga bevanganga wo mu sadila Yave ‘kondwa ntokani.’ (Tanga 1 Korinto 7:​32-35.) Akristu ayingi bena vo mpumpa besalanga se aviti a nzila yovo sadila kuna Vula. Akaka bekuyifwanisanga mu kota Sikola ya Nkubama ya Uselo kimana basadilwa muna nkubik’a Yave. Kieleka, awana basala mvu miayingi muna salu kia ntangwa ke ntangwa vava bakala ampumpa, i bosi babaka nzengo za sompa, nluta miayingi bebakanga muna mana balongoka muna mvu mia kimpumpa.

13. Ekuma akazi akaka Akristu bebakilanga nzengo za lembi wuta?

¹³ Diambu diakaka dimonekanga muna nsi zayingi, dia akazi ayingi bebakanga nzengo za lembi wuta. Akaka  bevanganga wo mu kuma kia kondwa nzimbu; akaka mu kala ye ntangwa yakuyivana mu salu kifutanga nzimbu zayingi. Vena mpe y’akazi Akristu bebakanga nzengo zalembi wuta. Kansi, bevanganga wo mu kuyivana mu salu kia Yave. Ediadi ke disongele ko vo akazi awaya ke bemonanga kiese kia longo ko. Mona bemonanga kio. Kansi, bebembolanga miaka nluta milenda twasa longo kadi bazolele sia Kintinu kia Nzambi va fulu kiantete. (1 Kor. 7:​3-5) Akaka muna akazi awaya besadilanga Yave ye mpangi zau nze akengi a zunga, amvivu yovo sadila kuna Vula. Akaka besalanga nze aviti a nzila yovo misionario. Yave kevilakana salu kiau ko ye zola besonganga muna nkumbu andi.​—⁠Ayib. 6:⁠10.

‘Mpasi Muna Nitu’

14, 15. Nkia ‘mpasi muna nitu’ balenda mona mase m’Akristu?

¹⁴ Paulu wa ntumwa wavovesa akazi Akristu vo “mpasi bemona muna nitu.” (1 Kor. 7:​28) Mpasi zazi zilenda kala za mayela m’akazi, ma wan’au yovo mase mau bena vo anunu. Dilenda kala mpe mpasi za sansa wana. Nze una tuyikidi kuna lubantiku lw’elongi diadi, o Nkand’a Nzambi wazaisa vo muna “lumbu yambaninu” mukala ‘ntangwa zampasi.’ Muna ntangwa zazi zampasi mu kala mpe ye wana ‘bekolamena mase.’​—⁠2 Tim. 3:​1-3.

¹⁵ O sans’o wana diambu diampasi kikilu kwa mase m’Akristu. Mambu mebwilanga akaka mu ‘ntangwa yayi yampasi’ tuzingilanga, malenda mpe kutubwila. Muna kuma kiaki, mase m’Akristu bafwete nwana vita kimana e fu yambi ya ‘tandu kiaki’ yalembi kota muna wan’au. (Ef. 2:​2, 3) E vita yayi yampasi mu sunda yo. Vava o mwana keyambulanga sadila Yave, ‘mpasi’ ditwasanga kwa mase ana besianga ngolo za longa wan’au e nzila za Nzambi.​—⁠Nga. 17:⁠25.

‘Mukala ye Mpasi Zayingi’

16. O Yesu nkia ‘mpasi’ kayika?

¹⁶ Vena ye mpasi zayingi zikwiza kuna sentu ezi zilutidi konso ‘mpasi’ zilenda kala muna longo yovo mu sansa wana. Muna ungunza wandi mu kuma kia nkal’andi ye mbaninu ya tandu, Yesu wavova vo: “Mukala mpasi zingi zina vo ke zakala ko, tuka kuna lubantiku lua nza yamu wau, ngatu kala nkutu.” (Mat. 24:​3, 21) I bosi Yesu wasonga vo vekala ye ndong’ayingi ivuluka muna ‘mpasi zayingi.’ Muna kolo kiaki, e nza ya Satana itelamena Mbangi za Yave. Ntangwa yampasi kikilu ikala kwa yeto awonso, kana mbuta yovo nleke.

17. (a) Ekuma tulenda kadila ye vuvu kia kusentu? (b) Nki kilenda kutusadisa mu kala ye nyindu asikila mu kuma kia longo ye wuta wana?

¹⁷ Kansi, katufwete kala ye wonga ko mu kuma kia mambu mebwa kuna sentu. Amase ana besonganga kwikizi kwa Yave balenda kala ye vuvu vo betaninwa kumosi yo wan’au. (Tanga Yesaya 26:​20, 21; Sef. 2:​2, 3; 1 Kor. 7:​14) Ekolo kiaki una ke kilweke ko, yambula mana tuzeye mu kuma kia lumbu yayi yampasi tuzingilanga matusadisa mu kala ye nyindu asikila muna kuma kia longo yo wuta wana mu lumbu yayi yambaninu. (2 Pet. 3:​10-​13) Muna mpila yayi, tulenda twasa zitu yo nkembo kwa Yave ye muna nkutakani y’Akristu, twakala twasompa yovo mpumpa, kala yo wana yovo kondwa wana.

[Mvovo Vana Yand’a lukaya]

Yuvu ya Lufimpu

• Ekuma aleke Akristu ke bafwete kadila ye nzaki za sompa ko?

• Adieyi divavwanga mu sansa mwana?

• Ekuma Akristu ayingi bebakilanga nzengo zalembi sompa yovo zalembi wuta?

• Nkia ‘mpasi’ zilenda bwila mase m’Akristu?

[Yuvu ya Longoka]

[Foto ina muna lukaya lwa 17]

Ekuma dinina diangangu kw’aleke Akristu mu lembi sompa mu nzaki?

[Foto ina muna lukaya lwa 18]

O yakala olenda vanga mayingi mu sadisa nkaz’andi kimana kakala ye ntangwa yafwana ya sala salu ya mwanda

[Foto ina muna lukaya lwa 19]

Ekuma akazi akaka Akristu bebakilanga nzengo zalembi wuta?