E Buka kia Selo Yambuta Aweyi Kiakubamena?

AWANA bena muna Buka kia Selo Yambuta kia Mbangi za Yave, selo yazikuka ya Nzambi yakuswa muna mwanda. Yau besunzulanga ntaudi akwikizi yo lulungalalu, una ye kiyekwa kia vana madia ma mwanda, ludika yo nungununa e salu kia samun’e nsangu zambote za Kintinu omu nza yawonso.​—⁠Mat. 24:​14, 45-47.

E Buka kia Selo Yambuta bekutakananga kina Kiatatu kia konso lumingu. Ediadi disadisanga ampangi zazi mu sal’entwadi. (Nku. 133:⁠1) Ampangi za Buka kia Selo Yambuta mu buka yakaka mpe besadilanga. Muna sal’e salu kia Nzambi mu mpila yambote, konso buka kina ye kiyekwa kiandi, nze una tumona mu tini ilanda.

▪ BUKA KIA AFIDI: Afidi a konso buka yau bena muna buka kiaki, kumosi ye nsoneki una mpe vo mwisi Buka kia Selo Yambuta. E buka kiaki kifilanga yo fimp’e salu kia buka yawonso ya Selo Yambuta kimana yasala mu mpila yambote. Kitalanga mpe mambu ma kinsalukisa mebwilanga Mbangi za Yave omu nza yawonso, nze lubangamu, sumbula ye mambu makaka.

▪ BUKA KI’ASADI: Ampangi bena muna buka kiaki bena ye kiyekwa kia lunga-lunga nsatu za nitu ye za mwanda z’asadi a Betele omu nza yawonso. E buka kiaki kina mpe ye kiyekwa kia bokela yo sola asadi ampa a Betele yo singika mambu ma salu kiau muna Betele.

▪ BUKA KIA AMWANGI: E buka kiaki kifilanga e salu kia nieteka, vaikisa yo mwanga nkanda misadisanga wantu mu bakula Nkand’a Nzambi mu nza yawonso. Kiau kina ye kiyekwa kia lunga-lunga e sadilwa yawonso nze masini ma nietekena nkanda ye salanganu yakaka isadilwanga muna mavula ma Mbangi za Yave. E buka kiaki kivavanga e mpila yambote ifwete sadilwa tukau tuvewanga mu nungununa e salu kia Kintinu omu nza yawonso.

▪ BUKA KIA SALU: Ampangi muna buka kiaki i betalanga oma ma salu kia umbangi ye mambu ma nkutakani, aviti a nzila, akuluntu, akengi a zunga ye amvivu. Kiau mpe kikubikanga malongi mevaikiswanga muna Salu Kieto kia Kintinu, bokela ampangi bekotanga Sikola ya Ngiladi ye ya Nkubama ya Uselo yo kubafila mu fulu bekwenda sadila.

▪ BUKA KIA MALONGI: E buka kiaki kikubikanga malongi mevewanga muna tukutakanu twakete ye twampwena ye muna nkutakani. Kikubikanga mpe malongi mevewanga kw’asadi a Betele yo lunga-lunga oma ma sikola nze Sikola ya Ngiladi, Sikola kia Salu kia Kimviti a Nzila ye mana mesiwanga mu kasete ye vídeo.

▪ BUKA KIA ASONEKI: E buka kiaki kina ye kiyekwa kia soneka malongi muna nkanda yo kayanesa mio kwa mpangi ye kwa nkangu. I buka kivananga e mvutu za yuvu, kubika fuka ye malongi ma nkangu wawonso. Kiau mpe kitalanga oma ma salu kia nsekola kisalwanga mu nza yawonso.

Paulu wa ntumwa watezanesa e nkutakani y’Akristu akuswa ye nitu a muntu yo songa vo konso yikwa kina yo mfunu andi, yo songaziananga e zola ye una besadilanga kumosi mu lungisa salu bavewa kwa Nzambi. (Roma 12:​4, 5; 1 Kor. 12:​12-​31) Yesu Kristu una vo i ntu, ovananga konso kikwa kia nitu dina kivwidi o mfunu kimana yatoma sala yo dia muna mwanda. (Ef. 4:​15, 16; Kol. 2:​19) Eyayi i mpila e Buka kia Selo Yambuta kivitilang’o ntu muna mpila befidilwanga kwa Yave muna mwand’avelela.