Kala ‘Wavelela Muna Vumi wa Nzambi’

MUNA songa vo Yave wa Nzambi wavelela muna mawonso, Nkand’a Nzambi uvovanga mu kuma kiandi vo: “Wavauka, wavauka, wavauka, o Yave.” (Yes. 6:3; Lus. 4:⁠8) E mvovo mia Kiyibere ye Kingerekia miasekolwa vo “vauka,” nsambila yavelela miyikanga yo kuyivaula muna mambu masafu. O vauka kwa Nzambi kusonganga o velela kwandi muna nkal’andi yawonso.

Yave wa Nzambi avauka, nga ovavanga vo asambidi andi bakala aveledi muna nitu, ye fu ye muna mwanda? Nkand’a Nzambi uvovanga mu mpila yakiá vo, Yave ovavanga vo asambidi andi bakala avauki. Muna 1 Petelo 1:16 tutanganga vo: “Nwakal’avauki; e kuma kadi, omono i Mvauki.” O wantu alembi lunga, nga balenda kieleka tanginina o vauka kwa Yave? Elo, kanele vo ke mu mawonso ko. Tulenda kala twavelela vana meso ma Nzambi, kele vo tukunsambila mu mpila yavelela yo kala ye ngwizani ambote yo yandi.

Aweyi tulenda kadila aveledi muna nza yayi yasafuka? Nkia fu tufwete venga? Adieyi tufwete soba muna mpova zeto ye muna nkal’eto? Yambula twazaya dina tulenda longoka muna nkanikinu kavan’o Nzambi kw’Ayuda, vava bavaika muna Babele yo vutuka kuna nsi au akivwila, muna mvu wa 537 vitila tandu kieto.

‘Vekala ye Nzil’a Vauka’

Yave wazayisa vo nkangu andi una wakala mu kinkole kuna Babele, usinga vutuka kuna nsi au akivwila. Ungunza wau wasikidisa vo: “O manene mekala vana, ye nzila, ina iyikwa vo, Nzil’a vauka.” (Yes. 35:8a) Mvovo miami misonganga vo Yave kateta kaka nzila ko kimana Ayuda bavutuka, kansi wasia mpe nsilu wa kubatanina.

Muna tandu kieto, Yave waziula “Nzil’a vauka” muna vaikisa Akristu akuswa muna Babele Anene, ina vo kintwadi kia nsambila zawonso zaluvunu ova nza. Muna mvu a 1919 wabavevola muna ubundu wa nsambil’a luvunu yo kubavelelesa muna malongi mawonso maluvunu. Nze selo ya Yave o unu, tuyangalelanga luvuvamu lwa mwanda vana vena ampangi, olu lulenda kutusadisa mu sambila Yave yo kala ye ngwizani ambote yo yandi ye mpangi zeto.

“Finkambi-kambi” fia Akristu akuswa ye “ndong’ayingi” ya “mameme makaka” basola  kangalela muna nzila yayi yavauka yo bokela wantu akaka mu kubayikama. (Luka 12:32; Lus. 7:9; Yoa. 10:​16) E “Nzil’a vauka” yaziuka kw’awonso beyangalelanga ‘tambika to yau se kimenga kiamoyo, kiavauka, kialuyangalalu kuna kwa Nzambi.’​—⁠Roma 12:⁠1.

‘Ana Bafunzuka ke Beviokela yo Ko’

E mvutuk’a Ayuda muna mvu wa 537 vitila tandu kieto, yalungisa mpe diambu diamfunu. Muna kuma ki’awana bediatila muna “Nzil’a vauka,” muna Yesaya 35:8b tutanganga vo: “Ana befunzuka ke baviokela yo ko; kansi ikala kw’awana: minduti-a-nzila, kana mazowa, ke bevilakanwa yo ko.” Wau vo Ayuda bavutuka kuna Yerusaleme mu vutulwisa e nsambila yavelela, ke vekala fulu ko kw’akw’eloko, ana balembi yangalelanga mambu mavauka yovo ana basafuka muna mwanda. Diamfunu diakala kw’awana bavutuka muna lemvokela nsiku mia nkal’ambote mia Yave. Awana bazolele vwa edienga dia Nzambi o unu, bafwete lemvokela mpe nkanikinu wau. Bafwete kalanga ‘bavelela muna vumi wa Nzambi.’ (2 Kor. 7:⁠1) Nkia mavangu mansafu tufwete venga?

Paulu wa ntumwa wasoneka vo: “O mavangu ma nitu mayisenga, i mau mama, zumba, nsafu, yingalu.” (Ngal. 5:​19) E zumba i mpila zawonso za sadila kiyakala ye kikento yo muntu una vo ke nkaz’aku ko. Yingalu disongele vo “mambu mansoni; ngyambila.” E zumba ye yingalu ke ina ngwizani ko ye vauka kwa Yave. Muna kuma kiaki, awana bevanganga mambu mama, ke beyambulwanga ko vo bakala muna nkutakani y’Akristu, kansi bevaikiswanga mu nkutakani. Diau adimosi mpe kw’awana bekuyivananga mu mavangu mansoni, i sia vo, ana ‘bevangilanga mambu mawonso mansafu kun’ebiki.’​—⁠Ef. 4:⁠19.

O mvovo ‘usafu,’ usadilwanga mu yika fu yayingi yambi. E mvovo wa Kingerekia wasekolwa vo usafu ulenda songa safulwa muna mavangu, muna mpova yovo muna mwanda. E mvovo wau ulenda songa mpe fu yakaka yambi ina ke yivavanga ko vo muntu kafundiswa kw’akuluntu. * Awana bevanganga mavangu mama, nga bavelela bena?

Yindula vo Nkristu oyantikidi tala mavangu ma zumba kuna sweki. Malembe-malembe, e ngindu zambi ziwokela, diampasi dikala kwa yandi mu kwamanana kala wavelela vana meso ma Yave. Evangu diandi nanga ke dilwaka mu tezo kia kituka se diasafu ko, kansi muntu ndioyo oyambwidi badika ‘konso oma mavelela, konso oma men’e nsangu zambote; konso fu kiambote yovo konso lusanisinu.’ (Fili. 4:⁠8) O tala mavangu ma zumba ke diambu diavelela ko, dilenda fwasa ngwizani a muntu yo Nzambi. Mavangu mansafu ke mafwete yikwa nkutu ko vana twina.​—⁠Ef. 5:⁠3.

 Badika nona kiakaka. Nkristu una ye fu kia sakanena kiyakala yovo kikento mu sikamesa nsatu za vukana, kana vava ketalanga mavangu ma zumba yovo ve. Kanele vo e mvovo “masturbação,” i sia vo fu kia sakanena kiyakala yovo kikento ke wasonama ko mu Nkand’a Nzambi, kalukatikisu ko vo evangu diadi ngindu za muntu diyivisanga. Kele vo e fu kiaki kikwamanene, nga ke kifwasa e ngwizani a muntu ndioyo ko yo Yave yo kunkitula wasafuka vana meso ma Nzambi? Yambula twalanda luludiku lwa Paulu wa ntumwa lwa ‘kuyikiànzisa muna nsafu wawonso wa nitu yo mwanda’ yo ‘fwasa yîkwa yeto ina ya nza; zumba, nsafu, vengenene, eketo diambi, y’eloko.’​—⁠2 Kor. 7:1; Kol. 3:⁠5.

E nza yayi iyalwanga kwa Satana, iyambulwilanga yo kasakesa mavangu mansafu. O zizidila e ntonta zazi diambu diampasi kikilu. Kansi, Akristu akieleka ke bafwete ‘kangadila diak’e nkangadila bekangadilanga yau azula ko, muna mpasi ankatu a ntima miau.’ (Ef. 4:​17) Kele vo tuvenga mavangu mansafu, kana va fulu kia yeto kaka yovo vana meso ma wantu, Yave oyambula vo twakwamanana kangalela muna “Nzil’a vauka.”

“Mwamuna ke Mukala Nkosi Ko”

Muna vwa edienga dia Yave wa Nzambi avauka, divavanga vo muntu kasoba mavangu ye mpila ya vovela. Muna Yesaya 35:9 tutanganga vo: “Mwamuna [“muna Nzil’a vauka”] ke mukala nkosi ko, ngatu tomboka konso bulu yambiki.” Akwa nsoki muna mavangu ye mvovo, betezaneswanga ye bulu ya futa. Wantu awaya ke bekala ye fulu ko muna nz’ampa a Nzambi muna mukala unsongi. (Yes. 11:6; 65:​25) Ikuma vo awana bazolele vwa edienga dia Nzambi bafwete yambula e fu ya kibulu yo kala avelela.

Nkand’a Nzambi ukutulukisanga vo: “E ndudi yawonso, yo makasi, y’ekudi, ye miangu, yo kumbaziana, mbula makatulw’omu yeno, y’efwenka diawonso.” (Ef. 4:​31) Muna Kolosai 3:8 tutanganga vo: “Oyeno nutengola mpe mama mawonsono; ekudi, makasi, efwenka, lutiangu kwa Nzambi, mpov’ansoni omo nua mieno.” O mvovo “lutiangu” muna sono yayi usonganga vo, malevo, mvovo miansoni ye makumbu.

O unu kiaki, wantu bezolanga sadila malevo ye mvovo miansoni, kana nkutu muna nzo. Akazi besadilanga mvovo mia matingu, bamina, kulula zitu wa nkaz’andi yo wana. E mvovo miami ke mifwete sadilwa ko muna nzo z’Akristu.​—⁠1 Kor. 5:11.

Kala ‘Wavelela Muna Vumi wa Nzambi,’ Nsambu Ditwasanga

O sadila Yave wa Nzambi avauka, i lau diampwena kikilu. (Yos. 24:​19) Paradiso a mwanda katuvana o Yave yambote kikilu. Kalukatikisu ko vo, kala wavelela vana meso ma Yave i diambu diamfunu muna zingu kieto.

Ke kolo ko e nsilu a Nzambi wa kitula o ntoto se Paradiso ulungana. (Yes. 35:​1, 2, 5-7) Awana belakukilanga paradiso e moyo yo kwamanana sadila Nzambi, bezingila mo. (Yes. 65:​17, 21) Muna kuma kiaki, yambula twakwamanana sambila Nzambi mu mpil’avelela yo kala ye ngwizani ambote yo yandi.

[Mvovo Vana Yand’a lukaya]

[Foto ina muna lukaya lwa 26]

Adieyi diavavwanga kw’Ayuda mu kangalela muna “Nzil’a vauka?”

[Foto ina muna lukaya lwa 27]

O tala mavangu ma zumba dilenda fwasa e ngwizani ya muntu yo Yave

[Foto ina muna lukaya lwa 28]

“Miangu, yo kumbaziana, mbula makatulw’omu yeno”