Luvevoko Lufinamene Muna Kintinu kia Nzambi!
Luvevoko Lufinamene Muna Kintinu kia Nzambi!
“E kintinu kiaku kiza. O luzolo luaku luavangam’ova nza nze koko’zulu.”—MAT. 6:10.
1. Aweyi i ntu a diambu w’elongi dia Yesu?
MUNA Elongi diandi vana Mongo, Yesu Kristu wayika e sambu kisongang’o ntu a diambu w’elongi diandi diasina. Walonga alandi andi mu samba kwa Nzambi vo: “E kintinu kiaku kiza. O luzolo luaku luavangam’ova nza nze koko’zulu.” (Mat. 6:9-13) Yesu “wele akangala muna mavata, yo muna mpata-vata, wele alonginge yo samunang’e nsangu zambote za kintinu kia Nzambi.” (Luka 8:1) Kristu wavovesa alongoki andi vo: ‘Batombel’ekulu e kintinu ye ndungidi a Nzambi.’ (Mat. 6:33) Ekolo olongoka elongi diadi, yindula una olenda dio sadila muna salu kiaku kia umbangi. Kasikil’owu, badika una olenda vanina e mvutu za yuvu eyi: E nsangu za Kintinu nkia mfunu zina? O wantu luvevoko lwa nki bavwidi o mfunu? E Kintinu kia Nzambi aweyi kisinga vevolwela o wantu?
2. Ekuma nsangu za Kintinu zinina o mfunu?
2 Yesu wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” (Mat. 24:14) Nsangu zambote za Kintinu kia Nzambi i diambu disundidi o mfunu, i nsangu zilutidi o mfunu ova nza. Muna 100.000 ma nkutakani za Mbangi za Yave, tezo kia mafunda nsambwadi ma mazunda ma selo ya Nzambi bekuyivananga mu salu kia samun’e nsangu zambote yo zayisa akaka vo e Kintinu kia Nzambi kiayadikwa. E ngiadikwa Kintinu kia Nzambi nsangu zambote, kadi zisonganga vo Nzambi wasikidisa luyalu kun’ezulu olu luyala o ntoto. Muna luyalu lwa Kintinu, o luzolo lwa Nzambi luvangama ova nza nze kun’ezulu.
3, 4. Aweyi ukala zingu kia wantu vava luzolo lwa Nzambi luvangama ova ntoto?
3 Aweyi ukala zingu kia wantu vava luzolo lwa Nzambi luvangama ova ntoto? Yave ‘okunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi.’ (Lus. 21:4) Wantu ke beyela diaka ko ngatu fwa mu kuma kia usumuki bavwila. Amafwa ana bena mu nyindu a Nzambi besinga fulwa yo vwa elau dia zinga yakwele mvu. Nkand’a Nzambi usianga nsilu vo vekala yo “lufuluku lu’asongi y’ana balembi songa.” (Mav. 24:15) Ke vekala diaka vita ko, mayela yovo nzala, o ntoto ukituka se paradiso. Kana nkutu bulu ina vo o unu yansisi, ikala yo luvuvamu vana vena wantu ye yau ye yau.—Nku. 46:9; 72:16; Yes. 11:6-9; 33:24; Luka 23:43.
4 Muna kuma kia nsambu zitwasa luyalu lwa Kintinu, ka di’esivi ko vo ungunza wa Nkand’a Nzambi uyikanga una ukala e zingu kia wantu muna ntangwa yayina mu mvovo emi: “Alembami bevwa nza; beyangalela muna mawete mayingi.” Kansi adieyi dibwila yimpumbulu? Nkand’a Nzambi uvovanga vo: “Finkolo-kolo kaka, e kimpumbulu, ladi.” Kansi, “awana betadila Yave, bevwa nsi.”—Nku. 37:9-11.
5. Adieyi dibwila nza yayi?
5 Mawonso mama muna vangama, e nza yayi kumosi ye tuyalu, nsambila ye yinkita ya tandu kiaki ifwete teka fwaswa. O luyalu lw’ezulu i diau kikilu luvanga. Daniele wa ngunza wavumunwinwa mu vova vo: “Muna lumbu y’atinu awana [beyalanga owau], o Nzambi ezulu otongeka kintinu [kun’ezulu], kina ke kibangalakeswa ko yakwele mvu, ngatu vingilwa untinu wandi kwa nkangu akaka; kansi kikosomona yo sukisa yintinu yayi yawonso, kitongama mpe yakwele mvu.” (Dan. 2:44) Kintinu kia Nzambi, i sia vo, luyalu lwampa lw’ezulu, luyala wantu bezingil’ova ntoto. Vekala ye ‘zulu diampa ye nz’ampa, ina ikalwa kwa ndungidi.’—2 Pet. 3:13.
Luvevoko Kikilu Tuvwidi o Mfunu o Wau
6. O Nkand’a Nzambi aweyi uyikilanga o bi uvangamanga mu nza?
6 Vava Satana, Adami yo Eva bakolamena Nzambi, muna vava kuyizayila edi diambote y’edi diambi, bakotesa wantu mu mpasi. Vioka mvu 1.600 vitila kizalu, “o bi wa muntu se wingi ova nza, ye konso mona-mona kia ngindu za ntima kibi kaka, e lumbu yawonso.” (Etu. 6:5) Muna 1.300 za mvu mialanda, Solomo wamona o yiva kwa fu ya wantu yo soneka vo: “Ndutidi o sanisina mafwa ana bafwa kala ke mu wantu bena una ko: o wete wa ndiona kawutukidi ko usuvidi owu wa yau awole, ona kasidi mona mambu mavangama kunsi a ntangwa ko.” (Kim. 4:2, 3) Tezo kia 3.000 ma mvu maviokele kala yamu lumbu yeto, o bi wokela kaka uwokelanga.
7. Ekuma tuvwididi luvevoko lwa Nzambi o mfunu o wau?
7 Kana una vo o bi kolo wayantika, o wau luvevoko tuvwidi o mfunu muna Kintinu kia Nzambi ke mu tandu yakaka ko. O yiva kwa fu ya wantu muna 100 mvu miviokele mu wokela kaka kwina ke mu tandu yankulu ko. Kasikil’owu, mwangi mosi a nsangu wa Instituto Worldwatch wavova vo: “E vita za nwanwa mu tandu kia 20 zisundidi e vita zawonso zanwanwa tuka muna tandu kiantete yamuna mvu wa 1899.” Tuka mvu wa 1914, vioka 100 za mafunda ma wantu bafwa muna vita zazi. Encyclopedia mosi yivovanga vo tezo kia 60 ma mazunda ye mazunda ma wantu bafwa muna Vit’Anzole ya Nz’amvimba. Wau vo e nsi zakaka zina ye nkele mia ngolo, balenda vonda ulolo wa wantu mu nza. Kanele vo e ngangu za nza mu nungunuka kaka zina, konso mvu tezo kia mafunda tanu ma mazunda ma yingyana-ngyana yifwanga mu kuma kia nzala ye mayela.—Tala muna Nkand’a Nzambi Adieyi Kieleka Kelonganga? kapu kia 9.
8. Nkia ziku mesonganga mazunda ma mvu ma luyalu lwa wantu?
8 Wantu ke belendanga sukisa e mbi ko. Nkubika za tuyalu, za yinkita ye mabundu ma nza yayi ke zilendanga lungisa nsatu za wantu ko, za kala mu luvuvamu, sukisa usukami yo twasa mavimpi. Vana fulu kia singika e mambu metokanesanga o nkangu, e nkubika zazi ziwokesang’e mpasi zau. Kieleka, mazunda ma mvu ma tuyalu twa wantu mesonganga e ziku kia mvovo emi vo: “E nzil’a muntu ke ina muna yandi ko: ngatu singikila ntambi zandi o munduti-a-nzila.” (Yer. 10:23) Elo, ‘o muntu o kala ye wisa muna nkw’andi kamwesa mpasi.’ (Kim. 8:9) Vana ntandu, “o nsema wawonso ubuminanga yo kala yo nsongo kumosi.”—Roma 8:22.
9. Akristu nkia mambu bazeye mevangama mu ‘lumbu yayi yambaninu’?
9 Nkand’a Nzambi wazayisa mu kuma kia lumbu yeto vo: ‘Muna lumbu yambaninu mukwiza ntangwa zampasi.’ Vava ungunza wayika e fu ya lumbu yambaninu muna luyalu lwa wantu, wayika mpe vo: ‘Wantu ambi, y’akwa luvunu, benungunukin’o bi.’ (Tanga 2 Timoteo 3:1-5, 13.) Akristu bazeye wo vo e mambu mama mevangama kadi, ‘e nza yawonso mu wisa kia ndiona wambi ilele’ i sia vo, Satana. (1 Yoa. 5:19) Kansi, e nsangu zambote i zazi vo ke kolo ko o Nzambi okôla awana bekunzolanga. Tuvuluzwa mu nza yayi, i nungunukanga muna mbi.
Yave Kaka i Nto a Luvevoko Lwakieleka
10. Ekuma vo Yave kaka i Nto a luvevoko lwakieleka?
10 Vava o samunang’e nsangu zambote, zayisanga kwa wantu vo Yave kaka i nto a luvevoko lwakieleka. Yandi kaka una yo nkuma ye luzolo lwa kôla selo yandi muna mpasi. (Mav. 4:24, 31; Lus. 4:11) Tulenda kala ye ziku vo Yave osinga vuluza nkangu andi yo lungisa luzolo lwandi, luna kadila ndofi vo: “Kieleka una mbadikidi, i una ukala.” E diambu diandi ‘ke dikumvutukila nkatu ko.’—Tanga Yesaya 14:24, 25; 55:10, 11.
11, 12. Nkia nsilu kesianga Nzambi kwa selo yandi?
11 Yave osianga nsilu wa vuluza selo yandi vava kefwasa e nza yayi yambi. Vava katuma Yeremiya wa ngunza mu vova kuna unkabu wawonso y’asumuki, Nzambi wavova vo: “Kubamwena wonga ko.” Ekuma? “Kadi ngina yaku yakôla.” (Yer. 1:8) Diau adimosi mpe, una Yave kafwasidi Sodomo ye Ngomora ko, watwika mbasi zole mu vuluza Loti y’esi nzo andi muna kubavayikisa muna mbanza yayi. “I bosi o Yave onokese elengo yo tiya muna Sodomo ye Ngomora.”—Etu. 19:15, 24, 25.
12 Yave olenda vuluza ana bevanganga luzolo lwandi mu nza yawonso. Vava kafwasa e nza yambi muna Kizalu, ‘wavuluza kaka Noa, wa nteleki a ndungidi, yo wantu nsambwadi akaka.’ (2 Pet. 2:5) O Yave ovuluza mpe asongi vava kefwasa e nza yayi yambi. Ekiaki i kuma e Diambu Diandi diwondelelanga vo: “Nuvava Yave, e yeno alembami awonso a nza . . . Vava unsongi, vav’o lembama: kasikila nuswekama muna lumbu kia makasi ma Yave.” (Sef. 2:3) Vava kifwaswa e nza yayi yambi, ‘asongi bekal’omu nsi, kansi yimpumbulu ikendonwa.’—Nga. 2:21, 22.
13. E selo ya Yave ana befwanga aweyi besinga vuluzilwa?
13 Kansi, vena ye ulolo wa selo ya Nzambi befwanga mu kuma kia mayela, lubangamu ye mpasi zakaka. (Mat. 24:9) Aweyi besinga vuluzilwa? Nze una uyikilu kala, vekala yo “lufuluku lu’asongi.” (Mav. 24:15) Dia lufiaulwisu dia zaya vo kevena má ko kilenda kakila Yave mu vuluza selo yandi.
Luyalu Lwansongi
14. Ekuma tunina ye ziku vo Kintinu kia Nzambi luyalu lwansongi?
14 Muna salu kiaku kia umbangi, olenda zayisa kwa wantu vo e Kintinu ki’ezulu kia Yave i luyalu lwansongi. Luyalu lwalu lwansongi, kadi lusonganga e fu ya Nzambi nze unsongi, ziku yo zola. (Nsi. 32:4; 1 Yoa. 4:8) Nzambi wavana Kintinu kwa Yesu Kristu, ona wafwana mu yala e nza. Yave wasikidisa mpe vo 144.000 ma Akristu akuswa basolwa ova ntoto yo fulwa mu vwila moyo kun’ezulu mu yala e nza kumosi yo Kristu.—Lus. 14:1-5.
15. Yika e nswaswani ya luyalu lwa Kintinu kia Nzambi ye luyalu lwa wantu.
15 Ekwe nswaswani ikala vana vena luyalu lwa Yesu ye 144.000 ye luyalu lwa wantu asumuka! O tuyalu twa nza yayi, tubangikanga ana beyalanga yo kubafila muna vita ezi zivondanga ulolo wa wantu. Ka di’esivi ko vo Nkand’a Nzambi ukutulukisanga twalembi bund’e vuvu kwa mwan’a muntu, muna “ke mwina luvuluzu ko.” (Nku. 146:3) O luyalu lwa Kristu mambu mambote luvanga. Yesu wavova vo: “Nwiz’oku ngina, yeno awonso nufuntukanga yo bimuka yo mazitu, ikunuvundisa. Nuvwata vangu kiame, nwalongwa kwa mono; kadi i nlembami yo ntim’anleka: nwasolola vundu kia mioyo mieno. Kadi vangu kiame kiambote, enatu diame diampevo.”—Mat. 11:28-30.
Ke Kolo ko e Lumbu Yambaninu se Yifokoka
16. E lumbu yambaninu aweyi yifokokela?
16 Tuka muna mvu a 1914, e nza yayi yakota mu lumbu yambaninu yovo “mbaninu a tandu.” (Mat. 24:3) Ke kolo ko, e ‘mpasi zayingi’ zina kayika o Yesu se ziyantika. (Tanga Matai 24:21.) E mpasi zazi zitwasa mfoko a nza yayi ya Satana. Kansi aweyi ziyantikila e mpasi zayingi? Aweyi zifokokela?
17. Nkand’a Nzambi nkia mambu keyikanga mebwa vava mpasi zayingi ziyantika?
17 E mpasi zayingi kukinsalukisa ziyantikila. Elo, ‘lumbu kia Yave’ kuna kinsalukisa kisinga kwizila, “una se bevovanga vo, ngemba yo luvuvamu.” (Tanga 1 Tesalonika 5:2, 3.) E mpasi zayingi ziyantika vava e zula yiyindula vo se belenda singika e maka mambu mau ma mpasi. E “Babele Anene,” ina vo kintwadi kia nsambila zawonso za luvunu ova nza, yifwaswa kuna kinsalukisa yo sivikisa wantu. Atinu ye akaka mpe besivika vava kifwaswa Babele Anene.—Lus. 17:1-6, 18; 18:9, 10, 15, 16, 19.
18. O Yave aweyi kevanga vava Satana kebangika nkangu Andi?
18 Velwak’e ntangwa yimoneka e “sinsu muna ntangwa, ye ngonde, ye ntetembwa” ye “sinsu kia Mwan’a muntu kun’ezulu.” Muna kolo kiaki, tulenda ‘vumbula ntu, kadi nkûk’eto ifinamene.’ (Luka 21:25-28; Mat. 24:29, 30) Satana yovo Ngonge ovilukila nkangu a Nzambi. Kansi mu kuma kia awana bebangika e selo yandi yakwikizi, Yave wavova vo: “On’okunuviakana, oviakene ngengele ame a disu.” (Zak. 2:8) Ikuma vo, mawonso kevanga Satana muna kubafwasa ke mesikila ko. Ekuma? E kuma kadi Mfumu Yave o vanga diambu vana vau mu vuluza selo yandi.—Yez. 38:9, 18.
19. Ekuma tulenda kadila ye vuvu vo e vu kia Nzambi kifwasa nza ya Satana?
19 Vava Nzambi kefundisa e zula, ‘bezaya wo vo yandi i Yave.’ (Yez. 36:23) O tuma vu kiandi, i sia vo yazi ya mazunda ya vangwa ya mianda yifilwanga kwa Yesu Kristu, mu fwasa e nsadiswa a nza ya Satana. (Lus. 19:11-19) Avo tusungamene vo mbasi mosi ‘wavonda elundu ye yazi nana yo mazunda matanu’ ma mbeni za Nzambi muna fuku umosi, tulenda kala ye ziku vo ke dikala diampasi ko kwa vu ki’ezulu mu fwasa e nza ya Satana vava e mpasi zayingi zifokoka muna Armangedo. (2 Nti. 19:35; Lus. 16:14, 16) Satana ye nkwiya miandi besiwa muna mbilu yavana kilung’ezunda dia mvu. I bosi befwaswa.—Lus. 20:1-3.
20. Adieyi kelungisa Yave muna Kintinu?
20 O ntoto uveleleswa muna mbi, o wantu ansongi bezinga yakwele mvu ova ntoto. O Yave osonga vo yandi i Mvuluzi Anene. (Nku. 145:20) Muna Kintinu, otundidika umfumu wandi, velelesa nkumbu andi avauka yo lungisa ekani diandi mu kuma kia ntoto. Olenda vwa kiese kiayingi muna salu kiaku kia umbangi vava osamunang’e nsangu zazi zambote yo sadisa ana ‘basidi o moyo a mvu ya mvu etima’ mu zaya vo luvevoko muna Kintinu kia Nzambi lufinamene!—Mav. 13:48.
Nga Osungamenanga?
• Yesu aweyi kasongela mfunu a Kintinu?
• Ekuma tuvwididi o mfunu a luvevoko o wau ke mu tandu yakaka ko?
• Nkia mambu tulenda vingila muna kolo kia mpasi zayingi?
• O Yave aweyi kesongelanga vo yandi i Mvuluzi Anene?
[Yuvu ya Longoka]
[Mafoto zina muna lukaya lwa 12, 13]
Diambu dia Nzambi diasakula e salu kia umbangi kisalwanga mu nza yawonso mu tandu kieto
[Foto ina muna lukaya lwa 15]
Yave olenda kutuvuluza nze una kavuluzila Noa y’esi nzo andi
[Foto ina muna lukaya lwa 16]
Yave ‘okunguna mansanga mawonso . . . , o lufwa, ke lukala diaka ko.’—Lus. 21:4