Sola Sadila Yave Ekolo una Nleke
Sola Sadila Yave Ekolo una Nleke
“Kala kaka muna mana walongwa yo kwikidiswa.”—2 TIM. 3:14.
1. O Yave aweyi kebadikilanga e salu kia Mbangi zandi z’aleke?
YAVE oyangalelanga e salu kiavauka kisalanga aleke, mu kuma kiaki wavumunwina ungunza mu kuma kiau. Ntozi a nkunga wayimbila vo: “Muna lumbu kia nkum’aku, o nkangu aku ukuvanina kuna mvevo: Mun’evienga dia vauka, muna mvungia-mvungia, e kime kia uleke waku wina kiau.” (Nku. 110:3) Elo, Yave obadikilanga aleke ana bezolanga kunsadila vo antalu.
2. O unu nkia diambu belombwanga aleke bafwete vanga muna zingu kiau?
2 Yeno aleke luna muna nkutakani y’Akristu, nga nwayiyekola kwa Yave? Dilenda kala diampasi kw’aleke ayingi mu baka e nzengo za sadila Nzambi aludi. Akiti, alongi, ezak’e ntangwa yitu ye akundi balutidi fila aleke mu si’etima muna mavwa. Vava aleke besiang’etima muna mambu ma mwanda, e nza veza yikubavezanga. Kansi, e ludi kia diambu i kiaki, osadila Nzambi aludi i diambu diambote olenda vanga muna zingu. (Nku. 27:4) Muna kuma kiaki, fimpa yuvu tatu eyi: Ekuma ofwete sadila Nzambi? Aweyi olenda sikidila muna salu kiaku kwa Nzambi kana nkutu nkia diambu balenda vova akaka yovo vanga? Nki’elau dia salu kiavauka olenda vwa?
Sadila Yave i Diambu Disundidi o Mfunu mu Vanga
3. O nsem’a Yave adieyi ufwete kutufila mu vanga?
3 Ekuma ofwete sadila Nzambi amoyo ye aludi? Lusengomono 4:11 usonganga e kuma: “Ofweno, e Yave, wa Nzambi eto, o tambula nkembo, yo zitu, ye ngolo: e kuma kadi, i nge wasemena lekwa yawonso, muna luzolo luaku mpe i inina, yo semwa.” Yave i Nsemi a lekwa yawonso. O ntoto wazala ye lekwa yayingi yambote. Nti, mvuma, bulu, mbu, miongo ye makululuka ma maza, yawonso yayi Yave wavanga yo. Muna Nkunga 104:24 tutanganga vo: ‘E nza yazala yo vwa kwa Nzambi.’ Tufwene vutulanga kikilu matondo mu mona vo Yave watuvana nitu ye ngindu zilenda kutusadisa mu yangalela o ntoto ye lekwa yambote ina mo. Luyangalalu lweto muna nsema lufwana kutufila mu kunsadila.
4, 5. Nkia mavangu ma Nzambi mafinamesa Yosua kwa Yave?
4 Ekuma kiakaka kifwete kutufila mu sadila Yave kina muna mvovo mia Yosua wa mfidi a Aneyisaele. Vava kiafinama lufwa lwandi, Yosua wavovesa nkangu a Nzambi vo: “Nuzeye wo muna nsi zeno zawonso za ntima yo muna fulumwinu yeno yawonso, vo ke vakulukidi diambu ko muna mawonso mambote kavova Yave wa Nzambi muna diambu dieno; mawonso malunganini oko nwina.” Ekuma Yosua kavovela mvovo miami?—Yos. 23:14.
5 Wau vo Yosua mu Engipito kasansukila, wazaya nsilu kavan’o Yave kwa Aneyisaele wa kubavana e nsi akivwila. (Etu. 12:7; 50:24, 25; Luv. 3:8) Yosua wamona una Yave kalungisila nsilu wau muna twasa Vuku Kumi muna Engipito yo fila Faro wa nkwa lulendo mu yambula Aneyisaele. Yosua wakala y’awana bavuluzwa muna Mbu Ambwaki yo mona vava Faro ye makesa mandi bakukula muna mbu. Ekolo bakalanga muna “makanga mampwena yo umbubu” ma Sinai, Yosua wamona una Yave kalungisila nsatu za Aneyisaele. Ke vakala mosi ko muna yau wafwa ye vwina yovo nzala. (Nsi. 8:3-5, 14-16; Yos. 24:5-7) Vava kiafwana e ntangwa kwa Aneyisaele mu nwana ye zula ya ngolo ya esi Kenani yo vwa Nsi a Nsilu, Yosua ye akaka bamona una Nzambi ona basambilanga, kabasadisila mu vwa e nsi yayi.—Yos. 10:14, 42.
6. Adieyi dilenda kusadisa mu kala y’etima dia sadila Nzambi?
6 Yosua wazaya vo Yave olungisa nsilu miandi. Muna kuma kiaki, Yosua wavova vo: “Vo i mono y’esi nzo ame, Yave tusadila.” (Yos. 24:15) Aweyi tuvova mu kuma kiaku? Vava obadikanga e nsilu mia Nzambi aludi mialungana kala ye mina kelungisa kuna sentu, nga ke dikufilanga ko mu kunsadila nze una kavanga Yosua?
7. O vubwa muna maza nkia kuma dinina diambu diamfunu?
7 O tala e lekwa kavanga o Yave yo badika e nsilu miandi, ke difwete kufila kaka mu kuyiyekola kwa Yave ko, kansi yo vubwa mpe muna maza. Vubwa i diambu diamfunu bafwete vanga awonso bazolele sadila Nzambi. I diau kavanga o Yesu wa Mbandu eto. Una kayantikidi ko e salu kiandi nze Masia, wayenda kwa Yoane wa Mvubi mu vubwa. Ekuma Yesu kabakila nzengo za vubwa? Wavova vo: “Nkulumukini kun’ezulu, ke mu vang’oluame luzolo ko, o luzolo lua ndiona wantuma kaka.” (Yoa. 6:38) O Yesu wavubwa mu songa vo wayivana mu lungisa luzolo lwa S’andi.—Mat. 3:13-17.
8. Ekuma Timoteo kabakila nzengo za sadila Nzambi? Ongeye mpe adieyi ofwete vanga?
8 Badika mpe e nona kia Timoteo wa nleke Ankristu ona Yave kavana e salu ye malau mayingi. Ekuma Timoteo kabakila nzengo za sadila Nzambi aludi? Nkand’a Nzambi ukutuvovesanga vo “walongwa yo kwikidiswa.” (2 Tim. 3:14) Kele vo Diambu dia Nzambi olongokanga yo kwikila vo e malongi mama maludi, zaya wo vo ofwanane yo Timoteo. Owau ofwete baka e nzengo. Ekuma olembi mokena ye mase maku mu kuma kia din’ozolele vanga? Mase maku ye akuluntu muna nkutakani, balenda kusadisa mu bakula dina divovanga Nkand’a Nzambi mu kuma kia luvubu.—Tanga Mavangu 8:12.
9. Aweyi akaka balenda badikila luzolo lwaku lwa vubwa?
9 Avo wavubwa kala, lwalu i lubantiku lwambote muna sadila Nzambi aludi. Wau vo ovubilu, oyantikidi kangalela muna nzila ifilanga kuna moyo a mvu ya mvu yo vwa e kiese kitukanga muna vanga luzolo lwa Nzambi. (Ayib. 12:2, 3) Oyangidika mpe e yitu yaku ana bekangalelanga mu nzil’a moyo ye akundi aku muna nkutakani y’Akristu. Edi disundidi o mfunu, oyangidika o ntim’a Yave. (Tanga Ngana 23:15.) Kieleka, akaka nanga ke bebakula ko ekuma obakidi nzengo za sadila Yave yo katikisa ekani diaku. Balenda nkutu kusi’e kitantu. Kansi olenda sunda ntonta zazi.
Vava Akaka Bekuyuvulanga Yovo Kusi’e Kitantu
10, 11. (a) Wantu nkia yuvu balenda kuyuvula mu kuma kia luzolo lwaku lwa sadila Nzambi? (b) Adieyi olenda longoka muna mpila ina Yesu kavaninang’e mvutu mu kuma kia nsambil’aludi?
10 Ekani diaku dia sadila Yave dilenda tokanesa akundi aku a sikola ye mfinangani ye yitu yaku. Balenda kuyuvula ekuma obakidi e nzengo zazi yo vava zaya oma ma lukwikilu lwaku. Aweyi olenda kubavanina e mvutu? Diambote wabadika ekani diaku yo toma songa ekuma wabakil’e nzengo zazi. Muna kubavana e mvutu mu kuma kia lukwikilu lwaku, diambote walanda mbandu a Yesu.
11 Vava afidi a dibundu di’Ayuda bayuvula Yesu mu kuma kia lufuluku, wayika e sono kina ke bayindulanga ko. (Luv. 3:6; Mat. 22:23, 31-33) Vava nsoneki mosi kanyuvula o nkanikinu usundidi onene, Yesu wayika e sono yasikididi ya Nkand’a Nzambi. O muntu ndioyo wayangalela e mvutu za Yesu. (Fuka 19:18; Nsi. 6:5; Maku 12:28-34) E mpila Yesu kasadila e sono ye mpila kalongelanga ‘yavambanisa andonga’ ye atantu andi ke balenda kunkanga ko. (Yoa. 7:32-46) Vava ovananga e mvutu mu kuma kia lukwikilu lwaku, sadila Nkand’a Nzambi yo vutulwila “kuna lembama, yo vumi.” (1 Pet. 3:15) Kele vo kuzeye mvutu ko, tambulwila dio yo vova kwa muntu vo ofimpa e diambu diadi. I bosi, fimpa e diambu diadi muna Índice das Publicações da Torre de Vigia yovo muna Watchtower Library em CD-ROM kele vo ina muna ndinga in’ozeye. Muna toma kubamanga, ‘ozay’e mputula ofwete vutula konso muntu.’—Kol. 4:6.
12. Ekuma kufwete yambulwila ko vo e ntonta zayoyesa?
12 Olenda yuvulwa yuvu yayingi mu kuma ki’ekani diaku dia sadila Nzambi ye kuma kia lukwikilu lwaku. Ediadi divangamanga kadi e nza yayi yiyalwanga kwa Nkadi Ampemba wa Satana, wa ntantu a Nzambi. (Tanga 1 Yoane 5:19.) Kuvingila ko vo wantu awonso batambulwila, kadi kitantu kala kaka kikala. Akaka balenda ‘kutianguna’ yo kwamanana wo vanga. (1 Pet. 4:4) Kansi sungamena vo kuna ngeye mosi ko. Yesu Kristu mpe wabangikwa. Petelo wa ntumwa mpe wabangikwa yo soneka vo: “Azolwa, ke nubanzi ko vo dianzenza, edi dia ntont’a tiya izidi kunutonta, ovo diambu dianzenza dinubwididi: kansi kadi, muna tezo kia nkala nukal’e ntwadi muna mpasi za Kristu nuyangalala.”—1 Pet. 4:12, 13.
13. Ekuma Akristu bafwete mwena e kiese vava betontwanga?
13 Dia kiese vava Nkristu kezizidilanga lubangamu yovo kitantu. Ekuma? E kuma kadi, kele vo otondelo kwa wantu awonso, ediadi disonga vo luzolo lwa Satana ovanganga, ke lwa Nzambi ko. Yesu wavova vo: “Tâtu kwa yeno, ovo nusaniswa kwa wantu awonso! kadi mpanga mosi bavang’amase mau kuna kwa ngunza zaluvunu.” (Luka 6:26) O lubangamu lusonga vo Satana ye nz’andi makasi bekumwenanga wau vo Yave osadilanga. (Tanga Matai 5:11, 12.) O “sembelwa muna nkumbu a Kristu,” i diambu ofwete mwena e kiese.—1 Pet. 4:14.
14. Nkia nluta kalenda tambula o muntu vava kesikilanga ye kwikizi muna Yave nana vo lubangamu?
14 Vava osikilanga ye kwikizi muna Yave nana vo lubangamu, vena ye nluta nyá olenda tambula. Osila Nzambi ye Mwan’andi umbangi. E kwikizi kiaku kikasakesa ampangi zaku z’Akristu. Dilenda fila awana ke bazeye Yave ko mu vava kunzaya. (Tanga Filipi 1:12-14.) O zola kwaku muna Yave kuwokela, ekolo omonanga una kekuvaninanga nkuma mu zizidila ntonta.
“Mwelo Ampwena” Uziukìdi
15. Nkia “mwelo ampwena” waziukila Paulu wa ntumwa?
15 Muna kuma kia salu kiandi kia umbangi kuna Efeso, Paulu wa ntumwa wasoneka vo: “O mwelo ampwena, wamfunu, unziukìdi.” (1 Kor. 16:8, 9) O mwelo wanziukila, i salu kiayingi kia samun’e nsangu zambote muna mbanza yayina yo kitula wantu se alongoki. Muna tambulwila elau diadi, Paulu wasadisa wantu ayingi mu zaya Yave yo kunsambila.
16. E nsâdisw’a kuswa aweyi yakotela muna “mwelo aziuka” muna mvu a 1919?
16 Muna mvu a 1919, o Yesu Kristu wasila nsâdisw’a kuswa “mwelo aziuka.” (Lus. 3:8) Bakota muna mwelo wau yo yantika samun’e nsangu zambote yo longa e ludi kia Nkand’a Nzambi y’etima diawonso lutila tandu yavioka. E salu kiau kia umbangi nkia nluta kiatwasa? Owau e nsangu zambote zilweke yakuna nsuk’a nza ye tezo kia mazunda nsambwadi ma mazunda ma wantu bena ye vuvu kia vwila moyo a mvu ya mvu muna nz’ampa ya Nzambi.
17. Aweyi olenda kotela muna “mwelo ampwena, wamfunu”?
17 “O mwelo ampwena, wamfunu,” wakinu waziuka kwa selo yawonso ya Yave. Awana bekotanga mo bemonanga kiese ekolo bekuyivananga mu samun’e nsangu zambote. Yeno aleke nusadilanga Yave, nga nuyangalelanga elau dia sadisa akaka mu “kwikila muna nsangu zambote”? (Maku 1:14, 15) Nga oyindulanga sala se mviti a nzila a ngonde ke ngonde yovo mviti a nzila a nsadisi? E salu kia tunga Maseka ma Kintinu, sadila kuna Betele, sala se misionario i malau makaka malenda kunuziukila. Wau vo lufwasu lwa nza ya Satana lufinamene, o kuyivana muna salu yayi ya Kintinu i diambu dia mfunu kikilu. Nga olenda kota muna “mwelo ampwena” ekolo e ntangwa yakinu?
“Numika, Nwatala wo vo Yave Wambote”
18, 19. (a) Nki kiasadisa Davidi mu kala y’etima dia sadila Yave? (b) Adieyi disonganga vo Davidi kasidi kuyibanza nkutu ko muna sadila Nzambi?
18 O ntozi a nkunga wawondelela akaka vo ‘bamika, batala vo Yave wambote.’ (Nku. 34:8) Vava Davidi wa Ntinu a Isaele yankulu kakala mvungudi a mameme, Yave wamvuluza vana moko ma bulu ya futa. Nzambi wansadisa vava kanwana ye Ngoleyate yo kumvuluza muna mpasi zakaka. (1 Sam. 17:32-51; Nku. 18, mvovo mina vana ntandu) Muna kuma kia walakazi wa Nzambi, Davidi wasoneka vo: “Owokesa mo, ongeye Yave wa Nzambi ame, o masivi maku ye ngindu zaku oku twina, o tetomona zo oko wina, ke kulendakana ko.”—Nku. 40:5.
19 O zola kwa Davidi muna Yave kwawokela yo zola kunkembela muna ntima ye muna nyindu andi wawonso. (Tanga Nkunga 40:8-10.) Vava e mvu miaviokanga, Davidi kasidi kuyibanza nkutu ko muna sadila zingu kiandi muna salu kia Nzambi aludi. Kuna kwa yandi, o zingila e ngwizani ye nsiku mia Nzambi i diambu dialuta o mfunu, dialuta kumvana e kiese. Muna kinunu kiandi Davidi wavova vo: “Ngeye u vuvu kiame, e Mfumu Yave, nge u vuvu kiame tuka kuna kileke. Kanele muna ununu wa mvu, e Nzambi, kungyambula ko.” (Nku. 71:5, 18) E kikundi kia Davidi yo Yave ye vuvu kiandi muna Yandi kiasikilanga, kana nkutu vava kanuna.
20. O sadila Nzambi nkia kuma dinina vo i diambu disundidi o mfunu olenda vanga muna zingu kiaku?
20 E zingu kia Yosua, Davidi yo Timoteo kisonganga e ziku vo sadila Yave i diambu disundidi o mfunu olenda vanga muna zingu kiaku. E mavwa ma kolo kiakete olenda vwa mu nza yayi, ke malendi tezaneswa ko ye nsambu zitukanga muna ‘sadila Yave yamuna nsi aku a ntima wawonso, yo muna fulumwinu kiaku kiawonso.’ (Yos. 22:5) Kele vo yamu wau kwayiyekwele ko kwa Yave muna sambu, ukiyuvula: ‘Nki kikunsimbanga mu kituka se Mbangi a Yave?’ Avo u selo kia Yave una vo wavubwa, nga ozolele wokesa e kiese kiaku muna zingu? Avo iwau, wokesa e salu kiaku yo nungunuka muna mwanda. Elongi dilanda disonga una olenda nungunukina muna mwanda muna landa e mbandu a Paulu wa ntumwa.
Nkia Mvutu Ovana?
• Yika kuma yole ifwete kutufila mu sadila Nzambi.
• Nki kiasadisa Timoteo mu baka e nzengo za sadila Nzambi?
• Ekuma ofwete zizidila lubangamu?
• Nkia malau ma salu maziukidi?
[Yuvu ya Longoka]
[Foto ina muna lukaya lwa 18]
Sadila Yave i diambu disundidi o mfunu muna zingu
[Foto ina muna lukaya lwa 19]
Nga olenda vana e mvutu mu kuma kia lukwikilu lwaku?