Lemvokela e Wisa kia Yave
Lemvokela e Wisa kia Yave
“I yau yiyi e nzol’a Nzambi, tulunda nkanikinu miandi: e nkanikinu miandi ke miampasi ko.”—1 YOA. 5:3.
1, 2. (a) Ekuma wantu ayingi ke bezolelanga kala kunsi a wisa kia muntu akaka ko? (b) Nga wantu awaya avevoki kikilu bena? Sasila.
O UNU, ndonga ke bezolanga kala kunsi a “wisa” kia muntu akaka ko. O wantu awaya bevovanga vo: “Ke vena muntu ko ofwete kumpovesa dina mfwete vanga.” Nga i kieleka vo wantu awaya ke bena kikilu mu wisa kia muntu ko? Ve. Ndonga mu yau belandanga awana ‘bekuyisiang’e fwani-fwani ye tandu kiaki.’ (Roma 12:2) Nze una kavova Petelo wa ntumwa, vana fulu kia kala avevoki, bekitukanga se “ntaudi za uwolezia.” (2 Pet. 2:19) Bekangalelanga “mun’owu wa tandu kia nza yayi, mun’owu wa nkuluntu a ungwizi wa mwela,” Nkadi Ampemba wa Satana.—Ef. 2:2.
2 Nsoneki mosi wayisana vo: “Kiyambulanga ko vo mase mame, nganga yovo mfumu za mabundu yovo malongi ma Nkand’a Nzambi manzayisa dina mfwete badikila vo diambote.” Dialudi vo, akaka balenda sadila wisa kiau mu mpila yambi, wantu awaya ke bafwanukini lemvo weto ko. Kansi, nga diangangu dia lembi lemvokela konso lulukisu tuveno? Avo tangidi muna zulunalu, omona vo ke diangangu ko. Diankenda kikilu vo, omu tandu kiaki kina vo wantu luludiku bavwidi o mfunu, ndonga ke belemvokelanga lo ko.
Una Tufwete Badikilanga e Wisa
3. Akristu a tandu kiantete aweyi basongela vo ke bavanganga konso dina bavoveso ko kw’akwa wisa?
3 Nze Akristu, e mpila tubadikilanga e wisa yaswaswana y’eyi ya wantu a nza. Ediadi ke disonganga ko vo tuvanganga konso dina tuvoveso. Kansi, vena ye ntangwa ka tulemvokelanga luzolo lw’akaka ko, kana nkutu lw’awana bena ye wisa. I diau mpe bavanga Akristu a tandu kiantete. Kasikil’owu, vava antumwa bakanikinwa vo ke basamuni diaka nsangu zambote ko, ke balemvokela ko dina bavoveswa kwa ngang’ambuta ye akaka ana bakala ye wisa vana Mbazi a Nkanu. Ke bayambula fu yau yambote ko mu vanga dina bakanikinwa kw’akwa wisa.—Tanga Mavangu 5:27-29.
4. Nkia nona ina muna Sono ya Kiyibere isonganga vo ayingi muna nkangu a Nzambi babaka nzengo zaswaswana ye z’akaka?
4 Selo yayingi ya Nzambi kuna nz’ankulu bakala ye fu kiaki kia unkabu. Kasikil’owu, Mose ‘kazola yikilwa ko vo mwan’a mwan’ankento a Faro; wasol’o vangw’e mpasi kumosi yo nkangu a Nzambi,’ kanele vo diamwesa ‘ntinu makasi.’ (Ayib. 11:24, 25, 27) O Yosefe wazizidila e ntonta za nkaza Potifa, ona wavavanga leka yandi, kanele vo wazaya wo vo olenda kumwesa e mpasi. (Etu. 39:7-9) Daniele ‘wabak’e nzengo za lembi kuyisafula mu yuma ya ntinu,’ kanele vo diampasi diakala kwa nkuluntu a mbandabanda a Babele mu tambulwila e nzengo zandi. (Dan. 1:8-14) E nona yayi isonganga vo nkangu a Nzambi ukalanga yo unkabu wasikila mu vanga edi diambote, kana una vo dilenda kubatwasila mpasi. Ke bavanga luzolo lwa wantu ko kimana bazolwa kwa yau; yeto mpe ka tufwete wo vanga ko.
5. E mpila tubadikilanga e wisa aweyi iswaswanene ye ya wantu a nza?
5 O luzolo lweto lwalembi vanga maka mambu tulombwanga kalufwete badikilwa ko nze fu kia lulendo ngatu badikilwa nze awana bekolamenanga ayadi. Kansi, tuzolanga lemvokela wisa kia Yave ke mu wisa kia wantu ko. Vava e nsiku mia wantu mikululanga nsiku mia Nzambi, ke dikalanga diampasi ko mu zaya dina tufwete vanga. Nze antumwa muna tandu kiantete, tulemvokela Nzambi nze nyadi ke mu wantu ko.
6. O lemvokela e nkanikinu mia Yave ekuma dikadilang’aka diambote?
6 Nki kikutusadisanga mu lemvokela e wisa kia Nzambi? Tulandanga dina diasonama muna Ngana 3:5, 6 vo: “Bunda Yave e vuvu yo ntim’aku wawonso, kuyekamena waku umbakuzi ko: Muna ngyenda zaku zawonso untadila, oyandi osingika nzila zaku.” Tukwikilanga vo konso diambu kekutulombang’o Nzambi vo twavanga, i mu wete dieto. (Tanga Nsiku 10:12, 13.) Kieleka, Yave wakisunzula kwa Aneyisaele nze “on’okulong’oma ma mfunu, yo kufila muna nzila in’ofwete kwenda.” I bosi wakudika vo: “Ekwe, kele vo wawunikina nkanikinu miame! o luvuvamu luaku luadi kala nze nzadi, o unsongi waku nze mavuku ma kalunga.” (Yes. 48:17, 18) Tukwikilanga mu mvovo miami. Tuna ye ziku vo, o lemvokela nkanikinu mia Nzambi nluta miambote kaka dikututwasila.
7. Adieyi tufwete vanga kele vo ka tutomene zaya ko e kuma kiasilwa o nsiku muna Diambu dia Nzambi?
7 Tulemvokelanga wisa kia Yave kana nkutu ka tutomene zaya ko e kuma kiasilwa o nsiku wau muna Diambu diandi. Lwalu ka lukwikilu lwa uzowa ko, kansi lwasikila kikilu. Lusonganga e vuvu kieto kia nsi a ntima vo Yave ozeye edi diambote oku kwa yeto. O lemvo weto usonganga mpe vo tuna yo zola muna Nzambi. Yoane wa ntumwa wasoneka vo: “I yau yiyi e nzol’a Nzambi, tulunda nkanikinu miandi.” (1 Yoa. 5:3) Kansi vena ye kuma kiakaka tulemvokelanga kina tufwete sungamena.
Tulonga e Ntona Zeto
8. E ‘ngangu zeto zasinswa’ aweyi zilenda kutusadisila mu lemvokela wisa kia Yave?
8 Nkand’a Nzambi ukutuzayisanga vo twakala ye ‘ngangu zeto zasinswa twazaya mpambula za wete yo bi.’ (Ayib. 5:14) Muna mpila yayi, ka tulemvokela nsiku mia Nzambi ko lembi mio teka badika; kansi, tuvava bakula mu ‘zaya mpambula za wete yo bi’ mun’owu wa nsiku mia Yave. Tuzolele bakula e ngangu za nzila za Yave, kimana twavova nze ntozi a nkunga: “O nsiku aku wina muna nsi ame a ntima.”—Nku. 40:8.
9. Aweyi tulenda sila e ntona zeto betela ye nsiku mia Yave? Ekuma dinina o mfunu mu vanga wo?
9 Muna zaya o mfunu wa lemvokela e nsiku mia Nzambi nze ntozi a nkunga, tufwete badika mana tutanganga muna Nkand’a Nzambi. Kasikil’owu, vava tulongokanga konso nsiku a Yave, tufwete kiyuvula: ‘Ekuma nsiku wau winina wamfunu? Ekuma dinina diambote kwa mono mu lemvokela wo? Nkia mfwilu bebakanga awana bekululanga wo?’ Avo e ntona zeto zikedi e betela ye nzila za Yave, tukala twafwana mu baka e nzengo zina ngwizani yo luzolo lwandi. ‘Tuzaya owu win’o luzolo lua Yave’ yo kwamanana kunlemvokela. (Ef. 5:17) Kansi, ediadi ke diambu diakete ko.
Satana Ovavanga Yivisa Wisa kia Nzambi
10. Satana mu nkia diambu kevavilanga yivisa wisa kia Nzambi?
10 Tuka kolo Satana ovavanga yivisa wisa kia Nzambi. E fu kiandi kia kuyitumina kimonekanga mu mpila zayingi. Kasikil’owu, badika dina kasikidisa o Nzambi mu kuma kia longo. Akaka bezinganga vamosi lembi kazala. Akaka bevavanga una balenda vambanena y’akazi au. Wantu awaya balenda tonda e ngindu za nsongi a yimpa otomene zayakana, ona wavova vo: “Ke dilendakana ko kwa nkento yovo yakala mu kala yo nkazi mosi kaka.” Wakudika vo: “Kizeye kana muntu mosi ko una vo yakala dia nkento mosi kaka, ngatu nkento a yakala dimosi yovo muntu ozolele wo kala.” Muna kuma kia tongo twandi twalembi sikila, yakala dimosi una vo nsongi a yimpa wavova vo: “Kikwikidi ko vo yeto wantu twavangwa mu kala yo nkento yovo yakala dimosi kaka muna zingu kieto kiawonso.” Diamfunu twakiyuvula: ‘Nga nlemvokelanga wisa kia Yave mu kuma kia longo, ovo nyambulanga vo e fu kia nza kialembi sikila yo nkazi mosi kaka kiayivisa e ngindu zame?’
11, 12. (a) Ekuma dilenda kadila diampasi kw’aleke mu lemvokela wisa kia Yave? (b) Yika e nona kisonganga vo dia uzowa dia kulula nsiku mia Yave.
11 Nga u nleke omu nkubik’a Yave? Avo i wau, Satana olenda kufila mu yindula vo e wisa kia Yave ke kina mfunu ko kwa ngeye. E “maketo ma toko” kumosi ye ntonta z’akundi zilenda kufila mu yindula vo e nsiku mia Nzambi miampasi. (2 Tim. 2:22) Kuyambula ko vo ediadi diavangama. Vava wazaya e ngangu zina muna nkanikinu mia Nzambi. Kasikil’owu, Nkand’a Nzambi ukuzayisanga vo ‘watin’e zumba.’ (1 Kor. 6:18) Muna kuma kiaki, ukiyuvula e yuvu eyi: ‘Ekuma nkanikinu wau winina wa ngangu? O lemvokela nkanikinu wau nkia nluta dikuntwasila?’ Nanga ozeye wantu baveza luludiku lwa Nzambi ye mfwilu diabatwasila. Nga kiese kieleka bena kiau owau? Nga zingu kiambote bena kiau kisundidi kina bakala kiau muna nkubik’a Yave? Nga bena kieleka ye kiese kina e selo yakaka ya Nzambi bakondelo?—Tanga Yesaya 65:14.
12 Badika e mvovo mia Nkristu mosi una ye nkumbu a Sharon: “Muna lembi lemvokela nsiku mia Yave, yasambukila kimbevo kia Sida. Ntangwa zayingi nsungamenanga ulolo wa mvu yasadila Yave ye kiese.” Wabakula vo dia uzowa kavanga muna kulula nsiku mia Yave yo lembi zaya o mfunu a lemvokela mio. Nsiku mia Yave tanina mikututaninanga. Vava kasoneka e mvovo mina va ntandu, tumingu nsambwadi kaka twavioka Sharon wafwa. Nze una usonganga e nona kia Sharon, o Satana kena ye má kiambote ko kalenda vana kw’awana bekuyisianga kuna sambu dia nza yayi yambi. Wau vo ‘ese dia luvunu,’ osianga nsilu miayingi, kansi ke lungisanga mio ko, nze una kavanga kwa Eva. (Yoa. 8:44) Kieleka, diambote mu lemvokela e wisa kia Yave ntangwa zawonso.
Tuvenga e Fu kia Kuyitumina
13. Mu nkia diambu tufwete vengela e fu kia kitumina?
13 Muna lemvokela e wisa kia Yave, tufwete venga e fu kia zola kitumina. O lulendo lulenda kutufila mu yindula vo ketuvwidi luludiku mfunu ko. Kasikil’owu, tulenda telamena luludiku tuvewanga kw’awana bevitang’o ntu vana vena nkangu a Nzambi. Nzambi wakubika vo ntaudi akwikizi yo lulungalalu kavananga madia ma mwanda muna ntangw’andi. (Mat. 24:45-47) Kuna lulembamu lwawonso, tufwete sungamenanga vo eyayi i mpila o Yave ke lunga-lunganga o nkangu andi o unu. Tukala nze antumwa akwa kwikizi. Vava alongoki akaka bayambula kunlanda, Yesu wayuvula antumwa vo: “Oyeno mpe nuzolele katuk’e?” Petelo wavutula vo: “E Mfumu, kwa nani tukwenda? o mambu ma moyo a mvu ya mvu, nge una mau.”—Yoa. 6:66-68.
14, 15. Ekuma tufwete lemvokela luludiku lwa Nkand’a Nzambi?
14 O lemvokela wisa kia Yave divavanga vo twazingila e ngwizani ye luludiku luna muna Diambu diandi. Kasikil’owu, ntaudi akwikizi yo lulungalalu okutulukisanga vo “twayingila yo lembi kolwa.” (1 Tes. 5:6) Luludiku lwalu lwamfunu kikilu mu lumbu yayi yambaninu eyi wantu ayingi bakitukidi se “akwa kuzola, minzola-nzimbu.” (2 Tim. 3:1, 2) Nga tulenda sambukila e fu yayi? Elo. O kondw’etima dia salu ya mwanda dilenda kutufila mu leka tulu twa mwanda, yovo kutufila mu kala ye luzolo lwa vwama. (Luka 12:16-21) Muna kuma kiaki, dia ngangu dia lemvokela luludiku lwa Nkand’a Nzambi yo venga e fu ki’eloko kia nza yayi ya Satana.—1 Yoa. 2:16.
15 Akuluntu muna nkutakani bekutuvananga madia metukanga kwa ntaudi akwikizi yo lulungalalu. Nkand’a Nzambi ukutulukisanga vo: ‘Nulemvokel’awana ben’e wisa vovo nwina, yo kubasakalela: kadi beyingidilanga muna diambu dia mioyo mieno, nze awana bet’e mbalu; batela zo kuna kiese, ke ku bumu ko: kadi ediadi ke diamfunu kwa yeno ko.’ (Ayib. 13:17) Nga diadi disongele vo akuluntu muna nkutakani kebevanganga mpilakanu ko? Ve. Nzambi otoma monanga usumuki wau vioka nkutu wantu. Kana una vo i wau, ovavanga vo twabasakalela. Kanele vo asumuki, o sala kumosi y’akuluntu disonga e ziku vo, tulemvokelanga e wisa kia Yave.
Mfunu a Lulembamu
16. Aweyi tulenda songela vo tuzitisanga Yesu nze Ntu a nkutakani y’Akristu?
16 Tufwete sungamenanga vo Yesu i Ntu a nkutakani. (Kol. 1:18) Ekiaki i kuma tufwete sakalela luludiku lw’akuluntu kuna lulembamu lwawonso, yo ‘kubazitisa kikilu.’ (1 Tes. 5:12, 13) Kansi, akuluntu balenda songa vo asakaladi muna longanga e diambu dia Nzambi muna nkutakani vana fulu kia longa e ngindu za yau kibeni. ‘Ke belutakananga mana masonama ko’ muna nungununa e ngindu za yau kibeni.—1 Kor. 4:6.
17. Ekuma e fu kia lulendo kinina kia vonza?
17 Yeto awonso muna nkutakani tufwete venga e fu kia vava o nkembo a yeto kibeni. (Nga. 25:27) Ekiaki i fu kiakala yo nlongoki mosi ona Yoane wa ntumwa kawana muna nkutakani. Wasoneka vo: “Dioterefe, on’ozolele kak’e kimbuta, kekututambula ko. Dianu vo, ovo ngizidi, nsusula mavangu mandi kevanganga, okutukumbang’e nkumb’ambi.” (3 Yoa. 9, 10) Vena ye diambu tulenda longoka o unu mu mvovo miami. Tuvwidi kuma yayingi tufwete vengela e fu kia lulendo kilenda kala muna yeto. Nkand’a Nzambi ukutuvovesanga vo: “Umvwania uvita nkosomoko, o ntim’a lulendo, munkanda.” Awana belemvokelanga wisa kia Nzambi bafwete venga lulendo, kadi lulenda kubafusulwisa e nsoni.—Nga. 11:2; 16:18.
18. Nki kilenda kutusadisa mu lemvokela wisa kia Yave?
18 Elo, kala y’etima dia venga e fu kia kitumina yo lemvokela wisa kia Yave. Ntangwa zawonso, badikanga elau diampwena una diau dia sadila Yave. O kala mosi muna nkangu a Nzambi i ziku kisonganga vo yandi watunta muna mwand’andi avelela. (Yoa. 6:44) Kuvezi ngwizani aku ko yo Nzambi. Sia e ngolo zasonga muna zingu kiaku kiawonso vo ovenganga e fu kia kitumina yo lemvokela wisa kia Yave.
Nga Osungamenanga?
• Adieyi divavwanga muna lemvokela wisa kia Yave?
• O longa e ntona zeto aweyi dilenda kutusadisila mu lemvokela wisa kia Yave?
• Satana mu nkia mambu kevavilanga yivisa e wisa kia Nzambi?
• O lulembamu nkia kuma lunina o mfunu muna lemvokela wisa kia Yave?
[Yuvu ya Longoka]
[Foto ina muna lukaya lwa 18]
‘Tufwete lemvokela Nzambi nze nyadi, ke mu wantu ko’
[Foto ina muna lukaya lwa 20]
Diangangu dia landa e nkanikinu mia Nzambi e ntangwa zawonso