Ndekwa Zambote Basadila

MATOKO matatu kuna África Central bazola kwenda ku lukutakanu lwa Mvivu kuna zunga kiau. Aweyi bekwendela? O lukutakanu kwandá lwakubikilwa, tezo kia kilometa 90, e nzila yazala ye mawulu ye mbundukutu a ntoto. Bayindula o sompa tungungu yovo mvelo tatu, kansi ke basolola twambote ko.

Nkuluntu mosi muna nkutakani wazaya e mpasi bakala zau, wabasompeka lungungu, kana una vo lwankulu, lwatoma diatanga. Wabasonga una bavavanga oyau mu kwenda kuna lukutakanu lwa mvivu. Wabasong’e ngindu vo balenda sadila lungungu lumosi yau atatu. Ngindu zambote, kansi ngolo diavava mu vanga wo. Aweyi wantu atatu balenda kangalela mu lungungu lumosi?

Muna tina mwini, aleke yau atatu basikama muna dingi-dingi yo kanga funda yau muna lungungu. Mosi wayendela muna lungungu ye funda yau ekolo akaka balandanga kiamalu. O nkwa lungungu wadiatanga tezo kia 500 za meta, i bosi wayekekanga lungungu vana nti kuna futa. Kansi, wasianga lo vana fulu kina akw’andi bezayila yo keba kimana walembi “yiywa,” i bosi kadiatilanga kiamalu.

Vava awole balwakanga vana vaswekelwa lungungu, omosi wamantanga, wakaka wakwamanana diatila kiamalu yo vingila e ntangw’andi. Muna mpila yayi, yau atatu balenda kufika e nkangalu au a kilometa 90 mu kilometa 60. E ngolo bavanga zabatwasila nluta miambote. Bawanana ye mpangi zau zamakala ye zamakento kuna lukutakanu yo yangalela e nkubika yayi ya mwanda. (Nsi. 31:​12) Mu mvu wau, nga ovanga mawonso olenda kimana wakala muna lukutakanu lwa mvivu muna zunga kiaku?