Nga Wakubama Mu Zayisa Lukwikilu Lwaku Kw’akaka?

NGA wawanana kala ye diambu diavava vo wazayisa ekuma kia lukwikilu lwaku? Yindula dina diabwila mpangi Susana una ye kimbuta kia mvu 16 kuna Paraguai. Kuna sikola katangilanga, wantu bavovanga vo Mbangi za Yave ke bekwikilanga “Luwawanu Luankulu” ko, ngatu kwikila muna Yesu Kristu yovo Maria. Bavovanga mpe vo Mbangi za Yave wantu ambi, fwa bezolanga ke mu wukwa ko. Kele vo i ngeye nkia mvutu wadi vana?

Susana wasamba kwa Yave yo zangula o koko. Kanele vo e ntangw’a vaika mu sikola yafwana, walomba nswa kwa nlongi mu songa lukwikilu lwandi nze Mbangi a Yave. O nlongi wamvan’o nswa. I bosi, muna tumingu tole twalanda, Susana watoma kubika elongi diandi yo sadila finkanda Testemunhas de Jeová​​—⁠Quem São? Em que Crêem?

E lumbu kia sunzula elongi kiafwana. Susana wasonga ekuma tuyikilwanga vo Mbangi za Yave. Wasonga mpe e vuvu kieto kia kusentu y’ekuma ketuvutulwilwanga menga ko. I bosi walomba kw’akundi andi a sikola bayuvula e yuvu. Ayingi muna yau bazangula e moko. O nlongi wasivika mu wá mwan’a ndumba wavananga e mvutu za Nkand’a Nzambi.

Nkundi andi mosi a sikola wavova vo: “Nkumbu mosi yayenda kun’Eseka dia Kintinu, kiamona mo kana teke kimosi ko.” O nlongi wazola zaya ekuma ke mwakadila teke ko. Susana watanga Nkunga 115:​4-8 ye Luvaiku 20:⁠4. O nlongi wasivika yo vova vo: “Ekuma muna nzo zeto za nzambi mwinina yo ulolo wa teke wau vo Nkand’a Nzambi usimanga e nsambila za teke?”

E moko kiaki miniti 40 kiazingila. Vava Susana kayuvula akundi andi a sikola kana vo bazolele tala e vídeo Sem Sangue—A Medicina Encarou o Desafio, awonso batambulwila. O nlongi wakubika vo e moko kiakwamanana muna lumbu kialanda. Vava bamana tala e vídeo, Susana wasasila e mpil’a nguka betambulwilanga a Mbangi za Yave. Muna kuma kiaki, o nlongi wavova vo: “Kizayanga ko vo vena ye mpila zayingi za wuka lembi siwa menga ye nluta zitwasanga e nguka zazi. Nga Mbangi za Yave kaka bafwete wukwa e mpila yayi?” Vava kawa vo ve, o nlongi wavova vo: “E lumbu kiakaka bekwiza Mbangi za Yave kuna nzo ame, mokena nsinga mokena yau.”

E moko kia miniti 20 kakubika Susana kuna lubantiku, ola tatu  kiazingila. Muna lumingu lwalanda, nkundi andi mosi a sikola wa mwisi dibundu diakaka wazola mpe songa lukwikilu lwandi. Kuna mfoko, yuvu yayingi banyuvula kansi, kalenda yo vanina mvutu ko. Nlongi wanyuvula vo: “Ekuma kulendele songela lukwikilu lwaku ko nze una uvangidi o nkundi aku a Mbangi a Yave?”

Wavutula vo: “Oyau Nkand’a Nzambi kieleka belongokanga. Oyeto ke wau ko.”

O nlongi waviluka kwa Susana yo vava vo: “Ongeye Nkand’a Nzambi kieleka olongokanga yo sia e ngolo za sadila mana uvovanga. Wafwana sanisinwa.”

O Susana nga wabutama kwandi. Kansi, wazayisa lukwikilu lwandi muna landa mbandu ambote ya dumbelele kia mwisi Isaele wabakwa mu vita kwa esi Suria. E dumbelele kiaki wakituka se ntaudi a Namani wa mfumu a makesa ma Suria, ona wakala ye kimbevo kia wazi. E dumbelele kiaki wavova kwa mfumu andi ankento vo: “Kala vo o mfumu ame okedi yo ngunza una muna Samaria, nga wadi sasuka muna wazi.” E dumbelele kiaki kayambula sia umbangi mu kuma kia Nzambi aludi ko. Ediadi diafila mfumu andi Namani mu kituka nsambidi a Yave.​—⁠2 Nti. 5:​3, 17.

Diau adimosi, Susana kayambula sia umbangi mu kuma kia Yave yo nkangu andi ko. Muna zayisa lukwikilu lwandi ekolo lwafidiswanga e mpaka, Susana walemvokela nkanikinu a Nkand’a Nzambi uvovanga vo: “Nutumba Kristu se Mfumu muna ntima mieno: nukubama kak’o vana mvutwilu kwa konso on’okunuyuvul’e kuma kia vuvu kin’omo yeno, kansi kuna lembama, yo vumi.” (1 Pet. 3:​15) Nga wakubama mu zayisa lukwikilu lwaku vava okalanga y’elau mu vanga wo?

[Foto ina muna lukaya lwa 17]

E sadilwa yayi ilenda kusadisa mu zayisa lukwikilu lwaku