Simbinina e “Nzol’aku Antete”
Simbinina e “Nzol’aku Antete”
“Edi wina diau, simbinina dio.”—LUS. 3:11.
1, 2. Aweyi wamona vava wabakula vo mana walongwanga mu kuma kia Yave maludi?
NGA osungamenanga e nkumbu antete walongoka e vuvu kiakiese kevananga Yave kw’awana bekulemvokelanga? Kele vo mu dibundu diakaka wateka kala, aweyi wamona vava bazayisa ekani dia Nzambi muna Nkand’a Nzambi? Aweyi wamona vava bakiesesela mambu mana kwabakulanga ko? Nanga wakwikila vo e dibundu diaku ke dialonga ludi ko mu kuma kia Nzambi. Ekwe kiese una kiau owau, wau vo ozeye e ludi! Avo kwa mase m’Akristu wasanswa, nga osungamenanga una wamona vava wabakula vo mana walongwa mu kuma kia Yave maludi yo songa luzolo lwa zingil’e ngwizani ye mana walongokanga?—Roma 12:2.
2 Ndonga muna mpangi zaku muna nkutakani balenda kuvovesa e kiese bamona mu finama Yave yo yangalela una kabatuntila. (Yoa. 6:44) E kiese kiau kiabafila mu sala e salu ya Kikristu. Bakala ye kiese kiayingi mu zayisa kwa wantu una bamona. Ongeye mpe i wau omonanga?
3. Nkia diambu diakala muna nkutakani ya Efeso vava Yesu kabasonekena?
3 Vava kavovesa Akristu a nkutakani ya esi Efeso muna tandu kiantete, Yesu wayika e ‘nzol’au antete.’ Esi Efeso fu yayingi yambote bakala yau, kansi bayambula vo zola kwau muna Yave kwavola. Muna kuma kiaki, Yesu wabavovesa vo: “Nzeye mo, o mavangu maku, yo mfuntu aku yo luzindalalu luaku, ovo kulendi siamina wantu ambi ko, watonta mpe awana bekuyikil’e kintumwa, yo lembi kala kiau, wabasolola vo baluvunu; wina mpe yo luzindalalu, wasiaminina muna diambu dia nkumbu ame, yo lembi tukumukwa. Kansi diadi ivwidi, ovo wayambwidi nzol’aku antete.”—Lus. 2:2-4.
4. Mana Yesu kavova kwa esi Efeso, nkia kuma menena mpe mamfunu o unu?
4 Luludiku kavana Yesu kwa esi Efeso ye kwa nkutakani zakaka, luna muna nkanda Lusengomono, lwamfunu kikilu mu kuma kia mambu mebwilanga Akristu akuswa tuka muna mvu a 1914. (Lus. 1:10) Kansi, kana nkutu owau, Akristu akaka balenda vidisa ‘nzol’au antete’ muna Yave ye muna ludi. Wau tuzeye ediadi, yambula twafimpa una tulenda simbinina yo siamisa o zola y’etima twakala diau muna Nzambi ye muna ludi mu sungamena yo badika mana matubwila.
Nki Kiakwikidisa vo Mana Walongoka i Ludi?
5, 6. (a) O Nkristu nkia diambu kafwete sungamenanga? (b) Adieyi diakwikidisa vo Mbangi za Yave ludi belonganga? (c) Nki kilenda sadisa muntu mu siamisa e nzol’andi antete?
5 Konso muntu wakiyekola kwa Yave, kafwete ‘tonta’ yovo vav’o zaya “owu wina luzolo lua Nzambi luambote, luayangalalu, luakunkuka.” (Roma 12:1, 2) Ediadi divavanga vo kalongokang’e ludi kia Nkand’a Nzambi. Dina diakwikidisa muntu vo Mbangi za Yave ludi belonganga, dilenda swaswana ye dina diakwikidisa wakaka. Akaka basoba e fu yau vava batanga e nkumbu a Nzambi muna Nkand’a Nzambi yovo vava babakula e nkal’a mafwa. (Nku. 83:18; Kim. 9:5, 10) Edi diasivikisa akaka, i zola kuna bamona vana vena nkangu a Yave. (Yoa. 13:34, 35) Akaka basivika mu zaya e nsas’a kuyivambula ye nza. Babakula vo Akristu akieleka ke balendi kuyisia mu mambu ma luyalu ko ngatu nwana e vita.—Yes. 2:4; Yoa. 6:15; 17:14-16.
6 Kuna kwa wantu ayingi, o longoka e mambu mama ye makaka mpe i diasikamesa Nkunga 119:151, 152; 143:5.
e nzol’au antete muna Nzambi. Vaulang’e ntangwa ya yindula dina diakwikidisa vo mana walongoka i ludi. E zingu ye fu ya konso muntu yaswaswana. Muna kuma kiaki, dina diafila mu zola Yave yo kwikila muna nsilu miandi dilenda swaswana ye dina diafila akaka. Ka lukatikisu ko vo, e kuma okwikidilanga o unu vo mana olongokanga i ludi, ke kisobele ko ye kina kiakwikidisa vava wazaya e ludi e nkumbu antete. E ludi ke kisobanga ko. Muna kuma kiaki, o badika una wamona vava wayantika longoka, dilenda kusadisa mu siamisa e nzol’aku antete muna ludi.—TangaSiamisa e “Nzol’aku Antete”
7. Ekuma tufwete siamisina e nzol’eto antete muna ludi? Aweyi tulenda wo vangila?
7 Nanga mayingi masobele muna zingu kiaku tuka wayiyekwela kwa Yave. E nzol’aku antete muna ludi, diambu diamfunu diakala, kansi ekolo kiviokanga e ntangwa, divavanga vo wasiamisa e nzol’aku muna sunda mambu mampasi mana metontanga lukwikilu lwaku. Kansi, o Yave wasadisa mu siamisa e nzol’aku. (1 Kor. 10:13) Muna kuma kiaki, mana mabwila, ma lusadisu mpe kwa ngeye. Mekusadisanga mu siamisa e nzol’aku antete. Malenda mpe kusadisa mu vav’o zaya owu win’o luzolo lua Nzambi luambote, luayangalalu, luakunkuka.—Yos. 23:14; Nku. 34:8.
8. O Yave aweyi kayisunzulwila kwa Mose? Aneyisaele aweyi batoma zayila e kiwuntu kia Nzambi?
8 Muna bong’e nona, tala dina diabwila Aneyisaele vava Yave kabazayisa ekani diandi dia kubakûla muna ubundu muna Engipito. Nzambi wayisunzula kwa Mose mu vova vo: “O mono ikala owu ngina.” (Luv. 3:7, 8, 13, 14, NW) Edi kazola vova o Yave vo okituka konso una kazolele muna vevola nkangu andi. Muna konso diambu diababwilanga, Yave wayisunzula kwa Aneyisaele mu mpila zayingi za nkal’andi nze Mpungu-ngolo, Mfundisi, Mfidi, Mvuluzi, Ekesa ye Mvani.—Luv. 12:12; 13:21; 14:24-31; 16:4; Nek. 9:9-15.
9, 10. Nkia mambu malenda sadisa muntu mu zaya Nzambi? Ekuma dinina diambote mu sungamenanga mambu mama?
9 Mana mekubwilanga maswaswana ye mana mabwila Aneyisaele kuna nz’ankulu. Kansi, nanga una ye diambu diakwikidisa vo Nzambi mfunu kieleka kekuvwanga. Ediadi diakumika lukwikilu lwaku. Nanga omonanga una Yave kekitukilanga se Mvani, Mfiaulwisi yo Nlongi kuna kwa ngeye. (Tanga Yesaya 30:20b, 21.) Wamona una Yave kavanina e mvutu za sambu yaku. Nanga wasadiswa kala kwa mpangi wa Nkristu vava wakala mu mpasi. Yovo mun’elongi dia ngeye kibeni, wasolola sono kia Nkand’a Nzambi kiakala betela ye diambu diatokanesanga.
10 Avo ozayisi mana mekubwilanga kw’akaka, nanga ke besivika ko. Kanele vo mambu mama ke masivi ko, mena ye nsasa kwa ngeye. Kieleka, Yave okitukanga una kazolele kala kwa ngeye. Yindula e mvu se una mu ludi. Ng’olenda sungamena e lumbu watambula lusadisu lwa Yave muna zingu kiaku? Avo i wau, o yindula e diambu diadi ye una wamona vava diavangama, dilenda kusadisa mu sungamena zola kwaku muna Yave vava kasadisa. Diamfunu mu sungamenanga yo badika mambu mama. Ekiaki i ziku kisonganga vo Yave okuvwanga kikilu o mfunu ye ke vena muntu ko olenda kio kukatula.
Ukifimpa
11, 12. Nki kilenda kulula o zola kwa Nkristu muna ludi? Yesu nkia luludiku kavana?
11 Avo zola kwaku muna Nzambi ye muna ludi kwavola, ka disongele ko vo Nzambi wasoba. Yave kesobanga ko. (Mal. 3:6; Yak. 1:17) Wakinu kuzola nze una kazolelanga. Adieyi tuvova kele vo ngwizani aku yo Yave yakuluka? Nga dilenda kala mu kuma kia lubangamu yovo tokana kwasaka mu kuma kia zingu? Nanga entete fu kia samba wakala kiau, fululu kia longoka yo badika mana walongokanga. Nga wayivananga y’etima diawonso muna salu kia umbangi yo kutakana ntangwa zawonso muna lukutakanu ke mu wau ko?—2 Kor. 13:5.
12 Avo uyifimpidi yo mona vo diambu disobele, vava zaya kana nkia diambu diatwasa nsobani yayi? Nga mambu ma zingu kia lumbu ke lumbu nze lunga-lunga esi nzo aku, vimpi waku yovo mambu makaka mafila mu yambula yingila ekolo e lumbu kia Yave kifinamanga? Yesu wavovesa alongoki andi vo: “Se nutomi kulunga-lunga kweno, e ntima mieno ke miazemboka yo mvunda yo wuyana yo lunzumbulu lua zingu kiaki, ke nwasalukiswa kwa lumbu kiakina, nz’esokolo: kadi una kikwizila kw’awonso ben’ova nza. Kansi tu, nuyingila muna kolo yawonso, nwadodokelanga, nwavw’owu nukutukila muna mambu mawonso mekwiza vangama.”—Luka 21:34-36.
13. Yakobo nki katezanesa e Diambu dia Nzambi?
13 Yakobo ona wavumunwinwa mu soneka Nkand’a Nzambi, wavovesa akw’andi minkwikizi mu sadila Diambu dia Nzambi muna kuyifimpa. Yakobo wasoneka vo: “Se nukadi nu avangi a diambu, ke nu awe kaka ko, yo kuvùkika. E kuma kadi, ovo o muntu nwe a diambu, ke mvangi ko, ondiona wina nze muntu otalang’e ndose andi a wutukila muna pelo: kayitala, yo katuka, vana vau kavilakanw’owu kakedi. Vo i ndion’okengelelanga muna nsiku aziku a vevoka, yo sikilanga mo, ke nwe ampilakeno ko, mvangi kak’ovanganga, ondion’osambwilwa muna mpang’andi.”—Yak. 1:22-25.
14, 15. (a) O Nkand’a Nzambi aweyi ulenda kusadisila mu nungunuka muna mwanda? (b) Nkia yuvu tufwete badika?
14 O muntu olenda sadila pelo mu zaya una kena. Kasikil’owu, kele vo mwan’ayakala omwene vo e nsing’andi a nsingu (gravata) watekama wina, olenda wo singika. Avo mwan’ankento omwene vo e nsuki zandi zavwangalakana zina, olenda zo sana. Diau adimosi mpe, o Nkand’a Nzambi ulenda kutusadisa mu kuyifimpa una twina. Kele vo tuyitezanese ye una Nkand’a Nzambi kevovanga vo twakala, disonga vo tusadilanga wo nze pelo. Kansi, nkia mfunu dikala kele vo tuyitadidi muna pelo yo mona vo diambu difwene singikwa kansi tuyambwidi diakala una? Diangangu kele vo tuvangidi dina tuzayiswanga muna “nsiku aziku” a Nzambi yo kituka “avangi” a diambu. Muna kuma kiaki, avo mwene vo o zola kwaku muna Yave ye muna ludi kuvolele, diambote mu badika e yuvu eyi: ‘Nkia mambu inwananga mau muna zingu? Adieyi ivanganga mu kuma kia mambu mama? Entete, adieyi yavanganga? Nga vena ye diambu disobele?’ Avo mwene vo lutovoko una lwau, kuvezi lo ko. Avo vena ye diambu divava singikwa, singika dio vana vau.—Ayib. 12:12, 13.
15 O badika yuvu yayi dilenda mpe kusadisa mu kala y’etima dia nungunuka muna mwanda. Paulu wa ntumwa wavumunwinwa mu ludika Timoteo wa nkw’andi a salu mu wokesa uselo wandi. Paulu wamvovesa vo: “Toma tala mambu mama; wiyisia mo; o lunungunuku luaku luamoneka kw’awonso.” Muna sadila Diambu dia Nzambi, yeto mpe tulenda badika dina tulenda vanga mu nungunuka muna mwanda.—16. Nkia vonza fwete venga vava osadilanga Nkand’a Nzambi mu kuyifimpa?
16 Avo tomene kuyifimpa, olenda bakula konso lutovoko una lwau. O zaya vo lutovoko una lwau dilenda kukendeleka, kansi kuyambula ko vo diadi diavangama kwa ngeye. Ekani dia kuyifimpa i zaya dina tufwete singika. Satana ozolanga vo Nkristu kayibadikila vo kena mfunu ko mu kuma kia usumuki wandi. Satana ovovanga vo Nzambi ovezanga e ngolo tuvanganga muna kunsadila. (Yobi 15:15, 16; 22:3) Lwalu i luvunu katumba o Yesu; konso muntu mfunu kena vana meso ma Nzambi. (Tanga Matai 10:29-31.) O sungamena lutovoko lwaku, difwete kusadisa mu kala nlembami yo sia e ngolo za vanga edi diambote muna lusadisu lwa Yave. (2 Kor. 12:7-10) Avo kimbevo yovo mpasi za kinunu zikusimbanga mu lembi vanga dina ozolele, kala y’ekani dia vanga dina olenda, kansi kuyoyi ko ngatu yambula vo o zola kwaku kwavola.
Mayingi Tulenda Vutulwila Matondo
17, 18. Nkia nluta olenda baka muna siamisa e nzol’aku antete?
17 Nluta miayingi olenda baka kele vo okwamanene siamisa e nzol’aku antete. Olenda wokesa o zayi waku muna Nzambi ye luyangalalu lwaku muna nsiku miandi. (Tanga Ngana 2:1-9; 3:5, 6.) Ntozi a nkunga wavova vo: “Muna lunda [nsiku mia Yave] i mwina nsendo ayingi. Mabika ma Yave masikidi, mevana ngangu kwa tunga.” Vana ntandu, “akwa nsambu azikuki muna nzila, ana bekangadila muna nsiku a Yave.”—Nku. 19:7, 11; 119:1.
18 Nanga lenda kwikila vo mayingi una mau mu vutulwila matondo. Ozeye e kuma kia mambu mevangamanga ova nza. Obakanga nluta muna nkubika za mwanda kevanganga Nzambi mu kuma kia nkangu andi o unu. Ka lukatikisu ko vo oyangalalanga mpe wau vo Yave watunta muna nkutakani andi y’elau kavana diakala mosi muna Mbangi zandi. Vutulanga matondo muna mambote mevangamanga muna zingu kiaku. Avo tangidi e nsambu otambulanga, nanga kulenda zo fokola ko. O sungamenanga e nsambu otambulanga dilenda kusadisa mu lemvokela luludiku olu: “Edi wina diau, simbinina dio, ke vakal’on’obaka kolow’aku.”—Lus. 3:11.
19. Vana ntandu a badika e ngwizani aku yo Nzambi, nkia mambu diaka malenda kusadisa mu simbinina e kimwanda kiaku?
19 O badika una lukwikilu lwaku lunungunukini yamu wau, dimosi muna mambu malenda kusadisa mu simbinina kina wina kiau. Nkumbu miayingi, e finkanda fiafi fiyikanga mambu malenda kusadisa mu simbinina e ngwizani aku yo Nzambi, nze sambu, kalanga muna tukutakunu tw’Akristu ye muna salu kia umbangi. Mambu mama malenda kusadisa mu simbinina yo siamisa e nzol’aku antete.—Ef. 5:10; 1 Pet. 3:15; Yuda 20, 21.
Nkia Mvutu Ovana?
• O zaya dina diafila mu zola Yave aweyi dilenda kukumikina?
• Nkia ziku olenda kala kiau muna yindulanga mana mabwila muna zingu?
• Ekuma ofwete fimpilanga e nzol’aku muna Nzambi?
[Yuvu ya Longoka]
[Foto ina muna lukaya lwa 23]
Nkia diambu diatunta yo kukwikidisa e ludi?
[Foto ina muna lukaya lwa 25]
Nga vena ye diambu dina fwete singika muna zingu kiaku?