Nungunuka Muna Zayi wa Ludi Kuna “Mvevo a Ntima”

SELO yawonso ya Yave bevavanga vo Nzambi kabamwena edienga. Muna kuma kiaki, tuvavanga kumika lukwikilu lweto yo sala e salu kiavauka y’etima diawonso. Paulu wa ntumwa okutusungamesanga e vonza kiampwena kiabwila Ayuda akaka muna lumbu yandi, wavova vo: “Bena y’etima dia Nzambi, kansi ke mun’owu wa visa kia zaya ko.” (Roma 10:⁠2) Dialudi vo lukwikilu ye nsambil’eto kuna kwa Yave ka ifwete kala muna yenge-yenge ko. Tufwete kala ye zayi wa ludi muna Mvangi eto ye luzolo lwandi.

Muna nkanda miakaka kasoneka, Paulu wasonga vo e fu ina kezolanga o Nzambi, ngwizani yina ye luzolo lweto lwa vwa o zayi wa ludi. Wasamba vo alandi a Kristu ‘bazadiswa ye visa kia zaya luzolo’ lwa Nzambi kimana ‘bakangal’e nkangala ifwene o Mfumu, muna yangidika kwawonso’ ekolo ‘beyima mbongo muna mavangu mawonso mambote, yo nungunuka muna visa kia zaya Nzambi.’ (Kol. 1:​9, 10) Ekuma tuvwididi ‘zayi wa ludi’ o mfunu? Ekuma tufwete wokesela o zayi wau?

Nsabi Muna Kala yo Lukwikilu

Nze una uvovanga Nkand’a Nzambi, o zayi wa ludi mu kuma kia Nzambi ye luzolo lwandi i nto a lukwikilu lweto. Kondwa zayi wa ludi, o lukwikilu lweto muna Yave lulenda kala nze nzo yatungilwa van’esenge, ke diampasi ko mu bwa. Paulu okutuvovesanga twasadila Nzambi e salu kiavauka ye ntona zambote yo ‘vangulula nyindu mieto.’ (Roma 12:​1, 2) O longoka Nkand’a Nzambi ntangwa zawonso dilenda kutusadisa mu vanga wo.

Ewa, mviti a nzila a ngonde ke ngonde kuna Polônia wavova vo: “Kiadi nungunuka ko muna zayi wa ludi wa Yave kele vo kiakala ye fu kia longoka Diambu dia Nzambi ko ntangwa zawonso. Kimwanda kiame kiadi vola mu nzaki, o lukwikilu lwame mpe muna Nzambi lwadi kuluka.” Katuyambula ko vo ediadi diatubwila. Badika e nona kia muntu ona wawokesa o zayi wandi muna Yave yo mwenwa edienga kwa Yandi.

“Kuna kwa Nzola Nzolele Nsiku Aku!”

E Nkunga 119, usonganga una ntozi a nkunga kamona mu kuma kia nsiku, nkanikinu ye mîna mia Yave. Ntozi a nkunga wasoneka vo: “Muna mîna miaku ngyangalelela. . . O mabika maku i luyangalalu luame.” Wakudikila vo: “Kuna kwa nzola nzolele nsiku aku! I mpimpit’ame e lumbu mvimba.”​—⁠Nku. 119:​16, 24, 47, 48, 77, 97.

E mvovo “nyangalela” ye “mpimpit’ame” misonganga e kiese kina muna badika e Diambu dia Nzambi. E mvovo miami misonganga mpe zola kakala kwau e ntozi a nkunga mu longoka nsiku mia Nzambi. O zola kwaku mu ntima kwatukanga. Wakala ye luzolo lwa ‘badika’ e nsiku muna vwa ngangu za diambu dia Yave. Tulenda bakula vo wakala ye luzolo lwa zaya Nzambi ye makani mandi.

Dialudi vo o zola kwa ntozi a nkunga muna Diambu dia Nzambi mu ntim’andi kwatuka. Tulenda kiyuvula: ‘Nga izolanga e Diambu dia Nzambi? Nga iyangalelanga tanga  yo badika e tini ya Nkand’a Nzambi lumbu yawonso? Nga yiteka sambanga kwa Yave una kitangidi ko Nkand’a Nzambi?’ Avo tuvene e mvutu za yuvu yayi, tulenda songa vo ‘tunungunukanga muna zayi wa ludi mu kuma kia Nzambi.’

Ewa wavova vo: “Yasianga e ngolo mu tomesa e mpil’ame ya longoka. Tuka yatambulwila e finkanda ‘Veja a Boa Terra,’ itoma wo sadilanga mun’elongi dia mono kibeni. Isadilanga mpe nkanda Estudo Perspicaz das Escrituras ye nkanda miakaka.”

Badika e nona kia Wojciech ye Małgorzata bena ye kiyekwa kiayingi kia lunga-lunga esi nzo. Adieyi bevanganga mu kala y’elongi dia yau kibeni? Bavova vo: “Avo dilendakana, konso muntu mu yeto ovaulanga e ntangwa ya longoka e Diambu dia Nzambi. Tuzayisanga akaka mambu mamfunu tutangidi muna elongi dia esi nzo ye muna moko yeto.” Elongi dia yau kibeni dikubamwesanga kiese yo kubasadisa mpe mu ‘nungunuka muna zayi wa ludi.’

Longokanga ye Ngindu Zavuvama

Wau vo tu Akristu, tukwikilanga vo i luzolo lwa Nzambi vo “wantu awonso bavuluzwa, yo luaka muna visa kia zay’e ludi.” (1 Tim. 2:​3, 4) Ediadi disonganga o mfunu wa tanga Nkand’a Nzambi yo sia ngolo mu ‘bakula’ mana tutanganga. (Mat. 15:​10) Tulenda wo vanga muna longoka ye ngindu zavuvama. Ekiaki i fu kia songanga esi Beroya kuna nz’ankulu vava Paulu kabasamunwina e nsangu zambote. Wavova vo: “Batambulwidi e diambu kuna mvevo a ntima, e lumbu yawonso bafimpidinge e Sono, o mambu mama, kana wau mena.”​—⁠Mav. 17:⁠11.

Ng’olenda landa mbandu ya esi Beroya muna kalanga ye ngindu zavuvama yo lembi yindula mambu malenda vunzanesa e ngindu zaku ekolo longokanga Nkand’a Nzambi? Nkristu olenda sia ngolo mu tanginina esi Beroya kana nkutu kayangalelanga elongi dia Nkand’a Nzambi ko. Vana ntandu, akaka beyindulanga vo ke balendi diaka tanga ko yo longoka una ufwene wau vo se ambuta. Kansi, Nkristu kafwete yindula mpila yayi ko. Kana una vo muntu se nkwa mvu miayingi, lenda sia ngolo mu venga mambu malenda vunzanesa e ngindu zandi. Vav’otanganga, lenda solola mambu mamfunu yo zayisa mo kw’akaka. Kasikil’owu, nga lenda zayisa nkaz’aku yovo kwa nkundi aku Nkristu e diambu diamfunu otangidi mun’elongi dia ngeye kibeni? Ediadi dilenda kusadisa mu lembi vilakana mambu mama yo kotesa mo muna ntima yo yangidika akaka.

Vava tulongokanga, tulenda landa e mbandu ya Ezera, selo kia Nzambi kuna nz’ankulu, ona “wasi’etima dia tomba nsiku a Yave.” (Eze. 7:​10) Aweyi lenda wo vangila? Muna kala y’etima dia longoka. Una kuyantikidi ko, lomba lusadisu ye ngangu kwa Yave muna sambu. (Yak. 1:⁠5) Ukiyuvula, ‘Nkia diambu nzolele tanga?’ Vava otanganga, sia e sungididi muna mambu masina. Lenda soneka mambu mamfunu musungula mana zolele sungamena. Badika una lenda sadila  mambu mama muna salu kia umbangi, vava obakanga e nzengo, yovo vava okumikanga akw’aku minkwikizi. Kuna mfoko elongi diaku, fimpulula mana olongokele. Ediadi dilenda kusadisa mu kotesa mambu olongokele muna ntima.

Ewa wavova vo: “Vava yitanganga Nkand’a Nzambi, yisadilanga Índice das Publicações da Torre de Vigia ye Watchtower Library mu CD-ROM. Isonekanga mambu mamfunu malenda kunsadisa mu toma sadila e sadilwa yayi.”

Akaka belongokanga se mvu miayingi yo zaya mayingi mu kuma kia Nzambi. (Nga. 2:​1-5) Wau vo bena ye kiyekwa kiayingi, diampasi dikalanga mu vaula e ntangwa y’elongi dia yau kibeni. Avo diampasi mpe dikalanga kwa ngeye, aweyi lenda vanga mu singika nkubik’aku?

Aweyi Ndenda Vaulwila e Ntangwa?

Nanga lenda kwikila vo ke dia mpasi ko mu vaula e ntangwa ya sala e salu kina tuyangalelanga. Ndonga bemonanga vo muna kuyivana emvimba mun’elongi dia yau kibeni, bafwete kala y’ekani, nze tanga Nkand’a Nzambi wawonso. Kieleka, dilenda kala diampasi mu tanga tusansu twandá, lusansu lwa tempelo ya nz’ankulu, yovo ungunza wampasi muna bakula. Vanga dina dilenda kusadisa mu lungisa ekani diaku. Kasikil’owu, una kutangidi ko e tini kia Nkand’a Nzambi kina kubakwidi ko, lenda tanga lusansu lwa sono kiaki yovo nsas’andi. Lenda solola mambu mama muna nkanda “Toda a Escritura É Inspirada por Deus e Proveitosa,” wavaikiswa mu ndinga 50.

Nkanda wau ulenda kusadisa mu badika vava otanganga Nkand’a Nzambi. Ediadi dilenda kusadisa mu yindula e diambu otanganga. Avo osadila luludiku lwalu, oyangalela elongi dia ngeye kibeni yo baka nluta. Okala y’etima dia vaula e ntangwa y’elongi dia ngeye kibeni. Okala ye fu kia tanga Nkand’a Nzambi lumbu yawonso.

Luludiku lwalu lulenda sadisa konso muntu mu yeto kana nkutu kiyekwa kia lunga-lunga  esi nzo tuna kiau. Nga nulenda mokena e nluta nulenda baka mun’elongi dia esi nzo? Muna moko kiaki, nulenda baka ngindu zambote, nze vaula miniti miakete mu tanga Nkand’a Nzambi konso lumbu mu mene. Nanga muna moko yeno nulenda mona diambu difwete singikwa muna nkubika ya esi nzo. Kasikil’owu, e nzo zakaka bemonanga vo diambote mu tanga e sono kia lumbu ke lumbu yovo tanga Nkand’a Nzambi kuna mfoko a dia kwa masika. Vava nusikamanga, una ke nuvangidi ko e salu ya nzo, nulenda vaula miniti 10 yovo 15 mu fimpa e Sono kia lumbu yovo tanga Nkand’a Nzambi. Dilenda kala diampasi kuna lubantiku, kansi vava nukulukila wo vanga dilenda twasa kiese muna nzo.

Wojciech ye Małgorzata bavova dina diasadisa esi nzo au: “Muna mvu miavioka, twafwasanga ntangwa mu salu ya kondwa mfunu. Twabaka e nzengo za lembi viokesa e ntangwa mu sonekena akundi eto muna Internete. Twayambula fwasa e ntangwa muna nsaka yo sikidisa e lumbu ki’elongi dia esi nzo.” Wojciech ye Małgorzata ke bayibanza ko mu kuma kia nsobani bavanga, ngeye mpe lenda vanga diau adimosi kwa esi nzo aku.

Nungunuka Muna Zayi wa Ludi Nluta Ditwasanga

E longoka e Diambu dia Nzambi dilenda kusadisa mu ‘yima mbongo muna mavangu mawonso.’ (Kol. 1:​10) Avo vangidi wo, lunungunuku lwaku lumoneka kw’awonso. Ozikuka muna mwanda yo vwa umbakuzi wa ludi kia Nkand’a Nzambi. Obaka nzengo zambote yo kala wakubama muna sadisa akaka. Edi disundidi o mfunu, ofinama Yave. Otoma yangalela e fu yandi, ediadi dilenda kusadisa mu zayisa yo kw’akaka.​—⁠1 Tim. 4:15; Yak. 4:⁠8.

Kana u mbuta yovo nleke yovo mayingi ozeye kala, sia e ngolo mu solola e kiese muna Diambu dia Nzambi yo kuyivana emvimba muna longoka dio ye ngindu zavuvama. Kala ye vuvu vo Yave ke vilakana ko e ngolo ovanganga. (Ayib. 6:​10) Osinga kusambula.

[Babu kina muna lukaya lwa 13]

VAVA ‘TUNUNGUNUKANGA MUNA ZAYI WA LUDI’. . .

Tukumikanga lukwikilu lweto muna Nzambi yo kangala e nkangala ifwene kwa Yave. —Kol. 1:9, 10

Tukalanga ye ngangu zilenda kutusadisa mu sadila umbakuzi yo baka nzengo zambote. —Nku. 119:99

Tukalanga ye kiese vava tusadisanga akaka mu finama Yave. —Mat. 28:19, 20

[Mvovo mia Fwaniswa mina muna lukaya lwa 14]

Kana una vo diampasi muna solola e fulu kiavuvama mu longoka, diambote mu vanga wo

[Mvovo mia Fwaniswa mina muna lukaya lwa 15]

Esi nzo zakaka betanganga e tini kia Nkand’a Nzambi kuna mfoko a dia kwa masika