Sila Umbangi Muna Mazandu

VAVA kakala muna mbanza Atenai, Paulu wa ntumwa lumbu yawonso kayendanga muna mazandu mu samuna e nsangu zambote mu kuma kia Yesu. (Mav. 17:​17) Paulu wayendanga muna mazandu kadi esi Atenai i mwau baviokesalanga e ntangwa.

Vioka 2.000 ma mvu, Mbangi za Yave besamunanga mpe nsangu zambote za Kintinu kia Nzambi muna mazandu. Ekuma? E kuma kadi balenda solola wantu ayingi muna fulu yayi. O unu, e zandu dilenda kala nzo ya tekela. Vava mfumu mosi a meza vana zandu kabavana o nswa, Mbangi za Yave bayala e nkanda miau vana meza ma tekela.

Kasikil’owu, muna nzo ya tekela kuna mbanza Nova Jersey kuna Estados Unidos, mpangi mosi wayala e nkanda usonganga o mfunu wa kala ye fu yambote muna nzo. Nkia nluta diatwasa? Muna lumbu kimosi, nkanda 153 kakaya mu ndinga sambanu.

Nkento mosi watambula nkanda yo wunikina vava mpangi ankento kansasilanga wo. Nkento ndioyo watonda yo vova vo diambote twazaya luzolo lwa Nzambi muna zingu kieto. Watambula nkanda emi: Aprenda do Grande Instrutor, Mbumba ya Zingu Kia Nzo ya Kiese ye Os Jovens Perguntam​—⁠Respostas Práticas.

Kuna masika, muntu mosi wakota mu nzo ya tekela yakala vana ndambu a meza mayalwa e nkanda, wayangalela o nkanda Os Jovens Perguntam. Mpangi ankento vava kamona vo muntu ndioyo wayangalala, wanyuvula: “Nga vena ye nkanda uyangidikidi?” Wasonga o nkanda Os Jovens Perguntam. Mpangi ankento wamvana o nkanda wau. O muntu ndioyo wavova vo wana atatu kena yau,  omokenanga yau nkumbu mosi muna lumingu. Wan’andi wole mu ntela kitoko se bena. Vava kaziula o nkanda wau, wavova vo osadila wo muna moko kia esi nzo. Muna nkanda wau, wasolola mpe ntu a diambu wa nkanda Mbumba ya Zingu Kia Nzo ya Kiese, usonganga vo yandi yo nkaz’andi balenda solola malongi mamfunu malenda kubasadisa mu baka nzengo zambote mu kuma kia zingu kia esi nzo. Muntu ndioyo wayangalala kikilu, wavana lukau kuna ntim’amvevo yo tambulwila vo Mbangi a Yave mosi kenda kunkingula ye esi nzo andi.

Ampangi aweyi bamona muna lumbu kiaki basila umbangi kuna zandu? Mpangi mosi ankento wavova vo: “Iyangalelanga samuna e nsangu zambote va fulu kiaki. Ekwe kiese diantwasila!” Mpangi wakaka wankento wavova vo: “Yave wavova vo e nsangu zambote zifwete samunwa yakuna nsuk’a nza. O unu, wantu a ndinga za mpila mu mpila bewanga e nsangu zambote kuna nzo ya tekela ina kuna Nova Jersey. Diakiese mu sila umbangi mu nzo yayi ya tekela. Konso mpangi wasila umbangi va fulu kiaki wayangalala kikilu. Vava o kuma kufwanga, ke tukalanga ye luzolo lwa vutuka ku nzo ko.”

Ng’olenda samuna e nsangu zambote mu mpila zayingi? E mpil’eto yantete i kwenda mu nzo ye nzo. (Mav. 20:​20) Nga oyangalelanga sila umbangi muna mazandu yovo mu fulu ya tekela?