‘Sia Nkadi Ampemba e Kitantu’ nze Yesu
‘Sia Nkadi Ampemba e Kitantu’ nze Yesu
“Vo i Nkadi Ampemba, nunsi’e kitantu, okunutina.”—YAK. 4:7.
1. O Yesu adieyi kazaya mu kuma kia kitantu kasiwa ova ntoto? Aweyi dialunganena?
YESU KRISTU wazaya wo vo kitantu kesiwa kwa Nkadi Ampemba. Ediadi diamoneka muna mvovo mina Nzambi kavova kwa nioka ye kwa mbasi zambi. Wavova vo: “Kimbeni nsia ovo nge yo nkento [nkubik’a Yave kun’ezulu], y’ovo mbongo aku ye mbongo andi: [Yesu Kristu] obosola ntu aku, onge obosola singini kiandi.” (Etu. 3:14, 15; Lus. 12:9) O bosola singini kia Yesu disongele vo, mpasi kemweswa mu fikolo yo vondwa ekolo kekala ova ntoto, kansi Yave okumfula yo kumvana nkembo kun’ezulu. Kansi, o bosola ntu a nioka, disongele vo o Nkadi Ampemba vondwa emvimba kevondwa.—Tanga Mavangu 2:31, 32; Ayibere 2:14.
2. Ekuma Yave kakadila ye vuvu vo Yesu osunda e ntota za Nkadi Ampemba?
2 O Yave wakala ye vuvu vo Yesu olungisa kiyekwa kiandi yo sia Nkadi Ampemba e kitantu ekolo kekala ova ntoto. Ekuma Yave kakadila ye vuvu kiaki? E kuma kadi yandi wasema Yesu, yo kala yandi kun’ezulu mvu miayingi. Wazaya mpe vo e “mbuta mbangu” ndioyo wa “mwan’antete muna nsema wawonso” nkwa kwikizi yo lemvoka. (Nga. 8:22-31; Kol. 1:15) Muna kuma kiaki, vava Nzambi kafila Yesu ova ntoto yo yambula vo katontwa kwa Nkadi Ampemba, wakala ye ziku vo Mwan’andi amosi osunda e ntota.—Yoa. 3:16.
Yave Otaninanga e Selo Yandi
3. Adieyi kevanganga Nkadi Ampemba kwa selo ya Yave?
3 Yesu wayikila Nkadi Ampemba vo ‘nyadi a nza yayi,’ yo zayisa alongoki andi vo bangikwa bebangikwa nze yandi. (Yoa. 12:31; 15:20) Wau vo e nza mu wisa kia Satana wa Nkadi Ampemba ina, Akristu akieleka bebangikwanga kadi Yave besadilanga yo sala se ateleki a ndungidi. (Mat. 24:9; 1 Yoa. 5:19) Nkadi Ampemba oluta bangikanga e nsâdiswa z’akuswa, ana beyala yo Kristu muna Kintinu kiandi ki’ezulu. Satana obangikanga mpe ulolo wa Mbangi za Yave ana bena ye vuvu kia zinga yakwele mvu muna paradiso ova ntoto. Nkand’a Nzambi ukutuzayisanga vo: “O ntantu eno Nkadi Ampemba, nze nkosi ankwinti ovemanga, kend’avavi ona kevempola.”—1 Pet. 5:8.
4. Nkia ziku kisonganga vo nkangu a Nzambi mu sunda una e ntota za Nkadi Ampemba mu lumbu yeto?
4 Wau vo mu nkubik’a Yave wa Nzambi tuna, tulendanga sunda e ntota za Nkadi Ampemba. Tala nona ilende: Muna 100 mvu miviokele, ayadi ayingi ambi bavavidi sukisa Mbangi za Yave. Kansi o lutangu lwa Mbangi mu wokela kaka lwina, owau balweke se tezo kia 7.000.000 muna 100.000 ma nkutakani mu nza yawonso. Ayadi ambi ana batelamena nkangu a Yave yau bavempokele.
5. E sono kia Yesaya 54:17 aweyi kilunganenanga muna nkangu a Yave?
5 Nzambi wasia nsilu kuna kwa nkutakani a Isaele yankulu, ina kayikila vo “nkento” andi vo: “Ke vena nwaninwa kiavangilw’omo ngeye kisikila ko; o tubini twawonso tukutelamena muna mfundu yeles’oyelesa to. Okwaku i vwa kwa ntaudi za Yave, o unsongi wau wa mono.” (Yes. 54:11, 17) Nsilu wau mu lungana una muna nkangu a Yave ova ntoto mu “lumbu yambaninu.” (2 Tim. 3:1-5, 13) Twakinu sia Nkadi Ampemba kitantu, e nwaninwa yawonso kesadilanga mu sukisa nkangu a Nzambi ke yisikilanga ko kadi Yave una yeto.—Nku. 118:6, 7.
6. O ungunza wa Daniele adieyi ukutuzayisanga dibwila luyalu lwa Nkadi Ampemba?
6 Kuna mbaninu a nza yayi yambi eyi ifinamanga, e nkubika zawonso za luyalu lwa Satana zisukiswa. Daniele wa ngunza wavumunwinwa kwa Nzambi mu soneka vo: “Muna lumbu y’atinu awana [beyalanga mu lumbu yeto], o Nzambi ezulu otongeka kintinu [kun’ezulu], kina ke kibangalakeswa ko yakwele mvu, ngatu vingilwa untinu wandi kwa nkangu akaka; kansi kikosomona yo sukisa yintinu yayi yawonso [iyalanga owau], kitongama mpe yakwele mvu.” (Dan. 2:44) Vava ungunza wau ulungana, luyalu lwa Satana ye lwa wantu alembi lunga lusukiswa emvimba. E nkubika zawonso za nza ya Nkadi Ampemba ke zikala diaka ko, Kintinu kia Nzambi kaka kiyala e nza yawonso.—Tanga 2 Petelo 3:7, 13.
7. Aweyi tuzayidi vo selo ya Yave ilenda sunda Nkadi Ampemba?
7 Ka lukatikisu ko, e nkangu a Yave utaninwa yo sikila muna mwanda. (Tanga Nkunga 125:1, 2.) Adieyi tuvova mu kuma kieto? Nkand’a Nzambi ukutusonganga e ziku vo tulenda sunda e ntota za Nkadi Ampemba, nze una o Yesu kasundila. Kieleka, ungunza kayika Kristu muna Yoane wa ntumwa usonganga vo, kanele vo tusiwa kitantu kwa Satana, “ndong’ayingi” bena ye vuvu kia zingila ova ntoto bevuluka kuna mbaninu a tandu kiaki. Nze una usonganga Nkand’a Nzambi, o wantu awaya bekaza muna nding’angolo vo: “Luvuluzu kwa Nzambi eto, oyu ovwende ova kunda, y’oku kwa Mwan’ememe [Yesu Kristu].” (Lus. 7:9-14) Akuswa beyikwanga vo besundanga Satana, diau adimosi, akw’au “mameme makaka” mpe bekunsiang’e kitantu. (Yoa. 10:16; Lus. 12:10, 11) Kansi ediadi ngolo divavanga yo samba kwa Nzambi vo ‘katuvuluza muna ndiona wambi.’—Mat. 6:13.
Mbandu Ambote Muna sia Nkadi Ampemba Kitantu
8. Nkia ndekwa kasadila Nkadi Ampemba mu tonta Yesu muna makanga? Kristu nkia mvutu kavana?
8 Nkadi Ampemba wavava fwasa kwikizi kia Yesu. Muna makanga, Satana watonta Yesu kimana kakolamena Yave. Kansi Yesu wasisa mbandu ambote ya sia Satana e kitantu. Una kalembi dia mu lumbu 40 ye fuku 40, o Yesu nanga nzala kikilu kakala zau. Satana wavova vo: “Ovo nge u Mwan’a Nzambi, yika matadi mama makituka se mbolo.” Kansi Yesu kazola sadila nkum’andi kavewa kwa Nzambi mu wete diandi ko. O Yesu wamvutula vo: ‘Diasonama vo, ke mu dia kaka ko i kezingila muntu, kansi mu konso edi divaikidi omu nu’a Yave.’—Mat. 4:1-4; Nsi. 8:3.
9. Ekuma tufwete zizidila e ntota za Nkadi Ampemba za vava sadila zolela yeto ya nitu?
9 O unu Nkadi Ampemba osadilanga zolela ya nitu ya selo ya Yave mu vava kubavukumuna. Muna kuma kiaki, tufwete zizidila e ntota za tá e zumba ziwokelanga mu nza yayi. Nkand’a Nzambi ulukisanga vo: ‘Nga ke nuzeye wo ko, ovo, avilwa ke bevwila kintinu kia Nzambi ko e? Ke nuvukikwa ko: aminta-zumba, y’asambidi a teke, y’akwa ngyambila, y’ana bekukitulanga, y’akala belekanga y’akala . . . kintinu kia Nzambi ke bevwila kio ko.’ (1 Kor. 6:9, 10) Awana bekuyivananga muna mavangu ma zumba yo lembi soba, ke beyambulwa ko vo bazinga muna nz’ampa ya Nzambi.
10. Muna Matai 4:5, 6, nkia ntota zakaka kasadila Satana mu vava fwasa kwikizi kia Yesu?
10 Mu kuma kia ntota zakaka kazizidila Yesu muna makanga, Nkand’a Nzambi uvovanga vo: “O Nkadi Ampemba untombwele muna mbanz’avauka; undongelekele vana lusangidika lua tempelo, umvovese vo, ovo nge u mwan’a Nzambi wiyitakul’ovansi: kadi diasonama vo, okanikina mbasi zandi muna diambu diaku: Vana moko mau bekulèlela, kwawandamw’o kulu mun’etadi.” (Mat. 4:5, 6) Satana wazola vo Yesu kavanga esivi mu songa kikilu vo yandi i Masia. Kansi evangu diadi diambi, dia lulendo, ke diadi tondakana ko kwa Nzambi, ngatu kuntanina. Muna ntota zazi, Yesu wasikila ye kwikizi muna Yave yo sadila e sono muna mvutu zandi. Wavova vo: ‘Diasonama diaka vo, kutonti Yave wa Nzambi aku ko.’—Mat. 4:7; Nsi. 6:16.
11. Satana aweyi kalenda kututontela? Nkia vonza dilenda twasa?
11 Satana lenda kututonta mu vava nkembo mu mpila zayingi. Lenda kutufila mu tanginina fu ya nza muna mvwatu ye mpila ya kikubika yovo kivana mu nsaka zambi. Kansi avo tuvezele luludiku lwa Nkand’a Nzambi yo tanginina e fu ya nza, nga tulenda kala ye vuvu vo ambasi balenda kututanina kele vo tubwidi mu mpasi? Kanele vo Davidi wa ntinu waviluka o ntima mun’esumu diandi yo Bate-seba, Yave kantanina ko muna mpasi zatuka mun’evangu diandi. (2 Sam. 12:9-12) Tuvenga e fu kia tonta Yave, nze i vanga kikundi ye nza.—Tanga Yakobo 4:4; 1 Yoane 2:15-17.
12. Nkia ntota ziyikwanga muna Matai 4:8, 9? O Mwan’a Nzambi aweyi kasundila zo?
12 E mpila yakaka kasadila Nkadi Ampemba mu tonta Yesu muna makanga, i kunsonga tuyalu twa nza. Satana wasonga Yesu e yintinu yawonso ya nza ye nkembo au yo vova vo: “Eyayi yawonso ikuvana yo, ovo ofukama, wankunda.” (Mat. 4:8, 9) Ekwe eloko kasonga dia vava tambula e nsambila ina ifwene kaka kwa Yave yo fila Yesu kakolamena Nzambi! Mu kuma kia luzolo lwa vava sambilwa, e mbasi yayi yakwikizi yasumuka yo kituka se nkw’eloko, nkwa luvunu ye Satana wa Nkadi Ampemba. (Yak. 1:14, 15) Kansi nswaswani yo yandi, Yesu wasikila ye kwikizi muna S’andi ezulu, ikuma kavovela vo: ‘Katuka, e Satana: kadi diasonama vo, o Yave wa Nzambi aku, ifwete kunda, yandi kaka ifwete sadila.’ Yesu wa sia Nkadi Ampemba kitantu muna mvovo miakiá. Mwan’a Nzambi kazola kuyisia mu mambu ma nza ya Satana ko ngatu sambila kimpumbulu kiaki.—Mat. 4:10; Nsi. 6:13; 10:20.
‘Nusia Nkadi Ampemba Kitantu, Okunutina’
13, 14. (a) O Nkadi Ampemba nki kazola vana kwa Yesu vava kansonga yintinu yawonso ya nza? (b) O Satana aweyi kevavilanga kutuvukumuna?
13 Muna songa kwa Yesu e yintinu yawonso ya nza, Nkadi Ampemba wazola kumvana wisa kiampwena kina ke kisidi kala yo muntu ko. Satana wakala ye vuvu vo Yesu oyangalela kina kasongwa yo kumfila mu kwikila vo okituka mfumu isundidi e wisa mu nza yawonso. O unu Nkadi Ampemba ke kutuvananga yintinu ko, kansi ovavanga kutuvukumuna muna sadilanga meso meto, matu ye ngindu zeto.
14 E nza yayi mu wisa kia Nkadi Ampemba ina. Osadilanga amwangi a nsangu. Ka di’esivi ko vo, e nkanda mivaikiswanga mu nza, mana mesongwanga ye vovwa mazala ye mavangu ma zumba ye umpumbulu. Amwangi a nsangu bevavanga kutufila mu sumba lekwa ina ketuvwidi kweto mfunu ko. Nkadi Ampemba osadilanga e ndekwa zazi mu vava kutuvukumuna muna mambu malenda yangidika meso meto, matu ye ngindu zeto. Kansi vava tuvenganga tala, wá yovo tanga mavangu mambi, tuvovanga vo: “Katuka, e Satana!” Tutangininanga Yesu vava tuzindalalanga yo lembi vukumunwa kwa nza yayi ya Satana. Muna kisunzulanga kuna salu, kuna sikola, kwa esi belo ye kwa yitu yeto vo tu Mbangi za Yave ye alandi a Kristu, tusonganga vo ke tuna ngwizani ko ye nza ya Satana.—Tanga Maku 8:38.
15. Ekuma divavilanga vo twakwamanana yingila mu sia Satana kitantu?
15 Wau Nkadi Ampemba kalembi sunda muna nkumbu ntatu mina katonta Yesu mu fwasa kwikizi kiandi muna Nzambi, ‘Nkadi Ampemba wanyambula.’ (Mat. 4:11) Kansi, Satana kayambula mvimba tonta Yesu ko, kadi tutanganga vo: “O Nkadi Ampemba vava kamene o vukumuna kwawonso [muna makanga], okatukidi vana kena yavana kevw’e ntangwa.” (Luka 4:13) Tufwete vutulanga matondo kwa Yave, vava tusundanga e ntota za Nkadi Ampemba. Kansi tufwete kwamanana vava lusadisu lwa Nzambi, kadi o Nkadi Ampemba lenda kututonta diaka mu ntangwa ina kemona vo yambote, ke mu ntangwa ina tuyindulanga ko. Muna kuma kiaki, tufwete yingilanga e ntangwa zawonso yo zindalala sadila Yave salu kiavauka, kana nkutu nkia mpila ntota zilenda kutulwakila.
16. O Yave nkia nkuma kekutuvananga? Ekuma tufwete wo lombelanga?
16 Muna zindalela sia Nkadi Ampemba e kitantu, tufwete lombanga lusadisu lwa mwand’avelela a Nzambi, una vo i nkuma usundidi mu nsema wawonso. E mwanda wau ukutusadisa mu vanga dina katulendi vanga mu ngolo za yeto kibeni ko. Yesu wasonga e ziku kia lusadisu lwa mwand’avelela vava kavovesa alongoki andi vo: “Oyeno [wantu alembi lunga] nuna yo bi , ovo nuzeye o vana tukau twambote kwa wan’eno, o Tata kun’ezulu, nkia nduta kelut’o van’o mwand’avelela kw’awana bekunlomba.” (Luka 11:13) Yambula twakwamanana lomba mwand’avelela kwa Yave. Muna lusadisu lwa mwanda wau, tulenda sia Nkadi Ampemba e kitantu yo sunda e ntota zandi. Vana ntandu a sambanga ntangwa zawonso, tufwete vwata nwaninwa yawonso ya Nzambi mu ‘telamena tumpeso twa Nkadi Ampemba.’—Ef. 6:11-18.
17. Nkia kiese kiasadisa Yesu mu zizidila ntota za Nkadi Ampemba?
17 Vena ye diambu diakaka diasadisa Yesu mu sia Nkadi Ampemba e kitantu, dilenda mpe kutusadisa. Nkand’a Nzambi uvovanga vo: ‘Muna kiese kasidilwa [Yesu], i kazizidil’e nti ampasi kavez’e nsoni, ovwende kuna koko kwalunene kwa kunda kia Nzambi.’ (Ayib. 12:2) Tulenda vwa kiese kiaki muna yikamanga kimfumu kia Yave, zitisa nkumbu andi avauka yo simbinina e vuvu kieto kia moyo a mvu ya mvu. Ekwe kiese tukala kiau vava Satana ye mavangu mandi mawonso mesukiswa emvimba, vava ‘alembami bevwa nza yo yangalela muna mawete mayingi’! (Nku. 37:11) Muna kuma kiaki, zindalala sia Nkadi Ampemba e kitantu nze Yesu.—Tanga Yakobo 4:7, 8.
Nkia Mvutu Ovana?
• Nkia ziku kisonganga vo Yave otaninanga nkangu andi?
• Yesu aweyi kasisila mbandu ambote mu sia Satana e kitantu?
• Nkia mpila tulenda sila Nkadi Ampemba e kitantu?
[Yuvu ya Longoka]
[Foto ina muna lukaya lwa 29]
Kikundi ye nza kilenda kutukitula atantu a Nzambi
[Foto ina muna lukaya lwa 31]
Yesu waveza lukau lwa yintinu yawonso ya nza kavewa kwa Satana