Sungamena Nkanikinu mia Nzambi Muna Diambu dia Mavimpi
Sungamena Nkanikinu mia Nzambi Muna Diambu dia Mavimpi
‘Zola Yave wa Nzambi aku . . . muna nyindu aku wawonso, yo muna ngolo zaku zawonso.’—MAKU 12:30.
1. Nzambi adieyi kakana mu kuma kia wantu?
YAVE WA NZAMBI kakana ko vo wantu bayelanga yo fwa. Adami yo Eva basiwa muna mpatu a Edene, yovo “paradiso ya nkembo,” kimana ‘bavata yo lunga-lunga yo,’ ke mu 70 yovo 80 lwa mvu kaka ko, kansi yakwele mvu. (Etu. 2:8, 15; Nku. 90:10) Kele vo yakala yo nkento antete basikila ye kwikizi muna Yave yo lemvokela kimfumu kiandi, ke badi yela ko yovo nuna, ngatu fwa.
2, 3. (a) E nkand’a Kimpovi aweyi uyikilanga kinunu? (b) Nani i nkwa kuma muna lufwa katutwasila Adami? Aweyi lusinga sukisilwa?
2 O nkand’a Kimpovi kapu kia 12, utoma songang’e ‘mpasi za lumbu’ ya kinunu kia wantu balembi lunga. (Tanga Kimpovi 12:1-7.) E mvu zitezaniswanga ye ‘nti amande usavukanga.’ E malu m’anunu metezaniswanga ye “nkwa ngolo” ofumbamene yo zakama. O meso mau metezaniswanga ye wantu bena mu tombe bekengelelanga vana zianela. O meno mavwa katuka metezaniswanga ye “aniki a masa bevwena, kadi ke bengi ko.”
3 O malu mezakama yo lembi mona yo katuka meno, ka diau ko kakana o Nzambi mu kuma kia wantu. O lufwa katutwasila Adami, dimosi muna “mavangu ma Nkadi Ampemba” mana kesinga fwasa o Mwan’a Nzambi muna Kintinu kia Masia. Yoane wa ntumwa wasoneka vo: ‘Muna wau i kasengomoken’o Mwan’a Nzambi, kafwasa mavangu ma Nkadi Ampemba.’—1 Yoa. 3:8.
O Tokana mu Kuma kia Mavimpi ke Diambi ko
4. Ekuma selo ya Yave bafwana tokanena o vimpi wau? Kansi, adieyi batomene zaya?
4 Omu tandu kiaki mpe, selo ya Yave bemonanga e mpasi za mayela ye kinunu ezi zimonanga wantu awonso alembi lunga. Ikuma vo, ke diambi ko dia tokana mu kuma kia mavimpi meto, kadi dilenda twasa nluta. Tuzolele sadila Yave ye ‘ngolo zeto zawonso.’ (Maku 12:30) Kansi, tufwete zayanga e tezo muna diambu dia mavimpi, kadi tuzeye wo vo katulendi venga kinunu ko ngatu katula mvimba mayela.
5. Adieyi tulenda longoka muna mpila ina selo yakwikizi ya Nzambi bakadila ye yimbevo?
5 Selo yayingi ya kwikizi ya Yave bamonang’e mpasi za mayela. Epaferodito mosi mu yau. (Fili. 2:25-27) Timoteo wa nkundi a Paulu wa ntumwa, kimbevo kia vumu kayelelenge, ikuma o Paulu kankanikina vo kanuanga “fivinyo.” (1 Tim. 5:23) Paulu mpe wakala ye “lusende muna nitu,” nanga kimbevo kia meso yovo kimbevo kiakaka kakala kiau, ke kiakala ye nlongo ko muna tandu kiakina. (2 Kor. 12:7; Ngal. 4:15; 6:11) Muna kuma kia ‘lusende lwakala muna nitu,’ Paulu wadodokela Yave. (Tanga 2 Korinto 12:8-10.) Nzambi kavanga masivi ko mu katula “lusende muna nitu” a Paulu. Kansi wankumika mu zizidila lo. Nkum’a Yave wasadisa Paulu mu sunda lutovoko. Nga vena ye diambu tulenda longoka muna nona kiaki?
Kutokani Kwayingi ko mu Kuma kia Vimpi
6, 7. Ekuma katufwete tokanena kwayingi ko mu kuma kia mavimpi meto?
6 Nze una ozeye, Mbangi za Yave bevavanga mpe lusadisu lwa madotolo yo tonda ezaka mpila za nguka. Ezak’e ntangwa, muna Despertai! mu vaikanga malongi mu diambu dia mavimpi. Kana una vo ke tusongelanga muntu ko kana ayeyi i mpila yambote ya wukwa, tuyangalelanga lusadisu lw’akwa ngangu za wuka yimbevo. Kansi, tuzeye wo vo katulendi katula emvimba mayela ko. Muna kuma kiaki, diamfunu twalembi tokananga kwayingi mu kuma kia mavimpi. Tufwete kalanga twaswaswana yo wantu a nza ‘bakondelo e vuvu,’ ana bebanzanga vo ekiaki i zingu emvimba, ikuma vo muna vava wuka mayela mau, betambulwilanga mpila zawonso za nguka. (Ef. 2:2, 12) Ka tuzolele fwasa ngwizani eto ko yo Yave mu vava tanina e zingu kieto kia tandu kiaki. Kadi tuzeye wo vo, avo tuzindalala ye kwikizi muna Nzambi, ‘tusimb’o moyo wina vo moyo kikilu,’ moyo a mvu ya mvu muna nz’ampa yasilwa o nsilu.—1 Tim. 6:12, 19; 2 Pet. 3:13.
7 Vena ye kuma kiakaka kikutufilanga mu lembi tokana kwayingi mu kuma kia mavimpi. O tokana kwasaka mu kuma kia vimpi weto kulenda kutufila mu yantika vava ewete dia yeto kibeni. Paulu wasonga vonza kiaki vava kalukisa esi Filipo balembi ‘talanga kaka konso muntu o mandi mambu, konso muntu oma m’akw’andi kaka.’ (Fili. 2:4) Ke diambi ko dia tokanena mavimpi meto, kansi o zola tusonganga kwa mpangi zeto ye kw’awana tunatinanga “e nsangu zazi zambote za kintinu,” kulenda kutusadisa twalembi tokana kwayingi muna diambu dia mavimpi.—Mat. 24:14.
8. O tokana kwayingi mu kuma kia mavimpi adieyi kulenda vanga?
8 O tokana kwayingi mu kuma kia mavimpi kulenda fila Nkristu mu vonza kia sia e salu kia Kintinu va fulu ki’ezole. O sia diambu dia mavimpi va fulu kiantete dilenda mpe kutufila mu komekena akaka balanda e ngindu zeto mu kuma kia mpila nlongo bafwete nua yovo madia bafwete dia. Muna kuma kia diambu diadi, tala elongi kavan’o Paulu: ‘Nuvav’oma masundidi o mfunu; nwakala ye ludi yo kondwa twangu yamuna lumbu kia Kristu.’—Fili. 1:10.
Adieyi Disundidi o Mfunu?
9. Nkia diambu disundidi o mfunu ka tufwete veza ko? Ekuma?
9 Avo tubakwidi edi disundidi o mfunu, tukuyivana muna salu kiwukanga wantu muna mwanda. Samun’e nsangu zambote yo longa Diambu dia Nzambi i salu kiwukanga wantu muna mwanda. E salu kiaki nluta kitwasanga kwa yeto kibeni ye kw’awana tulonganga. (Nga. 17:22; 1 Tim. 4:15, 16) Mun’Eyingidilu ye Despertai! ezak’e ntangwa mu vaikanga tusansu twa mpangi zamakento ye zamakala ana benwananga ye mpasi za mayela. Tusansu twatu tusonganga una ampangi zazi bezizidilanga e mpasi zau yo sadila konso elau mu sadisa akaka bazaya Yave ye nsilu miandi miasivi. *
10. Ekuma tufwete kuyikengela vava tusolanga una tuzolele wukilwa?
10 Muna diambu dia mpasi za mayela, konso Nkristu una vo se mbuta kafwete ‘nata ezitu diandi’ dia zaya mpila nguka ketonda. (Ngal. 6:5) Kansi, tufwete sungamenanga vo, o Yave okutufundisa muna mpila nlongo tusola. Nze una ‘tutininanga menga,’ mu kuma kia lemvokela nkanikinu mia Nkand’a Nzambi, zitu weto muna Diambu dia Nzambi ufwete kutufila mu venga nlongo miakaka milenda fwasa ngwizani eto yo Yave. (Mav. 15:20) Ezaka mpila za nguka, mpandu ye nkisi zisadilanga. Yave watumba Aneyisaele ana ‘basiamininanga o bi’ yovo mavangu ma mpandu. Wavova vo: “Ke nutwasi diaka tukau twavêla ko; ndumbu yangemi kwa mono; e nzangama zeno za ngonde ye lumbu ya vundu, e mbokel’a tukutakanu,— kilendi siamina bi yo nkungi ko.” (Yes. 1:13) Muna ntangw’ampasi za mayela ke diambote ko mu vanga diambu dilenda fila Yave kalembi wá sambu yeto yovo fwasa ngwizani eto yo yandi.—Man. 3:44.
‘Lulungalalu’ Mfunu Lwina
11, 12. ‘Lulungalalu’ nkia mfunu lwina vava tusolanga mpila nlongo?
11 Vava tuyelanga, katufwete vingilanga ko vo Yave katuwuka mu mpila y’esivi, kansi tulenda samba kimana katuvana ngangu mu sola nlongo miambote. Tufwete kalanga ye umbakuzi yo lemvokela nkanikinu mia Nkand’a Nzambi muna sola nlongo. Avo tubakamene kimbevo kia mpasi, diambote twavava lufimpu lwa madotolo mole yovo matatu. Ediadi ngwizani dina ye dina diasonama muna Ngana 15:22, muna tutanganga vo: “Vana valembi vangwa mfulu, tukanu twafunga: Mun’aludiki engi i tusikidila.” Paulu wa ntumwa walukisa mpangi zandi z’Akristu vo ‘bakala nkal’a lulungalalu, yo unsongi, yo vumina Nzambi muna kiau tandu eki.’—Tito 2:12.
12 Wantu ayingi bemonanga mpasi za mayela nze zina zamona nkento mosi muna lumbu ya Yesu. Muna Maku 5:25, 26 tutanganga vo: ‘O nkento wavaikwanga menga mu mvu kumi ye zole, mpasi zingi kamweswa kwa nganga zayingi, yo futa yawonso kakala yau, kansi kasasukanga ko, e kimbevo kiawokelanga kaka.’ Yesu wafwila nkento ndiona e nkenda yo kunwuka. (Maku 5:27-34) Muna kuma kia mpasi zayingi, Akristu akaka betontwanga mu vava lusadisu kwa nganga zisadilanga nlongo ke mina ngwizani ko ye nkanikinu mia Nzambi.
13, 14. (a) O Satana aweyi kalenda fwasila kwikizi kieto vava tusolanga nlongo? (b) Ekuma tufwete vengela konso má kin’e ngwizani ye mpandu?
13 Satana osadilanga ntota zayingi mu kutuvukumuna twayambula nsambila aludi. Nze una kesadilanga e zumba y’eloko dia mavwa mu kutuvukumuna, Satana ovavanga fwasa kwikizi ki’akaka mu vava lusadisu kwa nganga zisadilanga nkisi ye mpandu. Tusambanga kwa Yave ‘katuvuluza muna ndiona wambi’ ye muna “umpumbulu wawonso.” Muna kuma kiaki, ka tufwete vezanga umpukumuni wa Satana ko muna sadilanga konso má kina ngwizani ye mpandu yovo nkisi.—Mat. 6:13; Tito 2:14.
14 Yave wakanikina Aneyisaele mu venga mavangu ma mpandu ye nkisi. (Nsi. 18:10-12) Paulu wayika “mambu ma mpandu” kumosi ye “mavangu ma nitu.” (Ngal. 5:19, 20) Vana ntandu, “akwa mpandu” ke bekota muna nz’ampa ya Yave ko. (Lus. 21:8) Muna kuma kiaki, konso má kin’e ngwizani ye mpandu kia ngemi vana ndose a Yave.
“Unleka Weno Mbula Wazayakana”
15, 16. Ekuma tuvwididi ngangu o mfunu vava tusolanga nlongo? Nkia luludiku lwa ngangu lwavana e buka kia selo yambuta muna tandu kiantete?
15 Mu kuma kia mana tuwidi, kele vo lukatikisu tuna lwau mu kuma kia nlongo kesadilanga e nganga yovo mpila ina kewukilanga, diambote twalembi kumvava diaka. Kuna diak’e sambu, o lembi zaya una nlongo miwukilanga, ke disongele ko vo e nganga mpandu kesadilanga. Muna lemvokela nkanikinu mia Nkand’a Nzambi mu diambu dia mavimpi, divavanga vo twakala ye ngangu za Nzambi yo umbakuzi. Muna kapu kia 3 kia nkand’a Ngana, tusololanga lulukisu olu: “Bunda Yave e vuvu yo ntim’aku wawonso, kuyekamena waku umbakuzi ko: Muna ngyenda zaku zawonso untadila, oyandi osingika nzila zaku. . . . Lunda ngangu zavimpi ye ndwenga; i nkala mekala moyo a mwand’aku.”—Nga. 3:5, 6, 21, 22.
16 Ekolo tusianga e ngolo mu sunda mpasi za mayela ye za kinunu kimana twakala ye mavimpi, tufwete kebanga kimana twalembi vidisa edienga dia Nzambi. Muna diambu dia mavimpi ye makaka, tufwete ‘yambula unleka weto, wazayakana kwa wantu awonso’ muna lemvokelanga nkanikinu mia Nkand’a Nzambi. (Fili. 4:5) Muna nkanda basoneka, buka kia selo yambuta muna tandu kiantete bakanikina Akristu bayikenga muna nsambila za teke, ye menga ye zumba. Muna nkanda wau, mwakala yo luludiku lwalu: “Ovo nuvavuka mo, nutomese.” (Mav. 15:28, 29) Mu nkia mpila?
Tuzayang’e Tezo Ekolo Tuvingilanga Vimpi Walunga
17. Nkia nluta tubakanga muna nitu vava tulemvokelanga nkanikinu mia Nkand’a Nzambi?
17 Diambote konso muntu mu yeto kakiyuvula: ‘Nga yibakulanga nluta mia lemvokela nsiku wa Nkand’a Nzambi mu kuma kia menga ye zumba?’ Yindula mpe nluta tubakanga muna ‘kuyikiànzisa muna nsafu wawonso wa nitu yo mwanda.’ (2 Kor. 7:1) Muna lemvokela nkanikinu a Nkand’a Nzambi mu kuma kia velela kwa nitu, yimbevo yayingi tuvenganga. Muna tina nua fomo ye diamba tukuyikiànzisanga muna nsafu wawonso wa nitu yo mwanda. Tukalanga mpe yo vimpi wambote vava tudianga yo nwina mu tezo. (Tanga Ngana 23:20; Tito 2:2, 3.) Kana una vo o leka tulu twafwana yo nana e nitu dilenda kutusadisa mu kala yo vimpi wambote, o lemvokela nkanikinu mia Nkand’a Nzambi i diluta kutusadisa mu kala ye mavimpi mambote muna mwanda ye mu nitu.
18. Adieyi tufwete toma tokanenanga? Nkia ungunza mu kuma kia vimpi tuvingilanga vo walungana?
18 Edi disundidi o mfunu, tufwete lunga-lunganga mavimpi meto ma mwanda yo siamisa ngwizani eto yo S’eto ezulu, kadi yandi i Nto a ‘zingu eki, ye kina kikwiza,’ muna nz’ampa kasila o nsilu. (1 Tim. 4:8; Nku. 36:9) Muna nz’ampa ya Nzambi, tukala ye vimpi walunga wa nitu ye wa mwanda, kadi tulolokwa masumu muna kimenga kia Yesu. Yesu Kristu wa Mwan’ememe a Nzambi, okutufila kuna “nto za maza ma moyo.” O Nzambi okunguna mansanga mawonso muna meso meto. (Lus. 7:14-17; 22:1, 2) Muna kolo kiaki, tumona ndungan’a ungunza wau wa kiese: “O ntungi kevova ko vo, yela nyela.”—Yes. 33:24.
19. Nkia ziku tufwete kala kiau ekolo tuvavanga mavimpi?
19 Tuna ye ziku vo luvevoko lweto lufinamene. Tuvingilanga e lumbu kin’o Yave kefokola mayela ye lufwa. Ekolo tuvingilanga lumbu kiaki, tukala ye vuvu vo Es’eto anzodi okutusadisa mu zizidila e mpasi, kadi ‘okutulunga-lunganga.’ (1 Pet. 5:7) Muna kuma kiaki, yambula twalemvokelanga nkanikinu mia Nkand’a Nzambi ekolo tuvavanga mavimpi!
[Mvovo Vana Yand’a lukaya]
^ tini. 9 Lenda solola tusansu twatu muna quadro ina muna lukaya lwa 17 mun’Eyingidilu dia 1 dia ngonde a Setemba, 2003 mu Kimputu.
Yuvu ya Lufimpu
• Nani i nkwa kuma muna mayela? Nani okutuvevola muna mpasi z’esumu?
• Kana una vo ke diambi ko dia tokanena vimpi weto, adieyi tufwete venga?
• Ekuma Yave kekutufundisila muna mpila nguka tusolanga?
• Muna kuma kia vimpi, nkia nluta tulenda baka muna lemvokelanga nkanikinu mia Nkand’a Nzambi?
[Yuvu ya Longoka]
[Foto ina muna lukaya lwa 23]
O wantu ke basemwa ko kimana bayelanga yo nuna
[Foto ina muna lukaya lwa 25]
Kana una vo bemonanga mpasi za mayela, nkangu a Yave umonanga kiese muna salu kia umbangi